Waswe, Hem Rong for Iusim Nem Bilong God?

LONG olketa Hebrew Scripture, datfala “Old Testament,” nem bilong God hem kamap samting olsem 7,000 taem. Olketa raetem olsem יהוה (readim from raet go for left). Datwan showimaot nem bilong God hem garem fofala leta wea hem nao Yohdh, He, Waw, and He, wea olketa transleitim olsem YHWH.

Long bifor kam, olketa Jew garem rong tingting hao hem no stret for iusim nem bilong God. From datwan, olketa no talemaot or iusim nao datfala nem and olketa start for raetem olketa difren word for nem bilong God. Nomata olsem, staka wea transleitim Bible iusim “Yahweh,” or “Jehovah” long transleison bilong olketa. Wanfala long olketa transleison hia nao hem Catholic Jerusalem Bible. Long datfala transleison, taem Moses askem God wanem nao hem bae talem for olketa Israelite sapos olketa askem hem hu nao sendem hem, God talem Moses olsem: “Iu mas talem long olketa son bilong Israel: ‘Yahweh, God bilong olketa laen dadi bilong iufala, God bilong Abraham, God bilong Isaac and God bilong Jacob, hem sendem mi kam long iufala.’ Diswan nao hem nem bilong mi for olowe; and diswan nao mekem evri genereson rememberim mi.”​—Exodus 3:​15.

Taem Jesus prea, hemseleva talem olsem abaotem nem bilong God: “Mi talemaot nem bilong iu long olketa and mi bae gohed for talemaot.” Long datfala Lord’s prea, Jesus sei: “Dadi bilong mifala long heven, mifala laekem nem bilong iu for stap holy.”​—John 17:26; Matthew 6:9.

From datwan, maet iu sapraes for savve hao long buk Jesus of Nazareth, wea Pope Benedict XVI raetem no longtaem go nomoa hem talem olsem abaotem wei for iusim nem bilong God: “Hem stret nomoa for olketa Israelite no iusim nem wea God seleva markem, disfala YHWH, mekem nem bilong God no kamap olsem nem bilong olketa heathen god. Diswan showimaot hao samfala Bible transleison distaem olketa rong for iusim datfala nem olsem nem nating nomoa, datfala nem wea olketa Israelite hard for minim and no fit for talemaot.”

Wanem nao tingting bilong iu? Hem stret for iusim nem bilong God or nomoa? Sapos Jehovah sei: “Diswan nao hem nem bilong mi for olowe; and diswan nao mekem evri genereson rememberim mi,” waswe, fitim eniwan for againstim samting wea God talem?

[Picture on page 31]

Jesus iusim nem bilong God taem hem prea