Samting wea Iumi Lanem From Jesus

For Gud Long Narawan

Why kaen long narawan?

Waswe, iu kaen long pipol wea no kaen long iu? Sapos iumi laek for followim wei bilong Jesus, iumi mas kaen long pipol wea heitim iumi tu. Jesus talem olsem: “Sapos iufala lovem nomoa olketa wea lovem iufala, bae no eniwan praisem iufala. Pipol wea sin tu lovem pipol wea lovem olketa. . . . Bat iufala mas lovem enemy bilong iufala . . . , and iufala bae olketa son bilong Barava Haefala God, bikos nomata olketa wea no savve sei thankiu and nogud pipol, God hem kaen long olketa tu.”​—Luke 6:​32-​36; 10:25-​37.

Why forgivim narawan?

KIumi laekem God for forgivim iumi taem iumi duim rong samting. Jesus lanem iumi, hem stret for iumi prea for God forgivim iumi. (Matthew 6:​12) Bat Jesus talem tu hao for God forgivim iumi, iumi mas forgivim narawan. Hem sei olsem: “Sapos iufala forgivim nara pipol wea sin againstim iufala, Dadi bilong iufala long heven bae forgivim iufala tu. Bat sapos iufala no forgivim nara pipol wea sin againstim iufala, Dadi bilong iufala bae no forgivim sin bilong iufala.”​—Matthew 6:14, 15.

 Waswe, famili savve hapi?

Nomata Jesus hem no marit, iumi savve lanem staka samting from hem long hao for famili savve hapi. Wanem hem talem and duim showim gudfala wei for iumi followim. Tingim thrifala point hia:

1. Hasband mas lovem waef olsem hem lovem body bilong hemseleva. Jesus showim wei for olketa hasband followim. Hem talem olketa disaepol olsem: “Mi givim niufala law long iufala for iufala lovem narawan.” Hao big nao datfala love? Hem sei: “Olsem mi lovem iufala.” (John 13:34) Followim datfala toktok, Bible talem olketa hasband for “gohed for lovem olketa waef bilong iufala, long sem wei wea Christ tu hem lovem kongregeson and givim laef bilong hem for datwan . . . Long disfala wei olketa hasband mas lovem waef bilong olketa olsem body bilong olketa seleva. Man wea lovem waef bilong hem lovem hemseleva, from no eni man heitim body bilong hemseleva; bat hem feedim and lukaftarem, olsem Christ hem duim long kongregeson.”​—Ephesians 5:25, 28, 29.

2. Hasband and waef mas faithful long tufala. Hasband or waef wea durong hem sin againstim God, and datwan savve spoelem plande famili. Jesus sei: “Hao, iufala no readim finis? . . . ‘Dastawe man bae lusim dadi and mami bilong hem, hem bae stap olowe witim waef bilong hem, and datfala man and woman bae kamap wanfala body nomoa.’ Diswan minim tufala hia no tufala body, bat wanfala nomoa. So no eni man mas aotem samting wea God joinim finis. . . . Bat eniwan wea lusim waef bilong hem and maritim narawan bae spoelem waef bilong hem bikos datwan hem adultery. Bat sapos waef hem durong, hem savve lusim hem.”​—Matthew 19:​4-9.

3. Pikinini mas obeyim dadi and mami. Jesus, wea no garem sin obeyim dadi and mami taem hem pikinini nomata tufala garem sin. Bible talem diswan abaotem Jesus taem hem 12 year nomoa: “Hem go bak long Nazareth witim [dadi and mami], and hem gohed for obeyim tufala.”​—Luke 2:​51; Ephesians 6:​1-3.

Why followim wanem Bible talem?

Fitim wanem Jesus lanem olketa disaepol, hem talem olketa olsem: “Sapos iufala savve long olketa samting hia, bae iufala hapi sapos iufala duim.” (John 13:17) Olketa tru Christian mas followim wanem Jesus talem abaotem hao for gud long narawan. Hem sei olsem: “Sapos iufala lovem narawan, evriwan bae savve iufala nao olketa disaepol bilong mi.”​—John 13:35.

For iu savve moa, lukim chapter 14 long buk Wanem Nao Really Samting wea Bible Teachim? *

[Footnote]

[Picture on page 28, 29]

Tokpiksa bilong Jesus abaotem boy wea weistim selen mekem iumi tingim hao hem important for kaen and forgivim narawan.​—Luke 15:11-​32

[Picture on page 29]

Hasband and waef shud faithful long tufala