Waswe, God Really Lovem Iu?

WASWE, iu tingse eniwan lovem iu? Or waswe, samfala taem iu tingse no eniwan lovem iu? From pipol long world busy tumas and staka tingim olketa seleva nomoa, maet iu tingse no eniwan laek for luksavve long iu. Bible talem tru samting abaotem taem bilong iumi hao staka pipol bae tingim olketa seleva nomoa, and diswan mekem olketa no tingim nao olketa narawan.—2 Timothy 3:1, 2.

Nomata wanem age, kastom, languis, or kala skin iumi garem, evriwan long world needim samwan for olketa lovem, and tu samwan for lovem olketa. Samfala report sei body bilong iumi hem garem spesol wei for feelim love and kaen. Jehovah God wea wakem iumi, hem barava savve gud winim eni narawan hao iumi needim love and for pipol tinghae long iumi. Hao nao bae iu feel sapos God talem iu spesol long hem? Bae iu tinghae tumas long datwan. Waswe, iumi savve sure Jehovah hem interest long olketa man wea no perfect? Waswe, hem tingim iumi wanwan? Sapos olsem, wanem nao mekem wanfala man spesol long hem?

Jehovah Lovem Iumi

Samting olsem 3,000 year go finis, wanfala man wea raetem psalm hem barava sapraes taem hem luk ap long naet and hem lukim staka star. Hem luksavve Creator wea wakem evri star hem barava winim eniwan. Man wea raetem psalm ting raonem wei wea Jehovah hem nambawan and wei wea iumi olketa man nating nomoa. Dastawe, hem talemaot hem sapraes long wei wea Jehovah lovem iumi taem hem sei: “Taem mi luk go ap long skae, mi lukim olketa samting wea iu wakem. Mi lukim moon and olketa star wea iu wakem and mi tingting olsem, why nao iu tingim olketa man wea savve dae nomoa, and lukaftarem olketa?” (Psalm 8:3, 4) Maet iumi tingse Creator hem stap farawe tumas or hem busy tumas, so hem hard for hem tingim iumi olketa man wea no perfect. Man wea raetem psalm luksavve nomata God hem hae tumas winim iumi and iumi stap for lelebet taem nomoa, iumi important long God.

Narawan wea raetem psalm talem olsem: “Jehovah hem hapi long olketa wea fraet long hem. Hem kaen and faithful long olketa  wea trustim hem.” (Psalm 147:11) Toktok wea tufala psalm hia talem barava encouragem iumi. Nomata Jehovah hem hae tumas, hem no just savve long olketa man, bat hem “lukaftarem olketa” and “hem hapi long olketa.”

Wanfala Bible profesi wea storyim olketa samting wea happen long taem bilong iumi mekhae long diswan. Jehovah iusim profet Haggai for talemaot disfala waka for preachim gud nius abaotem Kingdom bilong God bae kasem evriwea long world. Wanem nao kamaot from diswan? Tingim wanfala samting wea happen: “Olketa barava spesol samting bilong evri kantri mas kam insaed; and mi bae fulimap disfala haos witim glory.”—Haggai 2:7.

Wanem nao “olketa spesol samting” bilong evri kantri? Diswan no savve minim olketa material samting. (Haggai 2:8) Silver and gold no really mekem heart bilong Jehovah hapi. Hem hapi long pipol wea nomata olketa no perfect, olketa worshipim hem bikos olketa lovem hem. (Proverbs 27:11) Olketa hia nao “olketa spesol samting” wea mekhae long Jehovah and hem hapi long faithful wei bilong olketa and wei wea olketa waka hard. Waswe, iu wanfala long olketa?

Maet hem hard for bilivim iumi man wea no perfect savve spesol long Nambawan Creator wea wakem universe. Nomata olsem, disfala tru samting shud mekem iumi laek for acceptim invitation bilong Jehovah for fren witim hem.—Isaiah 55:6; James 4:8.

“Iu Samwan wea Barava Spesol”

Long wanfala evening, profet Daniel wea olo hem sapraes long wanfala samting. Taem Daniel hem prea, seknomoa wanfala important visitor hem kam. Nem bilong hem Gabriel. Daniel meetim hem bifor so hem luksavve hem angel bilong Jehovah. Gabriel explainim why hem kam: “Daniel, mi kam distaem for givim iu savve witim wei for minim samting . . . bikos iu samwan wea barava spesol.”—Daniel 9:21-23.

Long narafala taem, wanfala angel bilong Jehovah story long Daniel and sei: “Daniel, iu man wea barava spesol.” Then angel strongim Daniel olsem: “Iu no fraet Daniel. Iu man wea barava spesol. Bae God givim peace long iu.” (Daniel 10:11, 19) Thrifala taem nao Daniel herem disfala toktok “barava spesol.” Disfala toktok savve minim tu “barava lovem,” “barava tinghae,” and “favorite wan.”

Masbi Daniel fren gud witim God and luksavve Jehovah tinghae long wanem hem duim. Bat datfala toktok wea olketa angel talemaot mas mekem hem barava feel gud. Dastawe Daniel sei God ‘strongim hem.’—Daniel 10:19.

 Disfala story wea showimaot Jehovah lovem faithful profet bilong hem stap insaed Bible for helpem iumi. (Romans 15:4) Taem iumi ting raonem example bilong Daniel, diswan helpem iumi for minim wanem nao mekem wanfala man spesol long Dadi bilong iumi long heven.

Studyim Bible Evritaem

Daniel barava studyim gud olketa Holy Raeting. Iumi savve long diswan bikos hemseleva sei: “Mi . . . luksavve long olketa buk, namba bilong olketa year . . . wea no eniwan bae stap long Jerusalem.” (Daniel 9:2) Luk olsem olketa Bible buk wea Daniel garem long datfala taem, hem olketa buk wea Moses, David, Solomon, Isaiah, Jeremiah, Ezekiel, and olketa nara profet raetem. Iumi savve tingim staka scroll nao stap raonem Daniel, and hem busy for readim and comparem olketa profesi wea storyim wei wea pipol bae go bak long Jerusalem for worshipim Jehovah moa. Maet Daniel stap insaed rum long ruf bilong hem, wea no eniwan savve disturbim hem, for barava ting raonem olketa scripture wea hem readim. From hem study olsem, diswan strongim faith bilong hem and helpem hem for fren gud witim Jehovah.

Wei wea Daniel studyim olketa Holy Raeting helpem hem for garem olketa gudfala wei and duim stret samting. Samting wea hem lanem from olketa Holy Raeting taem hem smol boy, strongim hem taem hem young for no kaikaim samting wea Law bilong God tambuim. (Daniel 1:8) Narataem hem no fraet for talemaot message bilong God long olketa bigman wea rulim Babylon. (Proverbs 29:25; Daniel 4:19-25; 5:22-28) Staka pipol savve Daniel hem waka hard, honest, and man fit for trustim. (Daniel 6:4) Big samting wea Daniel duim, hem stand strong and willing for dae, and diswan showimaot hem barava trustim Jehovah. (Proverbs 3:5, 6; Daniel 6:23) Dastawe God tingim Daniel hem “barava spesol”!

Maet iumi sei distaem hem moa isi for studyim Bible winim taem bilong Daniel. Olketa buk wea iumi garem distaem changem olketa big scroll wea stap long datfala taem. Distaem iumi garem full Bible, wea storyim wei wea samfala profesi bilong Daniel kamap tru. And iumi garem olketa nara buk for helpem iumi studyim Bible and duim research. * Waswe, iu iusim gud olketa buk hia? Waswe, iu markem taem for evritaem readim Bible and ting raonem? Taem iu duim olsem, bae iu kasem olketa gud samting olsem Daniel kasem. Iu bae garem strongfala faith and strongim wei wea iu fren witim Jehovah. Bible bae helpem iu, and bae iu luksavve God lovem iu.

Gohed for Prea and No Givap

Daniel hem prea long God evritaem. Hem askem God for olketa stret samting. Taem Daniel hem young, King Nebuchadnezzar bilong Babylon talemaot wanfala dream, wea sapos Daniel no savve explainim, hem mas dae. Stretawe Daniel askem Jehovah for helpem and protectim hem. (Daniel 2:17, 18) Samfala year bihaen, bikos Daniel luksavve hem no perfect, hem talemaot hao hemseleva and olketa Israelite barava sin againstim Jehovah, and hem askem Jehovah for forgivim olketa. (Daniel 9:3-6, 20) Taem Daniel no minim olketa samting wea God talem, hem askem God for helpem hem. Wanfala taem, angel wea visitim Daniel for helpem hem minim samting, sei long hem: “[God] herem toktok bilong iu.”—Daniel 10:12.

Faithful man Daniel no prea long God for askem olketa samting nomoa. Daniel 6:10 sei: “Thrifala taem insaed long day hem . . . prea and givim praise long God bilong hem, olsem hem savve duim evritaem.” Daniel tingim staka reason for thankiu and praisem Jehovah. Hem evritaem duim diswan. Tru tumas, prea hem important part long worship bilong Daniel.  Nomata pipol laek for killim hem dae, hem no fraet for gohed prea long Jehovah. Daniel hem man wea strong for prea, dastawe Jehovah lovem hem.

Prea hem wanfala naes present from Jehovah! No letem wanfala day go pas and iu no story long Dadi bilong iu long heven. No forget for talem thankiu and praisem hem for evri gud samting wea hem givim iu. No fraet for talem olketa wari and hevi wea iu kasem. Ting raonem hao Jehovah ansarem olketa prea bilong iu and talem hem iu tinghae long datwan. No hariap for finisim prea bilong iu. Taem iumi prea long Jehovah olsem, Jehovah showimaot love bilong hem long spesol wei. Diswan barava encouragem iumi for “gohed for prea and no givap”!—Romans 12:12.

Mekhae Long Nem Bilong Jehovah

Sapos wanfala man tingim hemseleva nomoa, hard for hem fren gud witim narawan. Semsem tu long wei wea iumi fren witim Jehovah. Daniel luksavve long diswan. Tingim hao hem barava laek for mekhae long nem bilong Jehovah.

Taem God ansarem prea bilong Daniel long wei wea hem showimaot and explainim dream bilong Nebuchadnezzar, Daniel sei: “Blessim nem bilong God for olowe, bikos evri wisdom and strong hem kam from God.” Gogo, taem Daniel explainim dream long Nebuchadnezzar, Daniel praisem Jehovah bikos Hem nomoa “showimaot mining bilong olketa secret.” Olsem tu, taem Daniel prea for God forgivim and sevem hem and olketa Israelite, hem prea olsem: “God bilong mi, . . . nem bilong iu stap long taon bilong iu and pipol bilong iu.”—Daniel 2:20, 28; 9:19.

Iumi garem staka chance for followim wei bilong Daniel for mekhae long nem bilong Jehovah. Taem iumi prea, iumi savve talem iumi barava laek for “nem bilong [God] for holy.” (Matthew 6:9, 10) Iumi mas no duim olketa nogud samting wea bae mekem pipol tok spoelem holy nem bilong Jehovah. Bat hem gud for iumi evritaem praisem Jehovah long wei for talem olketa narawan wanem iumi lanem saed long gud nius abaotem Kingdom bilong hem.

Hem tru, long world distaem, staka pipol no lovem and tingim olketa narawan. Bat iumi savve kasem comfort bikos iumi savve Jehovah barava lovem evriwan wea worshipim hem. Man wea raetem psalm sei: “Jehovah hem hapi long pipol bilong hem. Hem mekhae long olketa wea hambol long wei for sevem olketa.”—Psalm 149:4.

[Footnote]

[Blurb long page 29]

God showimaot hem lovem Daniel taem hem sendem angel Gabriel for strongim hem

[Blurb long page 31]

Wei wea Daniel study and prea evritaem barava helpem hem and mekem God lovem hem