Samfala Ask Olsem . . .

For Kamap Christian, Waswe, Man Mas Bilivim Trinity?

▪ Wanfala skul textbuk, World Religions in Denmark, wea olketa pablisim long 2007, storyim Olketa Jehovah’s Witness hem wanfala smol sekson bilong olketa Christian wea barava followim Bible. Olketa Jehovah’s Witness nao mek-thri main Christian religion long Denmark.

Bat wanfala bishop bilong Danish National Church barava tok spoelem woman wea raetem textbuk hia, bikos datfala woman raet abaotem olketa Witness. Datfala bishop sei: “Mi no meetim yet wanfala savveman bilong religion wea tingse [Olketa Jehovah’s Witness] olketa Christian. Olketa no bilivim Trinity wea hem main teaching bilong Christian religion.”

Annika Hvithamar wea studyim religion nao raetem datfala buk and hem sei sapos samwan askem man why nao hem sei hem Christian, no staka pipol sei hem bikos olketa bilivim God hem wanfala Trinity. Nara samting tu, wanfala part insaed datfala textbuk garem title “Are You a Christian?” and hem sei: “Teaching abaotem Trinity hem wanfala hard samting for explainim.” Hem sei tu: “Evritaem hem no isi for olketa Christian wea no skulim religion for minim why God bilong olketa Christian hem wanfala God nomoa and no thrifala.”

Samting wea Bible teachim abaotem God and Jesus hem klia and simpol. Hem no hard for man minim. Disfala word “Trinity” and idea abaotem datwan nating stap insaed Bible. Bible talem stret Jesus Christ nao firstborn Son bilong God. (Colossians 1:​15) Bible talem tu Jesus hem “man wea leadim pipol go long God.” (1 Timothy 2:⁠5) Bible sei olsem abaotem Dadi long heven: “Jehovah, iu nomoa Barava Haefala God long full earth.”​—⁠Psalm 83:⁠18.

Olketa Jehovah’s Witness bilivim hem important for showimaot faith long Jesus. (John 3:​16) Dastawe olketa barava followim wanem Jesus talem. Hem sei: “Olketa Holy Raeting talem finis, ‘Iu mas baodaon long God bilong iu Jehovah, and iu mas worshipim hem nomoa.’” (Matthew 4:​10) Tru nao, eniwan wea trae hard for obeyim olketa samting wea Jesus talem savve sei hem wanfala Christian.

[Blurb long page 29]

“Teaching abaotem Trinity hem wanfala hard samting for explainim”