Samfala Ask Olsem . . .

Wea Nao Paradaes wea Bible Storyim Hem Stap?

▪ Jesus promisim man wea klosap for dae wea showimaot faith long hem: “Iu bae stap witim mi long Paradaes.” (Luke 23:43) Wea nao bae datfala man stap? Waswe, Paradaes bae stap long heven, long earth, or long eni nara ples wea olketa man weit for kasem judgment?

Long bifor first parents bilong iumi stap long Paradaes. Bible sei: “Jehovah God wakem wanfala garden long Eden, long east saed, and long there nao hem putim datfala man wea hem wakem. . . . And Jehovah God hem tekem man and putim hem long garden bilong Eden for wakem and for lukaftarem.” (Genesis 2:​8, 15) Taem olketa transleitim disfala word “garden” long Greek languis, hem pa·raʹdei·sos, wea long English languis hem “paradise.”

Olsem hasband and waef savve mekem big haos bilong tufala taem tufala garem staka pikinini, first parents bilong iumi tu shud mekem big datfala spialaen bilong Paradaes long Eden taem olketa man kamap staka long disfala earth. God talem tufala: “Fulimap earth and lukaftarem hem.”​—Genesis 1:​28.

So plan bilong Creator hem for olketa man stap laef and garem pikinini long Paradaes long earth. Olketa bae stap laef for olowe long wanfala garden long earth wea no eni beregraon bae stap. Earth bae kamap wanfala ples for evriwan stap olowe long hem. Dastawe, iumi lukim disfala earth bilong iumi hem luk naes tumas! God wakem iumi for stap laef long naesfala earth.

Waswe, plan bilong God hem change? Nomoa. Bikos Jehovah comfortim iumi: “Samting wea mi talem bae hem kamap tru. Mi no talem samting nating bat bae mi duim samting wea mi laekem, and samting wea mi talem hem nao samting wea bae happen.” (Isaiah 55:11) Winim 3,000 year bihaen God wakem man, Bible storyim “Man wea sheipim and wakem earth,” hem “no wakem earth for stap nating, bat for pipol stap long hem.” (Isaiah 45:18) Wanem God talem bae kamap tru. Earth bae kamap paradaes.

Staka scripture wea storyim Paradaes hem storyim living long earth. Example, profesi bilong Isaiah sei: “Olketa bae buildim haos and stap insaed; and olketa bae plantim grape planteison and kaikaim frut bilong hem.” (Isaiah 65:21) Wea nao pipol savve wakem haos, and wakem garden? Wea nao pipol savve kaikaim frut? Long earth. Proverbs 2:​21 barava talem klia: “Olketa wea duim stret samting and olketa wea no garem blame bae stap long earth.”

Jesus tu storyim wanfala paradaes long earth. Hem tru, hem promisim tu wanfala paradaes long heven, bat datwan for wanfala smol grup nomoa. (Luke 12:32) Bihaen olketa hia dae, olketa laef bak for go long Paradaes long heven and stap witim Christ for rulim Paradaes long earth. (Revelation 5:​10; 14:​1-3) Olketa hia wea bae rul kam from heven bae rulim disfala Paradaes long earth long gudfala wei followim hao God hem laekem.

Jesus savve diswan nao hem will bilong God for disfala earth, bikos hem stap witim Dadi bilong hem long heven taem God wakem datfala garden long Eden. Evriwan wea showimaot faith distaem savve kasem datfala laef long paradaes long earth. (John 3:​16) Jesus hem promis olsem long olketa wea showimaot faith: “Iu bae stap witim mi long Paradaes.”​—Luke 23:⁠43.

[Picture Credit Line long page 9]

© FORGET Patrick/SAGAPHOTO.COM/Alamy