Wei for Fren Witim God
Firstfala article lo disfala magasin storyim hao staka pipol tinghae lo Bible bikos hem kam from God. Olketa sei taem olketa readim and followim wanem Bible talem, datwan helpem olketa for fren witim God and for minim staka samting abaotem laef.
Bible sei man wea garem “spiritual tingting” hem tingim wanem God laekem and laek for savve lo tingting blo God. (Jude 18, 19) Bat pipol wea no laekem God for leadim olketa depend lo tingting blo olketa seleva.—Ephesus 5:1.
HOPE FOR FUTURE
BIBLE PRINCIPLE: “Sapos yu givap long taem blong trabol, hem nao somaot dat yu no strong.”—Provebs 24:10.
WANEM HEM MINIM: Sapos iumi no garem hope for future, maet iumi laek givap taem iumi kasem hard taem. Bat sapos iumi garem hope, datwan savve helpem iumi for no givap. Bae iumi luksavve olketa problem wea iumi kasem hem for lelebet taem nomoa. Hem gud for tingim tu, maet gud samting savve kamaot from wanem iumi deal witim.
SAMTING IU SAVVE DUIM: Iumi need for tingim olketa gud samting wea bae happen lo future. No givap for aftarem olketa goal blo iu bikos iu wari abaotem eni samting wea maet happen, and no hol bak bikos iu weitim best taem for duim samting. Hem tru, “eni kaen samting” savve happen. (Eklesiastes 9:11) Bat staka taem evri samting bae olraet nomoa. Bible iusim wanfala example abaotem garden for storyim diswan. Hem sei: “Yu mas plantem kaikai long gaden long moning, an waka long gaden ivining tu. Bikos yu no save wanem waka nao bae kamap gudfala. Maet olketa wea yu plantem long moning nao hemi garem kaikai, o narawan long ivining, o tufala evriwan.” —Eklesiastes 11:6.
ANSA FOR OLKETA IMPORTANT KWESTIN
BIBLE PRINCIPLE: “Givim save long mi . . . Evri toktok blong yu hemi barava tru.”—Sams 119:144, 160.
WANEM HEM MINIM: Bible hem savve ansarem olketa kwestin wea pipol garem. Olsem example, hem ansarem olketa kwestin olsem
-
Waswe, God wakem iumi or olketa monkey change for kamap man?
-
Wanem nao plan blo God for olketa man?
-
Wanem nao happen lo man bihaen hem dae?
-
Waswe, laef hem olsem nomoa?
Staka million pipol kasem ansa blo olketa kwestin hia and olketa nara kwestin taem olketa studyim Bible, and datwan barava helpem olketa.
WANEM IU SAVVE DUIM: Iu savve studyim Bible. Askem eni Jehovah’s Witness for helpem iu duim datwan. Lukluk lo website blo mifala jw.org. Iu savve kam lo olketa meeting blo mifala tu wea free nomoa.
SAMFALA NARA BIBLE PRINCIPLE
Lukim video lo jw.org Why Nao Hem Gud for Studyim Bible? wea stap lo winim 880 languis
LUKSAVVE IUMI NEEDIM GOD.
“Olketa wea luksavve olketa needim God bae hapi.”—MATTHEW 5:3.
LANE ABAOTEM GOD.
“Pipol traem best for savve long God, and gogo bae olketa savve long hem nao, bikos hem no hard nomoa for savve long hem.”—ACTS 17:27.
READIM BIBLE AND TING RAONEM GUD.
“Hem tinghae lo law bilong Jehovah, * and hem readim and ting raonem datwan evriday and naet. . . . Bae hem win long evri samting hem duim.”—PSALM 1:2, 3, NW.
^ par. 23 Jehovah hem nem blo God wea stap insaed Bible.
Iu Laek Lukim Nara Samting?
WASTAOA
Hao Bible Savve Helpem Iu for Garem Gudfala Laef
Bible garem olketa gudfala advaes wea kam from God.
