Klosap Wanfala Paradaes Earth!

“Dadi bilong mifala long heven, mifala laekem nem bilong iu for stap holy. Mifala laekem kingdom bilong iu for kam. Duim samting wea iu plan for duim long earth, long sem wei wea iu duim datwan long heven.”—Matthew 6:​9, 10.

DISFALA prea wea staka pipol savve long hem olsem Lord’s prea, hem mekem man for garem hope. Hao nao olsem?

Olsem datfala Lord’s Prea talemaot, Kingdom bilong God bae duim wanem God laekem for disfala earth olsem hem duim finis long heven. And God laekem disfala earth for kamap wanfala Paradaes. (Revelation 21:​1-5) Wanem nao datfala Kingdom bilong God, and wanem nao bae hem duim for mekem earth kamap wanfala Paradaes moa?

Trufala Gavman

Kingdom bilong God hem trufala gavman. For wanfala gavman waka gud, hem mas garem olketa man for rul, olketa law, and pipol for hem rulim. Waswe, Kingdom bilong God hem garem olketa samting hia? Tingim ansa fro

Hu nao olketa wea bae rul long Kingdom bilong God? (Isaiah 33:22) Jehovah God hem markem Son bilong hem Jesus Christ, for leadim datfala Kingdom. (Matthew 28:18) Followim samting wea Jehovah talem, Jesus chusim samfala nomoa from “evri tribe and languis and pipol and kantri,” and olketa bae rul witim hem olsem “olketa king ovarem earth.”​—Revelation 5:​9, 10.

Wanem kaen law nao Kingdom bilong God mekem for pipol obeyim? Samfala law hem for pipol mas duim samting. Jesus talemaot main wan long olketa law hia taem hem sei:“‘Iu mas lovem God bilong iu Jehovah long full heart bilong iu. And iu mas iusim full soul, and evri savve bilong iu for lovem hem tu.’ Disfala law nao first wan, and no eni nara law hem important winim diswan. Nara law wea barava important nao hem olsem: ‘Iu mas lovem narawan long sem wei wea iu lovem iuseleva.’”​—Matthew 22:37-​39.

Olketa nara law, hem for pipol wea obeyim Kingdom bilong God for stop for no duim samfala samting. Tingim diswan, Bible talem klia olsem: “No laea long iufala seleva. Olketa wea durong witim eniwan, and olketa wea worshipim idol, and olketa wea duim adultery, and olketa wea duim homosexual fasin, and olketa man wea durong witim nara man, and man for steal, and man wea greedy, and man wea savve drunk, and man wea tok againstim narafala man, and man wea forcem narawan for givim selen, bae no kasem kingdom bilong God.”​—1 Corinthians 6:​9, 10.

Hu nao olketa wea obeyim Kingdom bilong God?

Jesus markem olketa wea obeyim  Kingdom bilong God olsem olketa sheepsheep. Hem sei olsem: “Olketa bae herem voice bilong mi, and olketa bae kamap wanfala sekson, wanfala shepherd.” (John 10:16) For obeyim Kingdom bilong God, man mas no talem nomoa hem followim Gudfala Shepherd, Jesus, bat hem mas duim wanem hem talem tu. Jesus talem olsem: “No evriwan wea sei long mi, ‘Lord, Lord,’ bae go insaed long kingdom bilong God bat man wea duim wanem Dadi bilong mi long heven laekem nao, bae go insaed.”​—Matthew 7:​21.

Olketa wea obeyim Kingdom bilong God iusim and tinghae long nem bilong God, Jehovah, olsem Jesus tu duim. (John 17:26) Olketa obeyim komand bilong Jesus for lanem pipol “disfala gud nius abaotem kingdom.” (Matthew 24:14; 28:19, 20) And olketa garem trufala love for narawan.​—John 13:35.

“Finisim Olketa wea Spoelem Earth”

Olketa samting wea gohed for happen long earth distaem showimaot hao klosap nao Kingdom bilong God bae changem staka samting long disfala earth. Hao nao iumi savve diswan hem tru? Tu thousand year go finis, Jesus storyim wanfala saen abaotem olketa difren samting wea bae showimaot “hao kingdom bilong God hem kam klosap nao.” (Luke 21:31) Olsem iumi lukim finis long story bifor diswan, evri samting long datfala saen hem gohed for happen evriwea long world.

Wanem nao nextfala samting wea bae happen? Jesus ansa olsem: “Bae bigfala trabol kamap wea hem winim eni trabol wea happen start kam long taem world hem start, kam kasem distaem, and no eni trabol wea kam bihaen bae nogud olsem.” (Matthew 24:21) Disfala big trabol hem no samting wea olketa man nao bae duim. Bat hem samting wea God bae duim “for finisim olketa wea spoelem earth.” (Revelation 11:18) Olketa pipol wea nogud, wea selfish and barava spoelem earth “bae no stap long earth.” Bat olketa gudfala pipol nomoa, “bae stap.”​—Proverbs 2:​21, 22.

Hem stret for Jehovah duim datwan. Why nao olsem? Tingim diswan: Sapos iu garem wanfala big haos wea iu rentim for pipol stap. Samfala man wea olketa stap insaed, olketa barava gud tumas, olketa savve peim rent and lukaftarem gud. Bat samfala nating tingim narawan and olketa selfish, olketa no peim rent and olketa barava spoelem haos tu. Nomata olketa kasem staka warning finis, olketa gohed nomoa for duim rabis samting. Wanem nao bae iu duim? From iu nao ownim, iu bae aotem olketa man hia from haos bilong iu.

From Jehovah God nao wakem disfala earth and evri samting long hem, datwan minim hem fit for chusim hu nao hem laekem for stap long disfala earth. (Revelation 4:​11) Jehovah talemaot finis plan bilong hem for aotem from disfala earth evri rabis pipol wea nating followim wanem hem laekem and wea spoelem olketa nara pipol.​—Psalm 37:​9-11.

Paradaes Hem Kamap Moa

Klosap Kingdom bilong God wea Jesus Christ nao leadim bae rulim disfala earth. Jesus talem hao “God bae mekem evri samting niu moa.” (Matthew 19:28) Wanem kaen living nao bae stap long datfala taem? Tingim olketa Bible promis hia:

Psalm 46:9. “Hem bae finisim olketa war go kasem evriwea long earth.”

Isaiah 35:1. “Drae area and ples wea no garem wata bae singaot from olketa hapi, and olketa flat ples wea drae bae hapi and kamap naes olsem saffron flaoa.”

Isaiah 65:⁠21-23. “Pipol wea mi chusim bae  iusim wanem olketa seleva wakem. Olketa bae no hard waka nating, and no eni trabol bae kasem pikinini bilong olketa.”

John 5:​28, 29. “Iufala no sapraes long diswan, from taem bae kam wea evriwan wea God rememberim wea stap long grev bae herem voice bilong [Jesus] and kamaot.”

Revelation 21:4. “[God] bae aotem evri tias from eye bilong olketa, and no eniwan bae dae moa, and no eniwan bae sorre or krae or feel pain moa.”

Why Iumi Bilivim

Waswe, iu bilivim olketa promis long Bible? Bible talem hao staka bae no bilivim. Hem sei: “Long olketa last day pipol wea laek for tok spoelem samting bae kam . . . followim samting wea olketa seleva laekem and sei: ‘Mifala nating lukim yet taem wea hem promis for stap. Start long taem wea olketa laen dadi bilong iumi dae kam kasem distaem, evri samting gohed semsem from start bilong creation.’” (2 Peter 3:​3, 4) Bat olketa nogud man hia no garem stret tingting. Tingim fofala reason why iumi savve bilivim wanem Bible hem talem:

(1) God duim finis samting long disfala earth bifor. Wanfala big samting wea hem duim nao datfala Flood long taem bilong Noah.​—2 Peter 3:​5-7.

(2) Bible talem stret evri samting wea happen long world distaem.

(3) Evri samting no “gohed semsem from start bilong creation.” Living, wei bilong olketa man, and wei for spoelem environment no enitaem bifor mekem planet bilong iumi hem kamap nogud.

(4) Disfala “gud nius abaotem kingdom” hem kasem evriwea long earth. Datwan showimaot hao klosap nao “world bae finis.”​—Matthew 24:14.

Olketa Jehovah’s Witness laek studyim Bible witim iu mekem iu lane abaotem hope for laef olowe taem Kingdom bilong God hem rul. (John 17:3) Tru tumas, wanfala nambawan hope hem stap for iumi evriwan. Nambawan taem hia hem barava klosap nao! Waswe, iu tu bae stap long datfala taem?

[Blurb long page 7]

Olketa wea sei evri samting bae gohed semsem nomoa, olketa barava rong

[Piksa long page 8]

Waswe, iu tu bae stap long datfala taem?