Mek-foa Samting

Chusim Olketa Fren Long Wisefala Wei

WANEM NAO BIBLE TEACHIM? “Man wea fren witim pipol wea wise bae hem wise.”​—Proverbs 13:20.

WHY NAO HEM NO ISI? Olketa fren bilong iumi savve helpem iumi for satisfae or for no satisfae. Wei and toktok bilong olketa savve affectim tingting bilong iumi abaotem laef.​—1 Corinthians 15:33.

Tingim wanfala example long Bible abaotem 12-fala man wea kam bak from wanfala trip long Canaan. Tenfala “talem long olketa son bilong Israel wanfala nogud report abaotem datfala land wea olketa spaem.” Nomata olsem, tufala long olketa talem gud samting abaotem Canaan and sei, hem “barava gudfala land.” Bat tingting wea tenfala spae hia garem wea no stret affectim nao tingting bilong olketa Israelite. Bible sei: “Evriwan . . . long olketa son bilong Israel start for komplen.”​—Numbers 13:⁠30–​14:9.

Distaem hem olsem tu, staka pipol “tok againstim olketa narawan and olketa laek for komplen olowe.” (Jude 16) Hem no isi for gohed satisfae especially taem iumi stap witim olketa fren wea nating savve satisfae witim wanem olketa garem.

WANEM NAO IU SAVVE DUIM? Ting raonem samting wea iu and olketa fren bilong iu story abaotem. Waswe, olketa fren bilong iu tokplas abaotem wanem olketa garem or olketa komplen abaotem wanem olketa no garem? Hao nao olketa fren hia ting long iu? Waswe, iu trae for garem staka samting mekem olketa fren bilong iu jealous or iu encouragem olketa for satisfae witim wanem olketa garem?

Tingim example bilong David wea bae kamap king, and Jonathan, son bilong King Saul. David stap long wilderness taem hem ranawe from King Saul. King Saul laek killim dae David from hem wari nogud David kamap king. Nomata maet Jonathan bae kamap nextfala king, hem kamap wanfala long olketa gudfala fren bilong David. Jonathan luksavve God markem finis David for kamap nextfala king and hem hapi for sapotim fren bilong hem.​—1 Samuel 19:​1, 2; 20:​30-​33; 23:14-​18.

Olketa kaen fren olsem nao iumi laekem, bikos olketa trae hard for satisfae and duim samting wea olketa savve bae helpem iumi. (Proverbs 17:17) Tru tumas, for garem olketa kaen fren olsem, iu mas showimaot tu olketa gudfala wei olsem.​—Philippians 2:​3, 4.

[Piksa long page 7]

Waswe, olketa fren bilong iu helpem iu for satisfae or olketa mekem iu for no satisfae?