Samting wea Iumi Lanem from Jesus

Abaotem Trufala God

Waswe, God garem nem?

Jesus lanem pipol hao God garem nem. Jesus talem olketa olsem: “So iufala mas prea long wei olsem: ‘Dadi bilong mifala long heven, mifala laekem nem bilong iu for stap holy.’” (Matthew 6:9) Bible talem iumi hao Jehovah nao nem bilong God. (Psalm 83:18) Jesus prea long Dadi bilong hem for olketa disaepol olsem: “Mi talemaot nem bilong iu long olketa.”​—John 17:26.

Hu nao Jehovah?

Jesus sei Jehovah nomoa “trufala God” bikos Jehovah nao Man wea wakem evri samting. (John 17:3) Jesus sei olsem: “Hao, iufala no readim finis? Start kam long taem wea God wakem olketa man, hem wakem man and woman.” (Matthew 19:4) Jesus talem tu hao “God hem wanfala Spirit.” (John 4:24) Datwan minim iumi no savve lukim God.​—Exodus 33:17-​20.

 Wanem nao God laekem iumi for duim?

Taem samwan askem Jesus wanem Law nao hem important, Jesus talem olsem: “‘Pipol bilong Israel, herem kam disfala toktok, Jehovah nao God bilong iumi, and wanfala Jehovah nomoa hem stap and iu mas lovem God bilong iu Jehovah long full heart bilong iu. And iu mas iusim full soul, full strong, and evri savve bilong iu for lovem hem tu.’ Nara law wea barava important nao hem, ‘Iu mas lovem narawan long sem wei wea iu lovem iuseleva.’”​—Mark 12:28-​31.

Hao nao iumi showimaot iumi lovem God?

Jesus sei olsem: “Mi lovem Dadi.” Hem showimaot love bilong hem long wanem wei? Hem talem olsem: “Dadi hem talem mi wanem for duim, so mi duim nao.” (John 14:31) Hem talem tu hao: “Mi duim olketa samting wea hem hapi long hem.” (John 8:​29) Iumi savve mekem God hapi sapos iumi lane abaotem hem. Taem Jesus prea for olketa disaepol bilong hem, hem talem olsem: “For kasem laef olowe, olketa mas savve long iu, wea iu nomoa trufala God.”​—John 17:3; 1 Timothy 2:4.

Hao nao for savve abaotem God?

Wanfala wei for savve abaotem God, hem for lukluk long olketa samting wea hem wakem. Tingim wanem Jesus talem: “Lukluk gud long olketa bird. Olketa no plantim seed then harvestim samting olketa plantim. Olketa no keepim kaikai long eni foodsafe tu. Nomata olsem, Dadi bilong iufala long heven feedim olketa. Bat iufala moa important winim olketa bird!” Wanem nao Jesus laek lanem iumi? Iumi shud no letem wanem iumi needim for stopem iumi for worshipim God.​—Matthew 6:​26-​33.

Nambawan wei for savve long Jehovah hem for studyim Bible. Jesus talem hao Bible hem “toktok bilong God.” (Luke 8:​21) Jesus sei olsem long God: “Toktok bilong iu nao tru.”​—John 17:17; 2 Peter 1:​20, 21.

Jesus helpem pipol for savve long trufala samting abaotem Jehovah. Wanfala disaepol tok olsem abaotem Jesus: “Samting wea hem storyim long iumi long road taem hem explainim gud olketa Scripture, hem barava muvim tumas heart bilong iumi, iaman!” (Luke 24:32) Iumi mas hambol for savve abaotem God. Jesus sei olsem: “Sapos iufala no changem wei bilong iufala for olsem wei bilong olketa smol pikinini, bae hem hard for iufala go insaed long kingdom bilong God.”​—Matthew 18:3.

Why nao savve abaotem God mekem man hapi?

God helpem iumi for savve why nao iumi stap long disfala earth. Jesus sei olsem: “Olketa wea luksavve olketa needim God bae hapi.” (Matthew 5:3) Jehovah lanem iumi stretfala wei for followim. Jesus sei: “Olketa wea herem toktok bilong God and obeyim datwan nao olketa hapi.”​—Luke 11:28; Isaiah 11:9.

For iu savve moa, lukim chapter 1 long buk Wanem Nao Really Samting wea Bible Teachim? *

[Footnote]

[Piksa long page 20]

“Mi talemaot nem bilong iu long olketa.”​—John 17:26

 [Olketa Piksa long page 20, 21]

Bible and evri samting wea Jehovah wakem helpem iumi for savve abaotem God