SHEM, son bilong Noah, stap laef taem wanfala world hem finis and gohed laef tu long nara world. Waswe, iu savve why nao firstfala world wea Shem stap hem finis and hao hem and famili bilong hem fit for stap laef long mek-tu world?​—⁠ * Iumi storyim diswan.

Bible hem sei hao taem Shem hem young, “wei bilong pipol long earth hem barava nogud tumas.” Evri samting wea olketa tingim “hem nogud olowe.” So waswe, iu savve wanem nao God duim?​—⁠ Hem mekem flood for finisim datfala nogud world. Aposol Peter sei: “World long datfala taem hem finis taem bigfala wata kavarem.”​—⁠Genesis 6:5; 2 Peter 3:⁠6.

Waswe, iu savve why nao God finisim world long datfala taem?​—⁠ Hem from pipol barava nogud and olketa tingim samting wea “hem nogud olowe.” Jesus hem storyim diswan. Hem sei pipol gohed for enjoyim laef and “bifor flood hem kam, pipol gohed for kaikai, drink, and marit.” Jesus talem moa hao “olketa nating tinghae long samting wea Noah talemaot, gogo flood hem kam nomoa and evriwan draon nao.”​—⁠Matthew 24:​37-​39.

Wanem nao pipol long datfala taem nating tinghae or savve long hem?​—⁠ Dadi bilong Shem, Noah, “hem wanfala man wea preach abaotem olketa stretfala samting,” bat pipol nating herem wanem hem talem. Noah lisin long wanem God talem and wakem ark, wea datwan mekem famili bilong hem for stap sef long taem bilong Flood. Noah and waef bilong hem, and olketa son bilong tufala, Shem, Ham, and Japheth, and olketa waef bilong olketa nomoa, tinghae long wanem God laekem olketa for duim. Olketa narawan duim nomoa wanem olketa laek for duim, dastawe olketa draon long Flood.​—⁠2 Peter 2:5; 1 Peter 3:​20.

Klosap wanfala year bihaen Flood hem start, Shem and famili bilong hem kamaot from datfala ark and standap long drae graon. Evri nogud pipol finis nao, bat gogo nara samting hem happen. Canaan, pikinini bilong Ham wea hem brata bilong Shem, duim samting wea barava nogud. Dastawe Noah sei: “Canaan bae kasem trabol.” Nimrod wea hem granson bilong Ham, hem barava nogud tu. Hem againstim trufala God, Jehovah. Hem talem pipol for wakem  haefala taoa wea nem bilong hem Babel. Datwan hem for mekem pipol tinghae long olketa. Iu tingse Shem and dadi bilong hem feel hao?​—⁠Genesis 9:​25; 10:​6-​10; 11:​4, 5.

Tufala feel sorre, and Jehovah tu. Iu savve wanem nao Jehovah duim?​—⁠ Hem mekem pipol for toktok long olketa difren languis wea mekem olketa for konfius and no minim narawan. Datwan mekem pipol stop for wakem datfala taoa and go stap long olketa difren ples witim evriwan wea story long sem languis. (Genesis 11:​6-9) Bat God no changem languis bilong Shem and famili bilong hem. Datwan mekem olketa fit for stap tugeta and helpem olketa for servem God. Waswe, iu savve hao long nao Shem servem Jehovah?​—⁠

Shem stap laef for 600 year. Hem 98 year taem Flood kam and bihaen Flood hem stap laef for 502 year moa. Iumi sure hem helpem Noah wakem ark and warnim pipol tu abaotem Flood. Bat wanem nao iu tingse Shem duim insaed winim 500 year wea hem stap laef bihaen Flood?​—⁠ Noah talem hao Jehovah hem “God bilong Shem.” Luk olsem Shem gohed for servem Jehovah and helpem famili bilong hem tu for duim sem samting. Abraham, Sarah, and Isaac kam from famili laen bilong Shem.​—⁠Genesis 9:​26; 11:​10-​31; 21:​1-3.

Tingim world wea iumi stap long hem distaem. Start long taem bilong Shem kam kasem distaem, hem gohed for barava nogud. Wanem nao bae happen long disfala world?​—⁠ Bible sei hem “gogo for finis.” Bat tingim disfala promis: “Man wea duim wanem God laekem bae stap for olowe.” So sapos iumi duim wanem God laekem, iumi bae stap laef long niu world bilong God. Then, God bae helpem iumi for stap hapi olowe long disfala earth!​—⁠1 John 2:​17; Psalm 37:29; Isaiah 65:⁠17.