“Wei for mekhae long mami bilong God hem kamap moa big taem . . . staka heathen pipol joinim church. . . . [Olketa heathen wea joinim Christian religion] biliv for staka thousand year finis long wanfala ‘nambawan mami’ god and ‘virgin god.’”​—⁠The New Encyclopædia Britannica (1988), Volume 16, page 326 and 327.

“Bae iu babule and bornem wanfala baby boy and iu mas nemim hem Jesus. Hem bae kamap wanfala barava important man and olketa bae kolem hem Son bilong Barava Haefala God. . . . Datfala pikinini wea born bae hem holy and olketa bae kolem hem Son bilong God.”​—⁠Luke 1:​31-​35.

Datfala scripture talem stret hao Mary hem no mami bilong God bat hem mami bilong “Son bilong God.” Waswe, Mary savve karem insaed bele bilong hem, Datwan wea nomata ‘heven no big fitim Hem’? (1 Kings 8:​27) No enitaem Mary talem eni samting olsem. Datfala teaching abaotem Trinity nao mekem staka konfius abaotem hu nao Mary. Long 431 C.E., Council long Ephesus kolem Mary Theotokos (Greek word wea minim “Mami bilong God”), and datwan nao mekem wei for worshipim Mary kamap. For staka handred year finis, datfala taon long Ephesus wea disfala church council garem meeting long hem, hem main ples wea olketa worshipim datfala idol bilong Artemis, wea hem woman god for garem pikinini.

So olketa wei for worshipim Artemis wea “foldaon kam from skae,” gogo hem kamap wei for worshipim Mary. Wanfala nao hem wei for march witim image. (Acts 19:35) Nara samting wea olketa duim wea isisi kam insaed Christian teaching nao hem wei for iusim image bilong Mary and olketa nara image long worship.

Lukim olketa scripture hia: Matthew 13:​53-​56; Mark 3:​31-​35; Luke 11:​27, 28