Wanfala private skul long Canada arrangem wanfala field trip for samfala student. Samfala teenage boy wea go long datfala trip spoelem nara boy. Long Ottawa Citizen niuspepa Leonard Stern sei olsem abaotem datwan: “Nomata olketa young pipol garem savve, gud education, and kam from famili wea rich datwan no stopem olketa for duim nogud samting.”

Leonard Stern sei tu: “Mi tingse main samting parents bae laek for duim hem for teachim pikinini bilong olketa for garem gudfala wei. Bat luk olsem staka parents tingse hem moa important for pikinini skul gud, and kasem waka wea garem big pei.”

Hem tru, hem important for pikinini kasem education. Nomata olsem, education wea man kasem long skul no savve aotem feeling for laek duim nogud samting. So hao nao pipol savve lane for garem gudfala wei?

Bible hem olsem mirror. Hem savve helpem iumi for lukim klia olketa wik point bilong iumi. (James 1:23-25) Bible savve helpem iumi for garem olketa wei wea mekem iumi stap gud witim olketa narawan tu. Hem savve helpem iumi for duim gudfala samting, kaen, patient, kontrolem seleva, and showimaot love. Bible sei love “barava mekem pipol for wan mind.” (Colossae 3:14) Hao nao love mekem pipol for wan mind? Tingim wanem Bible talem abaotem diswan.

• “Man wea garem love hem patient and kaen. Hem no savve jealous, or tok praod, and hem no savve tinghae tumas long hemseleva. Hem evritaem showimaot respect, no tingim hemseleva nomoa, no kwiktaem for kros. Hem no tingim olowe nogud samting wea narawan duim long hem. Man wea garem love hem no hapi long olketa nogud samting, bat hem hapi long samting wea tru. Nomata wanem hem happen, man wea garem love hem hapi nomoa. . . . and no eni samting savve mekem hem givap. Love no savve finis.”—1 Corinth 13:4-8.

• “Man wea lovem narawan hem no duim nogud samting long hem.”—Rome 13:10.

• “Barava important samting nao, iufala mas barava lovem narawan, bikos man wea garem love hem evritaem willing for forgivim narawan.”—1 Peter 4:8.

Taem iumi witim pipol wea lovem iumi, iumi feel sef and no wari, iaman? Hem bikos iumi savve olketa tingim iumi, and olketa bae no duim nogud samting long iumi.

Love savve helpem pipol tu for mekem samfala change long laef bilong olketa from olketa tingim narawan. Olsem example, George laek for spendem taem witim smol grani bilong hem. Bat problem nao, George hem man for smoke, and dadi bilong baby hia no laekem George for smoke taem hem lukaftarem baby. So wanem nao George duim? Nomata hem smoke for 50-fala year finis, hem stop for smoke bikos hem lovem grani bilong hem. Tru nao, love garem paoa for changem pipol!

 Love hem samting wea parents mas teachim long pikinini. Parents showimaot love long pikinini long wei for provaedem kaikai, protectim olketa, and lukaftarem olketa taem olketa garekil or sik. Parents bae story witim and stretem pikinini bilong olketa, and olketa bae teachim pikinini long wanem hem stret and no stret. And tu, pikinini bae lane for showimaot love taem hem followim example bilong parents.

Bat samfala parents no teachim pikinini long hao for showimaot love. Waswe, diswan minim pikinini bilong olketa bae no garem gudfala wei nao? Nomoa! Samfala pipol wea growap long famili wea no showimaot love and wea duim nogud samting, olketa changem wei bilong olketa and lane for kaen and tingim narawan. Long next article bae iumi storyim tufala man wea changem wei bilong tufala nomata olketa narawan tingse maet datwan bae hard.