“Nomata sapos eniwan long iufala hem feel nogud long narawan, hem mas no kros bat mas evritaem forgivim hem.”​—COLOSSAE 3:13.

Iumi evriwan savve mekem mistek. Iumi maet mekem olketa narawan feel nogud, or olketa nao mekem iumi feel nogud. Nomata wanem, iumi need for forgivim each other. Taem iumi forgive, bae iumi no gohed feel kros lo man wea duim samting lo iumi. Iumi no laek for ‘changem bak nogud samting’ wea narawan duim, or iumi no laek for talem olowe mistek or wik point blo hem. (Rome 12:17) Bat, hao sapos narawan mekem iumi feel nogud and iumi no savve forgetim samting wea happen? Then iumi shud go story private witim hem lo wei wea showimaot respect. Goal blo iumi hem for mek peace, no for win.—Rome 12:18.

“Mas hambol and ting long narawan olsem hem winim iufala.”​—PHILIPPI 2:3.

Taem iumi hambol and showimaot respect, pipol bae hapi for stap witim iumi. Olketa bae savve dat iumi bae kaen and tingim olketa, and iumi bae no min for duim samting for spoelem feeling blo olketa. Bat sapos iumi tingse iumi gud winim olketa  narawan, or sapos iumi laekem pipol for followim tingting blo iumi nomoa, datwan bae kosim problem and wei for feel nogud. Pipol bae les lo iumi and iumi bae no garem staka fren or maet no eni fren nao.

“God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.”​—ACTS 10:34, 35.

Creator blo iumi hem no favorim eniwan bikos lo kantri, languis, background, or kala skin blo olketa. “God wakem pipol long evri kantri long world from wanfala man nomoa.” (Acts 17:26) So datwan minim iumi evriwan, iumi olketa brata and sista. Taem iumi treatim evriwan witim respect and iumi kaen lo olketa, iumi mekem olketa hapi, iumiseleva tu hapi, and iumi mekem Creator blo iumi for hapi.

“Iufala, . . . no raf.”​—COLOSSAE 3:12.

Taem iumi no raf, iumi mekem olketa narawan for no fraetem iumi. Olketa bae feel free for story witim iumi and stretem iumi tu bikos olketa savve iumi bae no kros. Taem samwan hem kros lo iumi, wei wea iumi kaen bae katem daon kros blo olketa. Provebs 15:1 sei: “Tok isi long man wea hemi kros, bae hemi kol moa, tokstrong long hem, bae hemi hot moa.”

“Man wea givim samting hem barava hapi winim man wea kasem samting.”​—ACTS 20:35.

Staka pipol distaem olketa greedy and tingim olketa seleva nomoa. Bat olketa wea kaen nomoa bae kasem trufala hapi. (Luke 6:38) Pipol wea kaen, olketa hapi bikos olketa lovem pipol winim olketa samting wea olketa garem. Datfala sem love muvim olketa for talem thankiu and for showimaot olketa tinghae taem samwan kaen lo olketa. (Colossae 3:15) Askem iuseleva, ‘Olketa wanem kaen pipol nao mi laek for stap witim olketa —olketa wea selfish and no savve thankiu or olketa wea kaen and garem wei for tinghae?’ So wat nao point? Garem olketa wei wea iu laekem olketa narawan for garem.—Matthew 7:12.