Iufala parents savve finis long olketa gudfala wei for followim. Olsem example, iufala traem best for honest long evri samting. Sapos iu duim olsem, maet iu laekem pikinini bilong iu tu for garem kaen wei olsem.

And iufala laek for teachim olketa pikinini hem important for waka hard, duim stret samting, and tingim narawan. Hem gud for pikinini lanem olketa gudfala wei hia taem hem smol yet.

BIBLE PRINCIPLE: “Tisim pikinini fo falom stretfala wei, taem hemi bikman, bae hemi no lusim.” —Provebs 22:6.

Hem important for garem olketa gudfala wei. Karyn, wanfala mami, sei: “Hem isi tumas for lukim olketa nogud samting long mobile or tablet. Olketa pikinini savve sidaon klosap long iumi tu, and long semtaem gohed for lukim olketa nogud samting!”

BIBLE PRINCIPLE: “Pipol wea mature . . . luksavve long wanem hem stret and wanem hem no stret.”—Hebrew 5:14.

Hem important for tingim nara pipol. Iumi laekem olketa pikinini for talem kaenfala toktok olsem “plis” and “thankiu,” and for showimaot olketa tingim narawan. Staka pipol distaem no tingim olketa narawan, bat interest nomoa for lukluk long tablet or mobile bilong olketa.

BIBLE PRINCIPLE: “Samting wea iufala laekem pipol for duim long iufala, sem samting nao iufala mas duim long olketa.”—Luke 6:31.

Talem pikinini wanem iuseleva bilivim hem stret and no stret. Olsem example, research hem showimaot staka teenager stap klia from wei for durong bikos parents bilong olketa teachim olketa diswan hem no stret.

GUD SAMTING FOR DUIM: Story abaotem wanfala samting wea happen for teachim pikinini bilong iu. Olsem example, maet long nius samwan killim dae narawan. Maet iu savve sei long pikinini: “Hem sorre samting nao taem pipol kros and duim nogud samting long narawan. Why nao iu tingse olketa duim olsem?”

“Pikinini hard for duim stret samting sapos hem no savve wanem hem stret and no stret.” —Brandon.

Teachim pikinini for tingim nara pipol. Olketa smol pikinini tu savve lane for sei “plis” and “thankiu” and for tingim olketa narawan. Disfala buk Parenting Without Borders sei: “Taem olketa pikinini tingim olketa narawan long famili, skul, and community, olketa bae willing for duim gudfala samting for olketa narawan, and no tingim olketa seleva nomoa.”

GUD SAMTING FOR DUIM: Givim waka for olketa pikinini duim long haos mekem olketa luksavve hem important for duim gudfala samting for olketa narawan.

“Sapos olketa pikinini bilong iumi getius finis for duim waka long haos, bae olketa savve wanem for duim taem olketa big. Bae olketa savve finis hao for lukaftarem olketa seleva.”—Tara.