Olketa Nogud Taem Distaem

BIBLE talem hao “olketa nogud samting bae kamap wea mekem laef no isi.” Bible storyim olketa taem hia olsem “olketa last day.” (2 Timothy 3:​1-5; 2 Peter 3:​3-7) Jesus Christ storyim olketa last day hia taem hem ansarem kwestin wea olketa disaepol askem abaotem wanem taem “world hem gogo for finis.” (Matthew 24:3) Waswe, iumi stap long olketa last day distaem? Markem wanem Bible talem finis witim olketa report long daon and iu savve disaed seleva.

Samting wea Bible talem: war bae kamap long full world​—Luke 21:10; Revelation 6:4.

Wanfala report no longtaem go nomoa sei:  “Pipol wea dae long olketa war insaed 100 year wea go pas, hem thrifala taem big winim haomas pipol wea dae long olketa war start kam long taem wea Jesus hem born.”​—Worldwatch Institute.

Samting wea Bible talem: no inaf kaikai and enikaen sik​—Luke 21:11; Revelation 6:​5-8.

Olketa report no longtaem go nomoa sei: Long 2004, samting olsem 863 million pipol no kaikai gud, wea hem 7 million big winim olketa wea no kaikai gud long 2003.​—United Nations Food and Agriculture Organization.

Samting olsem wan billion pipol no garem gudfala ples for stap; 2.6 billion pipol no garem gudfala ples for toilet or for torowem rabis; 1.1 billion pipol no garem klinfala wata for drinkim.​—Worldwatch Institute.

Malaria spoelem 500 million pipol; 40 million pipol garem HIV-AIDS; and long 2005, 1.6 million pipol dae from TB.​—World Health Organization.

Samting wea Bible talem: olketa bae spoelem earth​—Revelation 11:18.

Samfala report no longtaem go nomoa sei: “Olketa samting wea man duim long disfala earth mekem plande difren kaen animal gogo for finis. Olketa samting long disfala earth wea man depend long hem for stap laef hem gogo for finis tu.”​—Millennium Ecosystem Assessment.

“Olketa greenhouse gas wea olketa man mekem barava spoelem weather long earth gogo hem klosap spoelem earth tu.”​—NASA, Goddard Institute for Space Studies.

Samting wea Bible talem: olketa bae preachim gud nius abaotem Kingdom bilong God long evri ples​—Matthew 24:14; Revelation 14:​6, 7.

Samfala report no longtaem go nomoa sei: Long 2007, olketa 6,957,854 Jehovah’s Witness nao iusim winim 1.4 billion hour for talemaot gud nius abaotem Kingdom bilong God long 236 kantri.​—2008 Yearbook of Jehovah’s Witnesses.

Olsem iumi storyim finis, Bible talem hao nomata olketa nogud samting hia gohed for happen, wanfala waka for talemaot gud nius bae gohed tu. Jesus storyim “gud nius” abaotem Kingdom bilong God. Wanem nao Kingdom bilong God? Hao nao hem mekem olketa man for garem gudfala hope for taem wea bae kam? And wanem nao bae Kingdom bilong God duim for iu?

[Blurb long page 5]

Bible storyim finis olketa samting wea happen long world distaem