DISTAEM, full world wari abaotem olketa samting wea happen long Middle East. Staka taem iumi herem report abaotem olketa rocket attak, olketa militant wea faet, and terrorist wea iusim bomb for killim dae staka pipol. Witim evri problem hia, chance stap wea maet olketa savve iusim olketa nuclear bomb. Dastawe iumi no sapraes pipol evriwea olketa wari!

Long May 1948, full world tu barava laek savve long samting wea happen long Middle East. Long datfala taem wea 62 year go finis, order wea England garem for kontrolem Palestine hem klosap for finis, and war savve happen enitaem nomoa. Long year bifor, United Nations givim order for startim gavman bilong olketa Jew long samfala territory wea olketa tekovarem. Olketa Arab kantri sei bae olketa traem best for stopem datwan. Datfala Arab League talem warning and sei: Datfala spialaen for divaedem territory bae kamap spialaen bilong blood and fire.”

Long Friday aftanun, May 14, 1948, long 4:00 p.m, klosap nao order wea England garem bae finis. Long wanfala Museum long Tel Aviv long Israel, wanfala smol grup bilong 350 pipol weit for herem wanfala announcement, wea hem nao for talemaot datfala nation bilong Israel hem kamap wanfala independent nation. Security stap evriwea for mek sure olketa enemy bilong datfala niu gavman no spoelem datfala hipap.

David Ben-Gurion, wea hem leader bilong Israel’s National Council hem readim The Declaration of the Establishment of the State of Israel. Samfala toktok long datfala Declaration sei: “Mifala, olketa member bilong People’s Council, wea stand for Community bilong olketa Jew long Eretz-Israel . . . From history bilong mifala wea showimaot mifala garem raet bikos mifala nao olketa man bilong disfala ples, witim tu, datfala Resolution bilong United Nations General Assembly, mifala talemaot wei wea wanfala Jewish State long Eretz-Israel hem start wea mifala bae kolem datwan, Nation bilong Israel.”

Samfala Evangelical Protestant bilivim datfala State bilong Israel distaem hem mekem Bible profesi for kamap tru. Example, John Hagee, wanfala pastor, sei olsem long disfala buk Jerusalem Countdown, “Isaiah hem raet abaotem disfala important samting taem  hem sei: ‘Wanfala nation bae born long wanfala day nomoa.’ (Lukim Isaiah 66:8.) . . . No enitaem long mek-20 century iumi lukim nara profesi fulfill wea important olsem diswan. Hem barava strongfala pruv wea showimaot long evriwan God bilong Israel hem stap yet.”

Waswe, datfala toktok hem tru? Waswe, Isaiah 66:8 hem sei wanfala niu State bilong Israel bae start distaem Waswe, May 14, 1948 hem taem wea wanfala profesi fulfill long mek-20 century wea important winim eni nara profesi wea fulfill long datfala taem”? Sapos datfala niu State bilong Israel hem nation bilong God yet, and God iusim datwan for mekem profesi long Bible kamap tru, then olketa Bible student evriwea long world bae barava interest long diswan.

Profet Isaiah sei olsem: “Hu nao herem samting olsem bifor? Hu nao lukim olketa samting olsem bifor? Waswe, bae wanfala land kamap witim bigfala pain olsem taem woman bornem pikinini? Or waswe, wanfala nation bae born wantaem nomoa? Bikos Zion hem kasem pain and hem bornem olketa son bilong hem tu.” (Isaiah 66:8) Disfala verse showimaot klia wanfala nation bae seknomoa born, olsem long wanfala day nomoa. Bat hu nao bae mekem diswan for happen? Nextfala verse helpem iumi for savve long ansa, Jehovah hem sei: “Taem mi start for duim waka bilong mi, mi mas finisim ia. Or waswe, taem woman hem redi for bornem pikinini, iufala tingse bae mi stopem for hem no bornem pikinini ia”? Jehovah God showimaot klia, wei wea wanfala nation bae seknomoa born hem samting wea hem nao bae duim.

Israel distaem hem wanfala democracy and no enitaem olketa sei olketa depend long datfala God wea Bible story abaotem. Waswe, long 1948 olketa Israel sei Jehovah God nao wan wea mekem olketa for kamap wanfala state olsem? Nomoa nao. Insaed long datfala toktok for kamap independent, olketa nating iusim nem bilong God or disfala word “God.” Datfala buk Great Moments in Jewish History hem sei olsem abaotem datfala announcement for independant: Nomata long 1:00 P.M. wea hem nao taem for datfala National Council hem meet, bat olketa member bilong Council no savve agree long toktok bilong datfala announcement. . . . Samfala Jew laekem samfala toktok olsem ‘God bilong olketa Israel’ for insaed datwan. Samfala member bilong datfala Council no laekem. Bat Ben-Gurion disaed for disfala word ‘Rok’ for stap insaed and no disfala word ‘God.’ ”

Kam kasem distaem, olketa long disfala State bilong Israel sei samting wea pruvim olketa fit for kamap independent olsem hem bikos long datfala UN resolution and raet wea olketa garem bikos long history bilong olketa. Waswe, hem fitim for iumi tingse God wea givim kam Bible savve duim olketa nambawan mirakol long mek-20 century for pipol wea no laek for mekhae long hem?

Tingting bilong pipol long Israel distaem hem barava difren from samting wea happen long 537 B.C.E. Long datfala taem, nation bilong Israel barava ‘born moa’ olsem long wanfala day nomoa bihaen Babylon hem distroem Jerusalem long 70 year bifor. Long datfala taem profesi long Isaiah 66:8 barava kamap tru taem Cyrus the Great from Persia wea winim Babylon hem talem olketa Jew for go bak long kantri bilong olketa.​—Ezra 1:2.

King Cyrus bilong Persia luksavve Jehovah nao duim diswan long 537 B.C.E., and olketa wea go bak long Jerusalem garem goal for mas worshipim Jehovah moa and for buildim bak temple. Datfala State bilong Israel distaem nating talemaot olketa laekem tru worship for gohed and for buildim bak temple.

Long year 33 C.E., really nation bilong Israel lusim nao wei wea olketa stap olsem nation bilong God taem olketa rejectim Messiah wea hem Son bilong Jehovah. Messiah talem olsem: “Jerusalem, Jerusalem, wea iu nao killim dae olketa profet and sutim dae long ston olketa wea God sendem kam long iu  . . Iufala garem temple bilong iufala, bat iu savve, God lusim hem finis.” (Matthew 23:37, 38) Toktok wea Jesus talem kamap  tru long 70 C.E., taem olketa long Rome distroem Jerusalem witim temple and olketa priest. Bat waswe long plan bilong God for garem wanfala ‘spesol pipol bilong hem wea hem chusim from plande difren kantri, . . . wanfala kingdom bilong olketa priest and wanfala holy nation’?​—Exodus 19:​5, 6.

Aposol Peter wea hem wanfala really Jew, ansarem datfala kwestin long leta wea hem raetem for olketa Christian wea Jew and no Jew. Hem sei: “Iufala ‘pipol wea God chusim and olketa priest wea rul olsem king. Iufala wanfala holy nation and spesol pipol bilong God.’ . . . Long bifor, iufala no pipol bilong God, bat distaem iufala pipol bilong hem nao. Long bifor, God hem no kaen and sorre long iufala, bat distaem hem kaen and sorre long iufala nao.”​—1 Peter 2:​7-​10.

So olketa Christian wea holy spirit bilong God chusim, olketa kamap wanfala spiritual nation, and wei wea olketa kamap datfala nation hem no from hu nao bornem olketa or wea nao olketa stap. Aposol Paul storyim diswan olsem: “Sapos man hem circumcise or nomoa, datwan hem no important, bat niu samting wea God wakem nao hem important. Prea bilong mi hem for God givim peace and for hem kaen and sorre long evriwan wea followim diswan, wea olketa hia nao Israel bilong God.”​—Galatians 6:​15, 16.

Long datfala State bilong Israel, man wea Jew or wea laek for Jew savve kamap citizen bilong hem, bat for man kamap citizen long datfala “Israel bilong God” wea Bible storyim, “hem mas man wea obey and wea blood bilong Jesus Christ mekem hem for klin.” (1 Peter 1:​1, 2) Paul storyim olketa member bilong Israel bilong God wea olketa spiritual Jew, and hem sei: “Samting wea mekem man hem Jew hem no lukluk bilong hem and hem no bikos hem circumcise long body. Tingting bilong man nao mekem hem wanfala Jew and hem circumcise long heart. Spirit nao mekem diswan and no law. God nao hem praisem man olsem, and no olketa man.”​—Romans 2:​28, 29.

Datfala verse helpem iumi for minim wanfala toktok bilong Paul wea plande pipol savve argue abaotem. Long leta wea Paul raetem for olketa long Rome, hem explainim hao olketa really Jew wea no biliv, olketa olsem olketa branch bilong tokpiksa olive tree wea olketa katem for mekem olketa branch bilong wild olive tree savve join go long datfala olive tree. (Romans 11:17-​21) Long end bilong datfala tokpiksa, Paul sei: “Samfala pipol bilong Israel barava no laek for lisin. Bae hem olsem go kasem taem full namba bilong pipol wea no Jew wea God chusim, olketa kam. Long wei olsem evriwan bilong Israel bae sev.” (Romans 11:25, 26) Waswe, samting wea Paul talem hem minim staka Jew bae kamap Christian long last minute? Nomoa nao! No enitaem.

Taem Paul sei “evriwan bilong Israel,” hem minim evriwan long spiritual Israel, wea hem nao olketa Christian wea holy spirit bilong God chusim. Paul talem, wei wea olketa really Jew no laek for acceptim Messiah, no stopem plan bilong God for garem wanfala spiritual ‘olive tree’ wea fulap long olketa gudfala branch. Diswan hem fitim tokpiksa wea Jesus talem abaotem hemseleva. Hem sei hem olsem grape tree wea God bae katem olketa nogud branch bilong hem. Jesus sei: “Mi nao grape tree wea garem gudfala frut, and Dadi bilong mi nao man wea lukaftarem olketa grape tree. Hem bae katem evri branch bilong mi wea no garem frut, and prunim evri branch wea garem frut for mekem hem klin and savve garem samfala frut moa.”​—John 15:​1, 2.

Bible no storyim wei wea datfala State bilong Israel distaem bae start, bat hem barava storyim nao wei wea datfala nation bilong spiritual Israel bae start! Sapos iu luksavve and joinim datfala spiritual nation distaem, iu bae kasem staka blessing for olowe.​—Genesis 22:15-​18; Galatians 3:​8, 9.