Mek-thri Samting

Gohed Showimaot Wei for Tinghae

WANEM NAO BIBLE TEACHIM? “Talem thankiu long God for evri samting.”​—1 Thessalonians 5:​18.

WHY NAO HEM NO ISI? Pipol wea stap raonem iumi savve praod, no savve sei thankiu, gogo iumi tu savve start for garem olketa wei hia. (2 Timothy 3:​1, 2) And tu, nomata iumi busy finis, maet iumi tingse iumi mas duim samfala samting moa. Maet iumi wari tumas long olketa problem bilong iumi or busy tumas long wanem iumiseleva laek duim, gogo iumi no garem taem nao for tinghae long wanem iumi garem finis or showimaot iumi tinghae long samting wea nara pipol duim for iumi.

WANEM NAO IU SAVVE DUIM? Markem taem for ting raonem olketa gud samting wea iu garem distaem. Hem tru, maet iu garem staka problem. Bat tingim samting wea kasem King David. Samfala taem hem feel olsem heart bilong hem pisis nao from olketa hard taem wea hem kasem. Nomata olsem, hem prea long God and sei: ‘Mi ting raonem evri waka bilong iu. Mi willing for tingting evritaem abaotem evri samting wea iu duim.’ (Psalm 143:​3-5) Nomata David kasem hard taem, hem gohed showimaot wei for tinghae and hem gohed for satisfae.

Ting raonem olketa samting wea narawan duim for helpem iu, and showimaot iu tinghae long wanem olketa duim. Jesus nao showimaot nambawan example long diswan. Tingim, taem Mary pourim oil long hed and leg bilong Jesus, samfala sei: “Hao nao woman hia weistim disfala oil?” * Olketa hia tingse olketa shud salem datfala oil and givim datfala selen long olketa wea poor. Jesus sei: “No trae for stopem hem. Why nao iufala laek mek trabol long hem?” Then hem sei moa: “Gudfala samting nao hem duim for mi.” (Mark 14:​3-8; John 12:3) Jesus praisem Mary for samting wea hem duim, hem no tingim samting wea hem no duim.

Maet samfala no really tinghae long famili, olketa fren, or olketa nara gud samting olketa garem, bat bihaen olketa samting hia hem lus olketa just tinghae long hem nao. For kaen samting olsem no kasem iu, hem gud for tinghae long olketa gud samting wea iu garem distaem! For helpem iu luksavve long olketa gudfala samting wea iu garem, hem bae gud tumas for raetem olketa samting wea iu tinghae long hem!

From ‘evri gud present’ hem kam from God, hem bae gud for iumi talem thankiu long God long prea for olketa gudfala samting hia. (James 1:​17) Wei for evritaem duim olsem savve helpem iumi for gohed showimaot wei for tinghae and for satisfae.​—Philippians 4:​6, 7.

[Footnote]

[Piksa long page 6]

Waswe, iu showimaot iu tinghae long wanem olketa narawan duim for iu?