APOSOL Paul talem olketa Christian wea stap long end long first century C.E.: “Iufala mas lukaot gud.” Wanem nao hem warnim olketa abaotem? “Maet samwan trikim iufala witim tingting bilong man and olketa laea story wea followim olketa kastom from bifor kam.”​—⁠Colossians 2:⁠8.

Nomata Paul warnim olketa olsem, samfala Christian long midol long mek-tu century C.E., start for iusim olketa idea wea kam from olketa man bifor kam for explainim biliv bilong olketa. Why nao olsem? Olketa laekem pipol wea skul gud long olketa ples wea Rome rulim for acceptim olketa and for changem biliv bilong olketa.

Justin Martyr nao wanfala Christian hia wea staka savve long hem. Hem bilivim wanfala kastom story bilong Greece wea sei, wanfala man wea toktok for God hem kam finis longfala taem bifor Jesus hem kam. Justin and olketa wea teachim semkaen tingting talem sapos olketa joinim samfala idea bilong olketa man and samfala kastom biliv, datwan bae mekem evriwan laekem Christian religion.

Staka pipol willing for change and acceptim teaching bilong Justin Martyr. Bat wei for acceptim wanfala kastom biliv hem lead go long narawan. Gogo, datwan nao kamap olsem biliv wea pipol tingse hem Christian teaching. Iumi bae markem wanem olketa nara buk talem witim wanem Bible barava teachim for showimaot sapos olketa kastom biliv hem tru.