Waswe, Olketa Christian Savve Sapotim War?

“Waswe, eni law hem sei war hem samting wea no stret or hem wanfala sin? Disfala kwestin mekem pipol barava konfius.” ​—⁠Oliver O’Donovan, wea hem teach abaotem religion

W ANFALA piksa wea olketa kolem Sakrifaes, hem stap long Canadian War Museum. Olketa samting wea happen long World War I nao hem insaed datfala piksa. Olketa soldia wea olketa killim dae, olketa soldia wea taed wea kam bak from datfala war, and famili bilong olketa wea stap long hom. Insaed long disfala sem piksa, piksa bilong Jesus Christ wea olketa nilam hem long cross tu hem stap. Samfala wea lukim disfala piksa abaotem war wea olketa killim dae staka pipol barava seke for lukim piksa bilong Jesus, wea hem datfala “Prince bilong Peace,” insaed disfala piksa tu. (Isaiah 9:⁠6) Olketa narawan tinghae long olketa wea go for faet and dae for kantri bilong olketa. Long tingting bilong olketa, God and Son bilong hem laekem olketa Christian for joinim war for protectim and mekem kantri bilong olketa free.

For staka handred year, olketa bigman bilong religion sapotim war. Long year 417 C.E., Augustine wanfala savveman long church hem sei olsem: “God acceptim olketa wea joinim war and tu olketa narawan wea prea for olketa winim enemy.” Long mek-13 century, Thomas Aquinas hem sei “olketa war hem olraet and stret sapos hem protectim olketa wea poor and full kantri from olketa nogud enemy.”

Hao nao tingting bilong iu? Taem army hem faet for wanfala samting wea luk olsem hem stret, olsem for protectim kantri and pipol wea safa, waswe, bae God blessim datwan? Waswe, olketa Christian garem eni “law” for luksavve long tingting bilong God abaotem diswan?

Example wea Jesus Christ Showimaot

Waswe, iumi fit for savve long tingting bilong God abaotem olketa war wea gohed distaem? Aposol Paul hem sei: “‘Hu nao savve long tingting bilong Jehovah, mekem hem savve teachim hem?’ Bat iumi garem nao tingting bilong Christ.” (1 Corinthians 2:​16) Jehovah God sendem Jesus for kam long earth for helpem iumi and for iumi followim example bilong Jesus. Samting wea Jesus duim and talem hem showimaot tingting and wei bilong Jehovah. Sapos olsem, wanem nao Jesus talem abaotem war? Waswe, hem sapotim war?

Samfala maet tingse barava important samting nao hem for faet for protectim Jesus Christ. Wanfala aposol bilong hem tu ting olsem. Taem olketa givim go Jesus long enemy and datfala raf sekson wea holem samting for faet arrestim hem long midolnaet, fren bilong hem Peter “tekem naef bilong hem for faet and katemaot ear bilong wakaman bilong hae priest.” Waswe, Peter duim stret samting taem hem duim olsem? Jesus sei long Peter: “Iu no duim olsem. Leavim naef ia. Eniwan wea iusim naef for  killim dae narawan, bae olketa iusim naef for killim hem dae tu.”​—⁠Matthew 26:​47-​52.

Iumi no sapraes long wanem Jesus duim. Tufala year bifor, hem sei: “Iufala herem hao olketa sei, ‘Iu mas lovem olketa wea lovem iu, and heitim enemy bilong iu.’ Bat mi talem iufala distaem for gohed lovem olketa enemy bilong iufala and for prea for olketa wea spoelem iufala. Diswan bae showimaot iufala nao olketa son bilong Dadi bilong iufala long heven, from hem mekem sun hem shaen long pipol wea gud and pipol wea nogud and hem mekem hem rain long pipol wea obeyim God and wea no obeyim God.” (Matthew 5:​43-​45) So waswe, hem stret for sei wanfala Christian savve lovem and prea for olketa enemy bilong hem and long semtaem hem go faet long war againstim olketa?

Olketa samting wea happen finis showimaot olketa Christian garem staka enemy. Tingim diswan. Olketa bilong Rome judgem Jesus Christ and killim hem dae. Bihaen datwan, nomata for talem nomoa iu wanfala Christian, datwan hem againstim law and olketa savve killim iu dae. Jesus luksavve maet olketa Christian kasem test for iusim olketa samting for faet againstim olketa long Rome bikos olketa raf tumas, and hem nao samting wea samfala Jew duim finis. Dastawe, hem sei long olketa disaepol bilong hem: “Olketa no olsem pipol long world, olsem mi tu no olsem pipol long world.” (John 17:16) Olketa Christian chus for no teksaed long politik. Nomata nogud samting kasem olketa or laef bilong olketa stap long danger and sem samting kasem kantri wea olketa stap, datwan no savve mekem olketa Christian joinim army for faet.

Olketa wea Barava Sapotim Kingdom Bilong God

Olketa trufala Christian followim samting wea Jesus talem and no teksaed. Tingim disfala samting wea happen long Iconium, wanfala taon long Asia Minor bifor: “Olketa Jew and olketa bigman bilong olketa witim olketa wea no Jew, olketa laek for spoelem Paul and Barnabas and for sutim tufala long ston. Taem tufala savve abaotem diswan, tufala ranawe go long olketa taon long Lycaonia, wea hem nao Lystra and Derbe, and olketa area raonem tufala taon hia. Long there tufala gohed for talemaot gud nius.” (Acts 14:​5-7) Tingim datfala samting wea happen. Taem pipol barava againstim olketa Christian long datfala taem, olketa no iusim samting for faet for protectim olketa seleva and no pei  bak. Bat olketa gohed for preachim “gud nius.” Wanem nao gud nius wea olketa talemaot?

Olketa Christian talemaot sem message wea Jesus talemaot long bifor. Hem sei: “Mi mas talemaot gud nius abaotem kingdom bilong God.” (Luke 4:​43) Jesus and olketa wea followim hem barava sapotim Kingdom bilong God. Christ hem nating iusim army bilong eni kantri for protectim datfala Kingdom. Hem sei: “Kingdom bilong mi hem no bilong disfala world. Sapos hem bilong disfala world, hard for olketa disaepol bilong mi letem olketa Jew kam tekem mi. Bat kingdom bilong mi hem no bilong disfala world.”​—⁠John 18:⁠36.

“Lovem Iufala Evriwan”

Long taem bilong war, olketa wea followim trufala worship olketa no sapotim war. Jesus sei: “Sapos iufala lovem iufala evriwan, pipol bae savve iufala olketa disaepol bilong mi.” (John 13:35) Staka million pipol hapi tumas for lukim wanfala sekson wea showimaot diskaen love. Olketa nating willing for iusim samting for faet, nomata datwan mekem pipol tok spoelem olketa, putim olketa long prison, or killim olketa dae.

Taem Nazi army hem kontrolem Europe, olketa putim samting olsem 10,000 Jehovah’s Witness long prison bikos olketa followim Christ and no sapotim war. Olketa putim 3,000 long olketa hia insaed long olketa barava raf prison. Long semtaem, long America, olketa putim long prison winim 4,300 Witness wea no willing for sapotim war. No eni Witness long Germany and America iusim olketa samting for faet againstim olketa Christian brata bilong olketa or eni narawan moa. Hard tumas for olketa iusim samting for faet and long semtaem olketa sei olketa lovem evriwan!

Staka pipol tingse olketa mas iusim army for protectim olketa. Bat tingim diswan. Long first century olketa barava spoelem olketa Christian, bat olketa no faet bak. Nomata olsem, olketa no finisim olketa. Rul bilong Rome wea barava strong hem no fit for finisim olketa Christian. Olketa trufala Christian gohed strong distaem and gohed tu for no sapotim war. Olketa no faet bak, bat olketa barava trustim God for helpem olketa. Bible sei: “Olketa fren bilong mi, iufala no pei bak or showimaot kros bilong iufala seleva, bikos olketa Holy Raeting talem finis: “Mi nao bae pei bak, Jehovah hem talem.’”​—⁠Romans 12:⁠19.

[Box long page 14]

OLKETA WAR WEA GOD BLESSIM

God chusim Israel olsem spesol pipol bilong hem staka handred year bifor eniwan followim Christ. Samfala taem hem talem olketa for mekem army and for faet long war. Bifor olketa Israelite go long Canaan, wea hem land wea God promisim long Abraham, Moses sei long olketa: “God bilong iufala Jehovah bae givim [sevenfala kantri] long iufala, and iufala mas winim olketa. Iufala mas barava finisim olketa. Iufala mas no mekem eni agreement witim olketa and no favorim olketa.” (Deuteronomy 7:​1, 2) Dastawe, Joshua wea hem leader bilong Israel, hem winim evri kantri hia “olsem God bilong Israel, Jehovah hem talem finis.”​—⁠Joshua 10:⁠40.

Waswe, Israel hem raf tumas and selfish for tekem land bilong pipol long nara kantri? Barava nomoa nao. Pipol long olketa kantri hia worshipim staka idol, killim dae staka pipol, and durong long enikaen nogud wei. Olketa pikinini tu olketa bonem long fire for sakrifaesim olketa. (Numbers 33:52; Jeremiah 7:​31) God mas aotem evri dirty samting from datfala land bikos hem holy, hem duim stretfala samting evritaem, and hem lovem pipol bilong hem. Long semtaem, Jehovah lukim heart bilong evriwan and sevem olketa wea willing for lusim rabis wei and duim samting wea hem laekem. Datwan nao samting wea no eni komanda bilong army savve duim distaem.

[Piksa long page 15]

Waswe, Jesus laekem olketa wea followim hem for faet for protectim hem and olketa nara Christian?

[Piksa long page 15]

Wanfala grup bilong Olketa Jehovah’s Witness taem olketa kamaot from datfala raf prison long Buchenwald long 1945