The New Encyclopædia Britannica (1988), Volume 11, page 25, hem sei: “Samfala Christian bifor kam acceptim idea bilong olketa long Greece wea sei soul no savve dae, and olketa tingse God nao wakem soul and putim datwan insaed body taem mami babule.”

“Datfala soul wea sin, hem bae dae.”​—⁠Ezekiel 18:​4, King James Version.

Taem God creatim firstfala soul, Bible hem sei: “Jehovah God hem tekem dust from graon and wakem wanfala man and hem blowim wind bilong laef go insaed long nose bilong hem, and datfala man hem kamap wanfala soul [Hebrew, neʹphesh] wea laef.”​—⁠Genesis 2:⁠7.

Disfala Hebrew word neʹphesh, wea olketa transleitim “soul” hem minim ‘samting wea brith.’ Taem God wakem firstfala man Adam, Hem no putim soul wea no savve dae insaed long hem, bat Hem givim paoa bilong laef and hem mas brith for gohed laef. Dastawe, taem Bible storyim “soul,” datwan minim man or animal wea laef. Sapos datfala paoa bilong laef wea God givim hem go aot from man, then datfala soul hem dae nao.​—⁠Genesis 3:​19; Ezekiel 18:⁠20.

Teaching abaotem soul wea no savve dae hem mekem samfala kwestin for kamap: Wea nao olketa soul go taem olketa dae? Wanem nao happen long olketa soul bilong olketa nogud pipol? Pipol wea sei olketa Christian acceptim kastom biliv wea sei soul no savve dae, and diswan lead go for olketa acceptim nara kastom biliv, hem nao teaching abaotem hellfire.

Lukim olketa scripture hia: Ecclesiastes 3:​19; Matthew 10:28; Acts 3:​23