“Go Kasem Taem Iumi Dae”

STAKA hasband and waef hapi for talem disfala toktok taem olketa marit. Maet olketa no tingim hao wanday wanfala long tufala bae dae. Hasband or waef maet dae from olketa samting wea savve happen enitaem olsem wei for olo, sik, or accident. Datwan savve mekem hasband or waef wea laef for stap seleva and sorre.​—⁠Ecclesiastes 9:​11; Romans 5:​12.

Samfala report showimaot klosap haf long olketa woman wea winim 65 year olketa widow. Staka taem luk olsem olketa woman nao savve laef longtaem winim olketa man, so olketa sei hem “samting wea savve happen nomoa long olketa woman.” Diswan no minim olketa hasband no savve sorre taem waef hem dae. Hem tru, staka million pipol evriwea savve sorre tumas taem samwan wea olketa lovem hem dae. Waswe, iu tu kasem sem samting?

Sapos iu sorre bikos hasband or waef bilong iu dae, wanem nao iu savve duim? Waswe, Bible savve helpem iu long taem wea iu sorre olsem? Wanem nao samfala duim taem hasband or waef bilong olketa hem dae? Samting wea bae helpem wanfala man hem difren from samting wea bae helpem narawan, bat samfala wei stap wea savve helpem iu.

Luksavve Wanem for Duim Taem Samwan Dae

Nomata samfala sei wei for krae savve spoelem man and showimaot man hem wik, Doctor Joyce Brothers wea hem wanfala widow sei, wei for krae savve helpem man for aotem feeling bilong hem. For daonem wei for sorre, hem gudfala samting for man krae taem samwan hem dae, datwan savve helpem hem for no sorre tumas. No shame for krae. Gudfala example abaotem diswan hem stap insaed Bible. Abraham hem man wea garem bigfala faith, and God sei hem fren bilong hem. Bat taem waef bilong hem Sarah wea hem lovem tumas dae, hem “krae big and sorre.”​—⁠Genesis 23:⁠2.

Hem no rong for stap seleva for lelebet taem, bat no  duim datwan evritaem. Proverbs 18:1 warnim iumi: “Man wea stap seleva bae tingim nomoa samting wea hemseleva laekem.” Bat askem help from olketa relative and fren wea luksavve long feeling bilong iu. Samting wea savve helpem iu hem Christian kongregeson, wea olketa spiritual brata wea mature savve helpem and advaesem iu long taem wea iu needim help.​—⁠Isaiah 32:​1, 2.

Sapos iu raet bak long olketa wea iu kasem samfala leta or card for talem sorre bilong olketa, datwan savve helpem iu. Taem iu duim olsem, datwan savve helpem iu for raetem olketa gudfala toktok wea iu tingim abaotem hasband or waef and olketa samting wea iutufala duim tugeta. And wei for wakem wanfala album for putim samfala piksa or eni leta bilong datwan wea dae, maet helpem iu tu for feel gud.

Sapos samwan wea iu lovem hem dae no longtaem go nomoa, hem no rong for iu sorre, bat gohed for duim olketa samting wea iu savve duim evriday, wea datwan bae helpem iu. Tingim diswan, sapos iu garem taem wea iu markem finis for sleep, for wekap, kaikai, and for duim waka, gohed for duim olketa samting hia. Taem iu feel sorre tumas mekem plan for duim samfala samting long olketa weekend and eni spesol day, olsem day wea iutufala marit. Hem barava important for gohed long olketa spiritual samting wea iu duim evritaem.​—⁠1 Corinthians 15:⁠58.

Taem samwan hem barava sorre, maet hem hard for hem tingting stret. Maet pipol wea garem nogud tingting savve mekius long samting wea kasem iu. So no kwiktaem for disaedem eni samting abaotem haos bilong iu, selen wea iu garem, for muv go long nara ples, or for marit moa. Bible sei: ‘Man wea plan gud firstaem bae kasem gudfala samting, bat evriwan wea kwiktaem tumas for duim samting bae olketa poor.’ (Proverbs 21:⁠5) Hem gud for no mekem eni bigfala change long laef bilong iu taem iu feel sorre yet.

Maet hem hard for iu duim eni samting witim olketa samting bilong hasband or waef wea dae, diswan hem tru sapos iutufala stap tugeta for longfala taem. Bat datwan hem samting wea man savve duim for aotem feeling for sorre wea hem garem. Wei for gohed keepim olketa samting bilong datwan wea dae, savve mekem wei for sorre no finis kwiktaem. (Psalm 6:⁠6) Samfala laek for duim diswan seleva, and olketa narawan askem eni fren bilong olketa for helpem olketa. Maet iu tu laek askem wanfala fren or relative for lukaftarem death certificate, for letem olketa bank savve hasband or waef hem dae, eni company wea hem garem kaon witim, changem title long land, or for aotem selen from NPF.

No forget, iumi stap long world wea olobaot. Distaem iu stap seleva, and maet iu bae kasem test for duim nogud samting. Tru nao, toktok wea aposol Paul talem barava fitim distaem. Hem sei: ‘Evriwan long iufala mas savve hao for keepim body bilong hem holy and for respectim, no long wei for laekem tumas sex olsem pipol wea no savve long God olketa duim.’ (1 Thessalonians 4:​4, 5) Hem bae gud for no lukluk long olketa movie, readim olketa buk, and herem music wea mekhae long sex.

Wanfala samting wea iumi shud savve nao, wei for sorre bae no kwiktaem finis. USA Today talem report wea University of Michigan Institute for Social Research showimaot, hasband or waef wea sorre needim samting olsem 18-fala  month for disfala feeling for sorre hem gogo daon. Askem God for helpem iu for no givap, wea iu savve duim taem iu garem holy spirit. (Galatians 5:​22, 23) Nomata maet iu no ting olsem distaem, isisi bae iu gohed for feel gud.

Samting wea Olketa Narawan Duim

Anna wea marit finis for 40 year, barava sorre taem hasband bilong hem dae no longtaem go nomoa. Hem sei: “Mami bilong mi dae taem mi 13 year nomoa, then bihaen, dadi bilong mi, tufala brata, and sista bilong mi dae tu. Bat nomata olketa hia dae, dae bilong hasband bilong mi nao barava affectim mi. Hem olsem body bilong mi olketa katem long tufala haf. Datfala pain hem tumas nao.” Wanem nao helpem Anna for no sorre tumas? Hem sei: “Mi mekem wanfala buk wea garem olketa email and card wea story abaotem olketa gudfala wei bilong Darryl. Evri samting hia storyim olketa gud samting abaotem hem. Mi savve Jehovah tu tingim hem, and hem bae mekem Darryl for laef bak.”

Esther wea hem 88 year, storyim samting wea helpem hem, hem sei: “Bihaen 46 year wea mitufala stap tugeta, wanfala samting wea barava hard for mi, hem nao for stap seleva. Bat mi luksavve taem mi gohed for duim olketa spiritual samting, datwan barava helpem mi. Mi no stop for go long olketa Christian meeting, storyim Bible witim olketa narawan, and duim Bible reading bilong mi. Nara samting wea helpem mi tu, mi laek for stap evritaem witim olketa fren bilong mi wea savve lisin long mi. Nomata olketa no talem olketa toktok wea mekem mi feel gud evritaem, mi tinghae long taem wea olketa iusim for lisin and stap witim mi.”

Robert, wea waef bilong hem dae long cancer bihaen 48 year wea tufala marit, hem sei: “Hem no isi taem iu lusim samwan wea iutufala savve story, disaedem samting, enjoyim holiday, and storyim tugeta olketa samting wea  iutufala duim evriday. Hem no isi, bat mi no givap and mi gohed duim olketa samting long laef bilong mi. Taem mi keepim mind and body bilong mi strong, datwan barava helpem mi. Prea tu barava helpem mi for feel gud.”

Iu Savve Hapi Bihaen Hasband or Waef Dae

Nomata dae bilong hasband or waef wea iu lovem tumas hem barava sorre samting, datwan hem no end long laef bilong iu. Maet distaem iu garem taem for duim olketa difren samting wea iu no duim bifor, olsem for duim samting wea iu interest long hem or for gogo long olketa nara ples. Olketa samting hia savve mekem iu for no sorre tumas. Bat for olketa narawan, diswan hem chance for duim samfala samting moa long preaching waka. Man savve hapi and satisfae taem hem helpem olketa narawan, bikos Jesus sei: “Man wea givim samting hem barava hapi winim man wea kasem samting.”​—⁠Acts 20:⁠35.

No tingse hem bae hard for iu hapi moa. Sapos iu trust long Jehovah God and fren witim hem, bae hem lukaftarem iu. David sei: ‘Jehovah hem helpem olketa widow woman.’ (Psalm 146:⁠9) Iumi hapi, from Bible no storyim nomoa Jehovah olsem “Dadi bilong iumi wea savve sorre long pipol and wea showimaot mercy, and hem God wea savve helpem evriwan” bat Bible sei tu, Jehovah hem “openem hand bilong [hem] and givim long evri samting wea laef evri samting wea olketa laekem.” (2 Corinthians 1:3; Psalm 145:16) Tru tumas, Jehovah God wea lovem iumi hem fit, hem willing, and hem redi for helpem olketa wea lukaotem hem for helpem olketa. Hem gud for iu garem feeling wea olketa Israelite bifor garem, wea olketa singsing olsem: ‘Mi bae luk go long olketa maunten. Long wea nao bae mi kasem help? Jehovah nao savve helpem mi, bikos Hem nao wakem heven and earth.’​—⁠Psalm 121:​1, 2.

[Piksa long page 19]

Staka pipol savve sorre tumas bikos hasband or waef bilong olketa hem dae. Waswe, iu wanfala long olketa?

[Box long page 21]

Waswe Long Wei for Marit Moa?

Bible sei, dae hem end bilong marit, so hasband or waef wea laef savve marit moa. (1 Corinthians 7:​39) Bat man seleva nao for disaed. Nomata olsem, olketa pikinini mas savve long wanem mami or dadi disaedem and helpem dadi or mami sapos iu savve duim. (Philippians 2:⁠4) Wanfala example nao hem Andrés, firstaem hem againstim dadi bilong hem wea laek marit moa. Andrés barava lovem mami bilong hem and hem tingse no eniwan bae olsem mami bilong hem. Hem sei: “No longtaem bihaen mi luksavve dadi bilong mi disaedem stret samting. Taem hem marit hem hapi moa. Hem start for duim samfala samting wea hem no duim for longfala taem lelebet, olsem for gogo long olketa difren ples. And mi tinghae tu long olketa samting wea niu waef bilong hem duim for lukaftarem gud dadi bilong mi.”

[Piksa long page 20]

Askem God for helpem iu for no givap, and gohed busy long samfala samting long laef wea bae helpem iu for no sorre tumas