Samting Iumi Lanem From Jesus

Hao Olketa Angel Savve Helpem Iumi

Jesus stap witim Dadi bilong hem long heven from “bifor kam yet.” (John 17:5) Dastawe hem nao fit for ansarem olketa kwestin hia.

Waswe, olketa angel interest long iumi?

▪ Jesus helpem iumi luksavve olketa angel barava interest long pipol. Hem sei: “Olketa angel bilong God barava hapi tumas taem wanfala man wea sin hem repent.”​—Luke 15:10.

Jesus sei olketa angel garem waka for helpem pipol wea worshipim God for fren gud witim hem. Dastawe taem Jesus warnim olketa disaepol for no mekem narawan sin, hem sei: “Iufala mas no les long eni disaepol bilong mi bikos, iu savve, olketa angel bilong olketa long heven evritaem lukim feis bilong Dadi bilong mi wea stap long heven.” (Matthew 18:10) Jesus no minim each wan wea followim hem garem angel for protectim hemseleva. Bat Jesus helpem iumi for luksavve olketa angel wea waka witim God interest long olketa long Christian kongregeson.

 Wanem nao Satan savve duim for spoelem iumi?

▪ Jesus warnim olketa wea followim hem hao Satan trae hard for stopem pipol for no lanem tru samting abaotem God. Hem sei: “Taem man herem message abaotem kingdom bat hem no minim datwan, Satan hem kam and tekem datfala message from mind bilong hem.”​—Matthew 13:19.

Jesus storyim wanfala wei wea Satan trikim pipol. Hem storyim tokpiksa abaotem wanfala man wea plantim wheat long planteison bilong hem. Datfala man piksarem Jesus, and wheat hem piksarem olketa tru Christian wea bae rul witim Jesus long heven. Bat Jesus sei wanfala enemy hem kam and “plantim rabis grass midolwan olketa wheat hia.” Rabis grass piksarem olketa false Christian. “Enemy wea plantim datfala rabis grass hem Devil.” (Matthew 13:25, 39) Rabis grass savve luk olsem wheat wea no garem frut yet, long sem wei tu olketa wea sei olketa Christian maet act olsem olketa worshipim tru God. Olketa religion wea teachim olketa false teaching trikim pipol and mekem pipol for no obeyim God. Satan iusim false religion for mekem pipol no fren witim Jehovah.

Wanem nao iumi savve duim mekem Satan no spoelem iumi?

▪ Jesus sei Satan hem “rulim disfala world.” (John 14:30) Long wanfala prea wea Jesus talem, hem helpem iumi for luksavve long wanem iumi savve duim mekem Satan no spoelem iumi. Jesus tingim olketa disaepol bilong hem taem hem prea olsem long Dadi long heven: “Mi askem iu for lukaftarem olketa mekem Satan no spoelem olketa. Olketa no olsem pipol long world, olsem mi tu no olsem pipol long world. Iusim toktok bilong iu wea tru for mekem olketa holy.” (John 17:15-​17) Savve wea iumi kasem from Bible savve protectim iumi for no followim wei bilong pipol long world wea Satan rulim.

Hao nao olketa angel savve helpem iumi distaem?

▪ Jesus sei: “Long taem wea world hem gogo for finis, olketa angel bae go and separatem nogud pipol from pipol wea raeteous.” (Matthew 13:49) Iumi stap long taem wea “world hem gogo for finis,” and staka million pipol acceptim gud nius abaotem Kingdom bilong God.​—Matthew 24:​3, 14.

Bat God no acceptim evriwan wea start for studyim Bible. Olketa angel leadim preaching waka wea pipol bilong Jehovah duim, and olketa separatem pipol wea garem trufala love for God, from pipol wea no followim wanem olketa lanem. Jesus story abaotem pipol wea God acceptim, and hem sei olketa hia nao hem ‘olketa wea taem olketa herem message abaotem kingdom, olketa minim and tinghae long datwan, and olketa bae duim gud samting and no givap.’​—Luke 8:​15.

For savve moa, lukim chapter 10 long disfala buk wea Olketa Jehovah’s Witness pablisim.

[Piksa long page 24]

Olketa angel duim waka for helpem pipol kam insaed Christian kongregeson