Bihaen olketa aposol bilong Jesus dae, olketa Father bilong Church nao kasem paoa long start bilong mek-tu century C.E. New Catholic Encyclopedia (2003), Volume 6, page 687, storyim teaching bilong olketa Father bilong Church hia olsem: “Main samting wea olketa teachim, hem hao soul savve lusim body taem man dae and go long heven bihaen hem kamap klin.”

“Olketa wea hambol bae hapi, bikos God bae givim earth long olketa.”​—⁠Matthew 5:⁠5.

Nomata Jesus promisim olketa disaepol bilong hem hao hem bae “redyim ples” for olketa long heven, hem no talem evriwan wea raeteous bae go long there. (John 3:​13; 14:​2, 3) Jesus hem prea for God duim samting wea hem plan for duim ‘long earth, long sem wei wea hem duim datwan long heven.’ (Matthew 6:​9, 10) Tru samting nao, tufala hope stap for olketa wea raeteous. Smolfala sekson bae rul witim Christ long heven, bat bigfala sekson bae stap long earth for olowe.​—⁠Revelation 5:​10.

Gogo, firstfala church changem idea abaotem wanem olketa shud duim long earth. Wanem nao happen bihaen? The New Encyclopædia Britannica hem talem, “gogo olketa bigman bilong church tingse church nao changem Kingdom bilong God.” Olketa bigman bilong church start for join insaed politik for strongim paoa bilong olketa. Jesus barava talem stret, olketa wea followim hem mas “no olsem pipol long world,” bat olketa bigman hia no laek for followim. (John 15:19; 17:​14-​16; 18:36) Constantine wea rulim Rome, hem mekem olketa bigman bilong church for changem samfala biliv bilong olketa, wea wanfala nao hem abaotem hu nao God.

Lukim olketa scripture hia: Psalm 37:​10, 11, 29; John 17:3; 2 Timothy 2:​11, 12