Taem pipol followim advaes long Bible datwan savve changem laef bilong olketa. Example bilong Ricardo and Andres showimaot diswan.

RICARDO: Taem mi 15 year nomoa, mi joinim wanfala gang, and mi start for duim olketa nogud samting. Goal bilong mi hem for stap long prison for tenfala year! Maet datwan here krangge, bat long ples bilong mi, staka pipol tinghae long olketa wea bin stap long prison, and mi laek for olsem olketa.

Mi duim olketa nogud samting olsem for tekem drug, faet, and for durong. Wanfala naet mifala faetem nara gang and mifala evriwan sutsut long gun. Mi tingse bae mi dae nao, bat lucky nao no eni bullet kasem mi. Bihaen datwan, mi start for ting raonem laef bilong mi, and mi disaed for change. Bat mi no savve hao for change, and hu nao savve helpem mi.

Mi lukim olketa relative bilong mi garem staka problem tumas and olketa nating hapi. Bat wanfala uncle and famili bilong hem no olsem. Mi savve olketa gud pipol and olketa followim olketa Bible principle. Wantaem olketa teachim mi nem bilong God hem Jehovah. So no longtaem bihaen datfala naet wea mifala sutsut, mi talem nem bilong Jehovah insaed prea bilong mi and askem hem for helpem mi. Mi barava seke bikos next day nomoa wanfala Jehovah’s Witness kam preach long haos bilong mi! Gogo hem studyim Bible witim mi.

Bat no longtaem bihaen, mi kasem test. Samfala from datfala gang savve ringim mi. Nomata mi laek go lukim olketa, mi no duim datwan bikos mi barava laek for gohed studyim Bible. And mi hapi mi duim datwan bikos laef bilong mi kamap gud!

Wantaem mi prea long God and sei bifor mi laek stap long prison for tenfala year mekem olketa narawan respectim mi. Then mi sei from mi change, mi laekem hem for letem mi duim full-taem preaching waka for tenfala year, mekem mi helpem olketa narawan. God ansarem prea bilong mi, bikos mi bin duim full-taem preaching waka for 17-fala year. And mi hapi for sei, no enitaem mi go long prison!

Sorre nao, staka fren bilong mi bifor olketa stap long prison distaem, and samfala dae finis. Datwan mekem mi tinghae long wei wea olketa Jehovah’s Witness relative helpem mi. Olketa strong for followim Bible and no fraet for difren from narawan. Gogo mi respectim olketa winim olketa wea insaed datfala gang. And tu, mi barava thankiu long God from hem helpem mi for garem gudfala laef.

 ANDRES: Mi growap long wanfala ples wea pipol poor and staka iusim drug, steal, killim man dae, and olketa jury woman staka tu. Dadi bilong mi hem man for drink and hem addict long datfala drug cocaine. Hem and mami savve raoa and faet olowe.

Taem mi young, mi start for drinkim alcohol and iusim olketa drug. Mi spendem staka taem for raraon nomoa long street. Mi savve steal, and then mi salem wanem mi stealim. Gogo dadi lanem mi hao for duim olketa nara nogud samting. Hem teachim mi hao for kasem olketa drug and olketa nara samting from nara kantri then salem. Mi kasem staka selen from datwan. Then wanday olketa police kam long haos and arrestim mi bikos mi trae for killim dae samwan. Olketa putim mi long prison for faevfala year.

Wanfala morning long prison olketa announcem wanfala Jehovah’s Witness bae kam givim tok and eniwan savve attendim, so mi disaed for go. Wanem datfala Witness talem hem mek sense, and mi start for studyim Bible witim olketa. Olketa talem stret wanem Bible sei mi mas duim for kasem olketa haefala standard bilong God.

Mi luksavve mi needim God for helpem mi mekem olketa change hia, especially taem olketa nara prisoner sei olketa no laekem mi for studyim Bible. So mi prea long Jehovah for hem strongim and helpem mi, and hem duim datwan. Mi no stop for study, and gogo mi no fraet for story long olketa nara prisoner abaotem Bible.

Taem prison sentence bilong mi finis mi fraet for lusim prison. Mi laek gohed stap long there nomoa! Bat taem mi go, staka prisoner baebae long mi, and samfala tok kaen long mi and sei, “Bae iu olraet pastor.”

Mi savve sapos mi no followim wanem Bible talem, laef bilong mi bae barava nogud nao. Mi barava tinghae long love wea God showimaot long mi, and mi hapi hem no tingse mi hard for change. *