“Luk olsem church teaching abaotem Trinity, hem start long end bilong mek-foa century. Diswan hem tru . . . Disfala teaching ‘wanfala God insaed thrifala Man’ hem no garem strongfala pruv, and olketa Christian no acceptim or bilivim bifor end bilong mek-foa century.”​—⁠New Catholic Encyclopedia (1967), Volume 14, page 299.

“Meeting bilong Council long Nicaea, hem kamap long May 20, 325 [C.E.]. Constantine nao hem chairman long datfala meeting. Hemseleva nao main wan wea talem and storyim idea . . . wea sei, God and Christ tufala wan nomoa. Datfala council raetem disfala biliv olsem teaching bilong church long datfala taem. . . . From olketa bishop fraet long Constantine, olketa saenem nao pepa abaotem datfala teaching nomata olketa no laek for duim. Tufala nomoa no saenem.”​—⁠Encyclopædia Britannica (1970), Volume 6, page 386.

“God givim holy spirit long Stephen. Hem luk go ap long skae, and hem lukim God hem shaen braet tumas and Jesus hem standap long raet saed bilong God. Hem sei: ‘Mi lukim skae hem open and Son bilong man hem standap long raet saed bilong God.’”​—⁠Acts 7:​55, 56.

Wanem nao disfala vision showimaot? From Stephen garem holy spirit bilong God, hem lukim Jesus “standap long raet saed bilong God.” Tru tumas, Jesus no kamap God bihaen hem laef bak long heven, bat hem wanfala spirit wea difren from God. Disfala scripture no storyim mek-thri man witim God. Nomata olketa trae hard for faendem eni scripture for sapotim datfala idea abaotem Trinity, wanfala Dominican priest, Marie-Émile Boismard hem talem olsem long buk wea hem raetem: “Toktok wea sei thrifala man insaed wanfala God . . . hem no stap insaed long Niu Testament.”​—⁠À l’aube du christianisme​—⁠La naissance des dogmes (At the Dawn of Christianity​—⁠The Birth of Dogmas)

Teaching wea Constantine mekhae long hem, hem for stretem raoa wea kamap insaed Church long mek-foa century. Bat diswan hem mekem nara kwestin for kamap: Waswe, Mary wea bornem Jesus, hem “Mami bilong God”?

Lukim olketa scripture hia: Matthew 26:39; John 14:28; 1 Corinthians 15:​27, 28; Colossians 1:​15, 16