Mek-faev Samting

Luksavve Iu Needim God

WANEM NAO BIBLE TEACHIM? “Olketa wea luksavve olketa needim God bae hapi.”​—Matthew 5:3.

WHY NAO HEM NO ISI? Staka thousand religion nao stap distaem and olketa teachim difren samting abaotem wei for luksavve iumi needim God. Hao nao bae iu luksavve long religion wea teachim truth and wea God barava hapi long hem? Samfala famous man wea raetem buk talem wei for biliv long God and worshipim hem, hem no mek sense and savve spoelem man tu. Wanfala magasin Maclean’s talem tingting bilong wanfala famous man wea no biliv long God, hem sei: “Disfala idea wea olketa Christian sei man mas lukaotem samting long laef wea winim wanem hem savve lukim, feelim and herem, and wea science no savve explainim . . . hem no mekhae long laef wea iumi garem and hem mekem pipol for kamap criminal.”

WANEM NAO IU SAVVE DUIM? Ting raonem gud olketa pruv wea showimaot God hem stap. (Romans 1:​20; Hebrews 3:⁠4) No letem eniwan stopem iu for faendem ansa bilong olketa important kwestin hia: Why nao iumi laef? Waswe, man savve gohed for laef long nara ples bihaen hem dae? Why nao wei for safa hem big tumas? Wanem nao God laekem mi for duim? Wei for kasem stretfala ansa for olketa kwestin hia hem helpem iumi for gohed satisfae nomoa.

Bat no bilivim evri toktok wea olketa narawan talem. Bible encouragem iu for iusim “gudfala tingting” for mekem iu luksavve long samting wea God laekem iu for duim. (Romans 12:​1, 2) Iu bae kasem gud samting from hard waka bilong iu. Sapos iu markem taem for studyim Bible and followim wanem iu lanem, iu bae no kasem problem, no wari tumas, and iu savve enjoyim go moa laef bilong iu. Bible hem samting wea iu savve trustim. Staka million pipol wea garem difren living, kasem gud samting taem olketa lanem tru samting abaotem God and olketa plan bilong hem.

Taem iu followim olketa wise kaonsel long Bible, bae iu gohed for lovem God. Hem bae gud tumas for iu studyim Bible witim Olketa Jehovah’s Witness! Sapos iu duim olsem, bae iu garem tingting wea semsem olsem aposol Paul wea sei: “Iumi savve kasem barava gud samting from wei for faithful long God sapos iumi satisfae nomoa long wanem iumi garem.”​—1 Timothy 6:​6.

[Piksa long page 8]

Iuseleva luksavve long samting wea God laekem iu for duim