Samting Iumi Lanem From Jesus

Abaotem Trufala Worship

Waswe, God hapi long evri wei for worship?

▪ Jesus barava sorre long pipol wea false religion laea long olketa. Hem storyim olketa “laea profet wea olsem olketa wild dog, bat wea talem and duim olketa samting for mekem pipol tingse olketa hambol and kaen olsem wanfala sheepsheep.” (Matthew 7:​15) Waswe, iu lukim pipol mekius long religion for duim olketa nogud samting?

Jesus tok olsem taem hem prea long God: ‘Toktok bilong iu hem tru.’ (John 17:17) Datwan showimaot God no hapi long worship wea no agree witim tru samting wea stap long Bible. Dastawe, Jesus talem toktok from Bible long olketa bigman bilong religion wea laek holy tumas olsem: “Olketa hard waka nating for worshipim mi bikos olketa sei olketa law bilong man hem teaching wea kam from God.”​—⁠Matthew 15:⁠9.

Waswe, eni tru religion hem stap?

▪ Taem Jesus meetim wanfala woman long Samaria wea false religion laea long hem, Jesus sei long hem: “Iufala no savve hu nao iufala worshipim . . . Olketa wea worshipim God long stretfala wei bae worshipim hem followim holy spirit and followim samting wea tru. God lukaotem kaen pipol olsem for worshipim hem.” (John 4:​22, 23) Tru tumas, iumi savve faendem trufala wei for worship.

Jesus sei: “Mi no savve duim eni samting followim tingting bilong miseleva, bat mi storyim nomoa samting wea Dadi teachim long mi.” So Jesus savve, religion wea hem teachim nomoa hem tru wan. (John 8:​28) Dastawe hem sei: “Mi nao road, mi nao truth, and mi nao laef. Mi nomoa road for man go long Dadi long heven.” (John 14:⁠6) From olketa wea worshipim God long stretfala wei wan mind for worshipim Hem, olketa bae worship tugeta long wanfala tru religion.

 Hao nao bae iu luksavve long pipol wea worshipim God long stret wei?

▪ Wanfala Christian hem man wea followim Jesus Christ. Lukim fofala wei bilong Jesus wea iumi savve followim, wea bae mekem pipol luksavve long olketa trufala Christian.

1. Jesus Christ prea olsem long Jehovah: “Mi talemaot nem bilong iu long olketa.” (John 17:26) Olketa trufala Christian tu talemaot nem bilong God.

2. Jesus talemaot Kingdom bilong Jehovah and hem talem olketa disaepol bilong hem tu for go long olketa haos for preach abaotem datfala Kingdom. Hem sei: “Long olketa taon or vilij wea iufala go long hem, lukaotem man wea fit.” Bihaen, hem talem olketa olsem: “Go and teachim pipol long evri kantri for kamap disaepol bilong mi.” (Matthew 10:​7, 11; 28:19) Hem isi for luksavve long olketa trufala Christian distaem, bikos olketa gohed for duim sem waka olsem Jesus.

3. Jesus no tekpart long politik. Hem sei olsem abaotem olketa disaepol bilong hem: “Olketa no olsem pipol long world, olsem mi tu no olsem pipol long world.” (John 17:14) Pipol mas luksavve olketa tru Christian no teksaed long politik.

4. From Jesus lovem pipol hem no tingim hemseleva. Hem sei: “Sapos iufala lovem iufala evriwan, pipol bae savve iufala olketa disaepol bilong mi.” (John 13:35) Olketa trufala Christian helpem each other and no tekpart long olketa war.

Wanem gud samting nao iu savve kasem from trufala wei for worship?

▪ For followim trufala wei for worship, first samting, iu mas savve gud long Jehovah. Savve wea iu garem abaotem Jehovah bae helpem iu for aftarem nambawan samting wea iu savve duim for gohed lovem God. Jehovah promisim laef olowe for olketa wea lovem hem. Dastawe, Jesus sei: “For olketa kasem laef olowe, olketa mas lane abaotem iu, wea iu nomoa trufala God, and lane abaotem Jesus Christ, wea iu sendem kam.”​—⁠John 17:⁠3.

For savve moa, lukim chapter 15 long disfala buk, WANEM NAO Really Samting WEA BIBLE TEACHIM? Olketa Jehovah’s Witness pablisim.

[Piksa long page 22]

“Keakea long olketa laea profet wea olsem olketa wild dog, bat wea talem and duim olketa samting for mekem pipol tingse olketa hambol and kaen olsem wanfala sheepsheep.”​—⁠Matthew 7:​15