Taem pipol wari abaotem hao world hem fulap lo trabol, datwan savve affectim feeling and laef blo olketa. Staka wea olketa nogud samting hia affectim olketa, tingse no eni hope hem stap. Wat nao olketa duim?

• Samfala no laek for ting abaotem future.

• Olketa narawan drinkim alcohol or tekem drug mekem olketa no tingim problem blo olketa.

• Samfala laek for dae winim for laef. Olketa ting olsem, “Iumi laef for wat nomoa ia?”

• Samfala problem wea iu feisim distaem maet hem for lelebet taem nomoa and maet hem change and kamap gud moa.

• Nomata situation hem no change, samfala samting stap wea iu savve duim for helpem iu for deal witim.

• Bible givim iumi trufala hope, hem sei klosap nao evri trabol lo world bae finis for olowe.

Bible sei: “No warim samting wea bae happen tumoro, leavim go datwan for tumoro nao, bikos evri day bae olketa problem kamap.”—Matthew 6:34.

Tingim nomoa wat iu need for duim each day. No letem olketa wari blo tumoro for mekem iu stop for duim olketa samting wea iu shud duim tuday.

Taem iu wari abaotem olketa negative samting wea iu ting hem maet happen, bae hem mekem iu just stress go moa and hope blo iu for garem gud future bae hem wikdaon.

Man wea raetem psalm prea olsem lo God: “Tru toktok blong yu nao hemi laet wea mi save falom. An hemi gohed fo saen long wei blong mi.” (Sams 119:105) Lukim hao Word blo God, Bible, hem olsem laet.

Lo naet wea hem dark, iumi savve iusim laet for helpem iumi disaedem wea for wakabaot. Olsem tu, Bible garem wisdom wea savve helpem iumi for mekem olketa disison wea no isi.

Wanfala laet savve showim klia road wea iumi wakabaot followim. Lo sem wei tu, Bible savve showim klia hope wea iumi garem for future.