Why Nao Iumi Safa, Kamap Olo, and Dae?
Creator blo iumi ting lo iumi olsem olketa pikinini blo hem. So hem no laekem iumi for safa. Bat, iumi lukim wei for safa kamap big tumas. Why nao olsem?
Iumi Safa Bikos lo Wanem First Parents blo Iumi Duim
“Sin hem kasem evriwan long world bikos long wanfala man nomoa. From olketa sin, olketa dae, dastawe evriwan dae bikos evriwan sin.”—ROME 5:12.
God creatim first mami and dadi blo iumi, Adam and Eve witim mind and body wea perfect. Hem putim tufala tu insaed wanfala paradaes lo earth wea olketa kolem garden blo Eden. Hem talem tufala for kaikaim frut blo evri tree insaed lo datfala garden. Wanfala tree nomoa tufala bae no kaikaim frut blo hem. Bat Adam and Eve chus for kaikaim samfala frut from datfala tree wea God stopem and datwan hem wanfala sin. (Jenesis 2:15-17; 3:1-19) Bihaen tufala disobey, God aotem tufala from datfala garden, and laef blo tufala kamap hard tumas. Bihaen tufala garem pikinini, laef kamap hard tumas for olketa pikinini tu. Olketa evriwan kamap olo and dae. (Jenesis 3:23; 5:5) So iumi savve sik, kamap olo, and dae bikos iumi kam from Adam and Eve.
Olketa Wicked Spirit Tu Mekem Iumi for Safa
“Full world hem stap long paoa bilong Satan.”—1 JOHN 5:19.
Satan hem wanfala angel wea iumi no savve lukim wea bighed againstim God. (John 8:44; Revelation 12:9) Bihaen, olketa nara angel tu joinim Satan. Olketa kolem olketa angel hia demon. Olketa nogud angel hia iusim paoa wea olketa garem for laea lo pipol and mekem olketa for no obeyim Creator. Olketa savve bihaenem staka pipol for duim olketa nogud samting. (Sams 106:35-38; 1 Timothy 4:1) Satan and olketa demon barava laek for mekem pipol safa.
Samfala Taem Iumiseleva Duim Samting wea Mekem Iumi Safa
“Eni samting wea [man] plantim, datwan nao bae hem harvestim.”—GALATIA 6:7.
Iumi evriwan safa bikos iumi born sin and Satan kontrolem disfala world. Bat samfala taem pipol nomoa kosim wei for safa for olketa seleva. Lo wanem wei? Staka taem olketa safa bikos olketa duim nogud samting or mekem olketa karangge disison. Bat taem pipol duim gud samting, olketa kasem gud samting tu. Olsem example, taem hasband and dadi wea honest hem waka hard and lovem famili blo hem, bae hem kasem staka gud samting and mekem famili blo hem for hapi. Bat dadi wea savve gambol, drink tumas, or lesy, hem savve mekem hemseleva and famili blo hem for poor. So hem wise for iumi lisin lo Creator blo iumi. Hem laekem iumi for kasem staka gud samting, wea insaed diswan hem wei for ‘stap gud.’—Sams 119:165.
Iumi Insaed lo “Olketa Last Day”
“Long olketa last day. . . . Pipol bae tingim olketa seleva nomoa, laekem tumas selen, . . . no obeyim dadi and mami. . . . No savve kontrolem seleva, raf, and no laekem gud samting.”—2 TIMOTHY 3:1-5.
Distaem, staka pipol garem olketa fasin wea olketa verse hia storyim. Diswan pruvim iumi insaed lo “olketa last day” blo disfala world. Bible storyim tu hao lo taem blo iumi bae staka war, wei for short lo kaikai, olketa bigfala earthquake, and staka nogud sik tu bae kamap. (Matthew 24:3, 7, 8; Luke 21:10, 11) Olketa samting hia kosim pipol for safa and dae.
