Waswe, Plan Bilong Iu Fitim Plan Bilong God?

CLARK’S nutcracker hem wanfala gray and white bird wea flae long bush long western North America. Evri year for mek redi for cold taem, hem savve hipimap samting olsem 33,000 seed and keepim olketa long samting olsem 2,500 didifren ples. Tru nao, wei wea disfala bird hem mek redi for taem wea bae kam hem showimaot ‘savve wea hem born kam witim.’​—Proverbs 30:24.

Man savve duim samting wea winim go moa datwan. Long evri samting wea Jehovah wakem long earth, man nao garem wei for lane from olketa mistek wea hem duim and mekem olketa plan for mek redi for taem wea bae kam. King Solomon wea garem savve hem talem olsem: “Man savve tingim staka plan.”​—Proverbs 19:21.

Nomata olsem, plande taem man mekem plan followim nomoa samting wea olketa tingse bae happen. Tingim diswan, taem iu mekem plan for tumoro, iu tingse sun bae kamap and iu bae lukim. Tru, sun bae kamap tumoro, bat iu no barava savve sapos iu bae lukim. James, wanfala wea raetem Bible talem disfala tru toktok: “Iufala no savve wanem bae happen long iufala tumoro.”​—James 4:​13, 14.

Jehovah God no garem problem olsem. Hem savve “talem firstaem samting wea bae happen.” No eni samting savve stopem plan wea hem talemaot for kamap tru. Hemseleva talem: “Plan bilong mi bae kamap tru, and mi bae duim evri samting wea mi laek for duim.” (Isaiah 46:10) Wanem nao savve happen taem plan bilong man no fitim plan bilong God?

Taem Olketa Plan Bilong Man No Fitim Plan Bilong God

Samting olsem 4,000 year go finis, olketa wea buildim Taoa long Babel mekem plan for stopem pipol for go aot long olketa didifren ples. Olketa sei, “Kam! Letem iumi buildim wanfala taon and wanfala taoa for kasem skae, and letem iumi mekem bigfala nem for iumiseleva, nogud iumi go aot long olketa didifren ples long earth.”​—Genesis 11:4.

Bat plan bilong God for disfala earth hem barava difren. Hem talem Noah and olketa  pikinini bilong hem finis for: “Garem pikinini and kamap staka and fulimap earth.” (Genesis 9:1) Wanem nao God duim abaotem olketa plan bilong olketa bighed pipol long Babel? Hem mekem olketa for story long didifren languis, mekem olketa no story tugeta. Wanem nao happen? “Jehovah hem mekem olketa go aot from there kasem evri difren ples long earth.” (Genesis 11:​5-8) Olketa wea buildim Babel lanem wanfala big samting. Taem plan bilong man and plan bilong God difren, “toktok bilong Jehovah nao bae kamap tru.” (Proverbs 19:21) Waswe, kaen samting olsem wea happen bifor savve stretem tingting bilong iu?

Krangge Tingting Bilong Wanfala Rich Man

Maet iu no plan for buildim wanfala taoa olsem, bat plande pipol distaem plan for hipimap staka selen and staka material samting, mekem taem olketa olo olketa savve stap gud. Hem stret nomoa for iu laek hapi long wanem iu waka hard for kasem. Solomon hem raet olsem: “Evri man shud kaikai and drink and hapi long olketa gudfala samting wea hem waka hard for kasem. Hem nao present wea God givim.”​—Ecclesiastes 3:​13.

Iumi mas ansa long Jehovah long hao iumi iusim datfala present. Klosap 2,000 year go finis, Jesus iusim wanfala tokpiksa for mekhae long datwan long olketa disaepol bilong hem. Hem sei olsem: “Olketa garden long land bilong wanfala rich man hem garem staka kaikai. So hem start for tingting olsem, ‘Wanem nao bae mi duim, from mi no garem eni ples moa for putim olketa kaikai bilong mi?’ So hem sei, ‘Bae mi duim diswan: Bae mi aotem olketa stoahaos and buildim samfala wea moa big, and long there nao mi bae hipimap evri kaikai and gudfala samting bilong mi; and mi bae sei long soul bilong mi: “Soul, iu garem plande gudfala samting for mekem iu stap gud for plande year; garem isi living, kaikai, drink, and stap hapi nao.” ’ ” (Luke 12:16-​19) Samting wea datfala rich man talem hem here gud or nomoa? Olsem datfala Clark’s nutcracker bird wea iumi storyim finis, datfala man long tokpiksa tu mek redi for taem wea bae kam.

Bat tingting bilong man hia hem no stret. Jesus gohed for talem: “Bat God sei long hem, ‘Iu no garem stretfala tingting, long disfala naet bae iu lusim soul bilong iu. So hu nao bae kasem evri samting wea iu hipimap?’” (Luke 12:20) Waswe, samting wea Jesus talem hem againstim wanem Solomon talem abaotem hao waka and gud samting wea iu kasem hem present from God? Nomoa. Sapos olsem, wanem nao Jesus laek for talem? Jesus talem hao: “Bae hem semsem tu long man wea hipimap plande richfala  samting for hemseleva bat long tingting bilong God hem no rich.”​—Luke 12:21.

Jesus lanem olketa wea herehere long hem hao iumi mas tingim plan bilong Jehovah taem iumi mekem plan bilong iumi. Datfala rich man fit for mekem strong go moa wei wea hem fren witim God and for garem bigfala savve and love. Toktok bilong man hia showaot hem no interest long kaen samting olsem, and hem no interest for leavim eni kaikai for olketa wea poor, or for givim eni present long Jehovah. Datfala rich man nating interest for aftarem olketa gudfala samting wea God laekem hem for duim. Hem mekem olketa plan fitim wanem hemseleva tingim and laekem.

Waswe, iu lukim hao staka pipol distaem garem semkaen tingting olsem datfala rich man wea Jesus storyim? Nomata iumi garem plande samting or nomoa, hem isi tumas for aftarem olketa material samting gogo iumi no tinghae long wei wea iumi fren witim God. Wanem nao iu savve duim for no garem datfala problem?

Mekem Plan Olsem Olketa Narawan

Maet iu no rich olsem datfala man long tokpiksa bilong Jesus. Bat sapos iu marit, maet iu plan for lukaftarem famili bilong iu, and sapos fitim, for olketa pikinini bilong iu skul. Sapos iu no marit, maet iu plan for garem waka or gohed for waka long ples wea iu waka distaem, mekem iu no putim hevi long olketa narawan. Olketa plan olsem gud nomoa.​—2 Thessalonians 3:​10-​12; 1 Timothy 5:8.

Bat wei for duim wanem olketa narawan duim, olsem waka, kaikai, and drink savve kamap samting wea God no laekem. Hao nao olsem? Jesus hem sei: “Olketa samting wea happen long taem bilong Noah bae happen tu long taem wea Son bilong man hem stap. Bifor flood hem kam, pipol gohed for kaikai, drink, and marit go kasem taem wea Noah go insaed long ark. Olketa nating tinghae long samting wea Noah talemaot, gogo flood hem kam nomoa and evriwan draon nao. Taem wea Son bilong man hem stap bae hem olsem tu.”​—Matthew 24:37-​39.

Bifor long Flood, pipol tingse wei for duim wanem olketa narawan duim nao hem stret. Bat kaen tingting olsem hem no stret from olketa “nating tinghae” long plan bilong God for finisim datfala rabis world long wanfala Flood. Maet long tingting bilong olketa, wei bilong Noah nao difren tumas from wanem olketa narawan duim. Bat taem Flood kam, wei bilong Noah and famili bilong hem nao showimaot stretfala savve.

Staka samting distaem showimaot iumi stap long olketa last day. (Matthew 24:​3-​12; 2 Timothy 3:​1-5) Klosap nao Kingdom bilong God bae “smasem and finisim” world wea stap distaem. (Daniel 2:​44) Earth bae change for kamap wanfala paradaes taem datfala Kingdom rulim disfala earth. Datfala Kingdom bae finisim sik and dae. (Isaiah 33:24; Revelation 21:​3-5) Evri samting wea laef long earth bae stap gud tugeta and no eniwan bae hangre.​—Psalm 72:16; Isaiah 11:​6-9.

Bifor Jehovah duim datwan, hem mekem plan for gud nius abaotem Kingdom bilong hem for kasem “evri ples long world mekem pipol long evri kantri mas herem.” (Matthew 24:14) Fitim plan bilong God, samting olsem seven million Witness bilong Jehovah preachim disfala gud nius long 236 kantri and long winim foa handred languis.

Long tingting bilong pipol, maet wei bilong Olketa Jehovah Witness nao difren tumas. (2 Peter 3:​3, 4) Olsem pipol wea stap bifor long Flood, staka pipol distaem tu gohed for duim nomoa wanem olketa laek duim evriday. Olketa tingse eniwan wea no garem wei olsem olketa narawan, olketa nao no garem gudfala tingting. Bat long tingting bilong olketa wea garem faith long wanem God promisim, wei for worshipim God nao hem stret samting for duim.

So, nomata iu garem staka samting, lelebet samting or inaf samting nomoa, hem gud for samfala taem iu ting raonem plan bilong iu for taem wea bae kam. Taem iu duim olsem, askem iuseleva disfala kwestin, ‘Waswe, plan bilong mi fitim plan bilong God?’

[Piksa long Page 9]

Taem plan bilong man and plan bilong God difren, toktok bilong Jehovah nao bae kamap tru

[Piksa long Page 10]

Datfala rich man long tokpiksa bilong Jesus no tinghae long plan bilong God taem hem mekem plan bilong hem