Waswe, Kingdom Bilong God Hem Samting wea Stap Insaed Heart?

Long buk Jesus of Nazareth wea Pope Benedict XVI raetem, hem sei: “Taem heart bilong man hem lisin, datwan nao wei wea Kingdom bilong God hem kam.” Long tingting bilong samfala pipol, Kingdom bilong God hem olsem wanem Pope talem, wea hem wanfala change wea happen insaed man taem hem acceptim Jesus Christ and garem faith. Waswe, Kingdom bilong God hem samting wea change insaed ‘heart bilong iu nomoa’?

JESUS ting long Kingdom olsem samting wea barava important. Pope Benedict luksavve Kingdom hem “main samting wea Jesus preach abaotem.” Long tu-thri year wea Jesus duim ministry bilong hem, hem go long staka ples for “preachim datfala gud nius abaotem kingdom.” (Matthew 4:23) Olketa teaching and mirakol wea Jesus duim showimaot Kingdom hem no minim wei for biliv long God and obeyim hem. Kingdom hem wanfala gavman wea bae rul, judgem pipol, and mekem pipol kasem olketa blessing for olowe.

Gavman wea Rul and Judgem Pipol

Wanfala taem, tu-thri day bifor Jesus finisim ministry bilong hem, mami bilong James and John kam long Jesus and sei: “Letem tufala boy bilong mi sidaon witim iu taem iu rul long kingdom bilong iu, narawan long raet saed and narawan long left saed.” (Matthew 20:21) Mami bilong tufala no storyim samting wea stap insaed heart bilong tufala boy bilong hem. Hem savve datfala Kingdom hem minim wei for rul witim Jesus, and hem laekem tufala boy hia for insaed datfala sekson. Jesus promisim 11-fala aposol bilong hem finis olketa bae rul long datfala Kingdom and “sidaon long olketa throne” and “judgem” pipol witim hem. (Luke 22:30) Olketa follower bilong Jesus savve Kingdom bilong Jesus hem wanfala gavman wea bae rulim pipol.

Wanem nao tingting bilong nara pipol long taem bilong Jesus? Waswe, olketa tingse datfala Kingdom hem just wanfala samting insaed heart, or olketa expectim nara samting? Just bifor Pasova long 33 C.E. taem Jesus kam long Jerusalem antap long donkey, staka pipol singaot long hem: “Prea bilong mifala hem for plis sevem Son bilong David!” (Matthew 21:9) Why nao olketa singaot olsem? Luk olsem olketa luksavve Jesus nao Messiah wea God promisim and wea God bae givim wanfala Kingdom long hem. Olketa luksavve tu, hem bae rul for olowe and God bae mekem “hem king olsem dadi bilong hem, David.” Olketa barava luk forward for Kingdom bilong God sevem olketa, mekem olketa stap gud, and for lukim evri samting kamap stret.—Luke 1:32; Zechariah 9:9.

Olketa Blessing for Olowe

Nomata pipol long datfala taem no interest long ministry bilong Jesus, olketa savve long teaching bilong hem abaotem Kingdom. Taem Jesus redi for dae, wanfala criminal wea hange saed long hem ask strong olsem: “Jesus, plis, iu tingim mi taem iu king.” Wanem nao ansa bilong Jesus? Hem encouragem hem olsem: “Mi talem iu tru samting, Iu bae stap witim mi long Paradaes.”—Luke 23:42, 43.

Luk olsem datfala criminal bilivim hao bihaen Jesus laef bak, hem bae kasem or go insaed wanfala Kingdom. Jesus bae garem paoa and laek for mekem man hia laef bak, and helpem hem for changem wei bilong hem. Hem bae  duim sem samting tu for staka million pipol. So, from Jesus kasem paoa for rul long heven, bae hem iusim datfala Kingdom for mekem pipol wea stap long earth for kasem olketa blessing for olowe.—John 5:28, 29.

Kingdom wea Stap Midolwan Olketa

Jesus sei: “Kingdom bilong God hem stap midolwan long iufala.” Iumi savve lukim olketa toktok hia long Luke 17:21. Samfala Bible transleison sei, “datfala kingdom bilong God hem insaed iufala,” olketa nara transleson sei “witim iufala.” (Olsem example, lukim King James Version and The New English Bible.) Wanem nao Jesus minim taem hem talem datfala toktok?

Jesus talem olketa toktok hia long olketa Pharisee, wea hem wanfala sekson bilong Jew religion wea no laekem Jesus. Olketa followim tingting bilong olketa seleva abaotem Messiah and Kingdom bilong hem. Olketa tingse Messiah bae kam “witim olketa cloud bilong heven” olsem wanfala King for sevem olketa Jew from olketa bilong Rome and for mekem kingdom bilong Israel kamap gud moa. (Daniel 7:13, 14) Bat Jesus showimaot olketa garem rong tingting taem hem sei: “No evriwan bae luksavve kingdom bilong God hem kam.” Then hem sei: “Iu savve, kingdom bilong God hem stap midolwan long iufala.”—Luke 17:20, 21.

Nomata Jesus teachim pipol abaotem Kingdom and duim olketa mirakol wea showimaot hem nao bae King long datfala Kingdom, olketa Pharisee barava againstim hem bikos olketa no garem strefala tingting and faith. Olketa no bilivim Jesus nao Messiah. So Jesus tok stret long olketa and sei datfala Kingdom, wea God markem King for rulim, hem ‘stap midolwan olketa.’ Hem no askem olketa for lukluk insaed heart bilong olketa seleva. * Jesus and olketa disaepol bilong hem standap front long olketa. Hem sei: “Kingdom bilong God hem stap witim iufala.”—Luke 17:21, Contemporary English Version.

Kingdom wea Important Long Iu

Nomata Kingdom bilong God hem no samting wea stap insaed heart bilong iumi wea sin, hem shud samting wea important long iumi. Olketa teaching bilong Jesus and mirakol wea hem duim, hem for trae helpem pipol for garem faith long datfala Kingdom wea bae mekem trufala peace and gudfala living for kamap. Hem laekem olketa for garem faith wea bae mekem laef bilong olketa for kamap gud. Hem teachim olketa for prea olsem: “Dadi bilong mifala long heven, mifala laekem nem bilong iu for holy. Mifala laekem kingdom bilong iu for kam. Duim samting wea iu laek for duim long earth, olsem iu duim long heven.” (Matthew 6:9, 10) Staka pipol wea lisin long Jesus garem faith long wanem olketa herem, and start for followim Jesus bikos olketa laek for kasem olketa blessing from Kingdom bilong God.

Waswe, iu laek for garem faith olsem? Sapos olsem, wanem nao iu need for duim? Tingim first part long Sermon long Maunten wea Jesus sei: “Olketa wea luksavve olketa needim God bae hapi, bikos kingdom bilong God hem bilong olketa.” (Matthew 5:3) Hem bae gud tumas for studyim Bible witim Olketa Jehovah’s Witness wea givim iu disfala magasin! Then iu bae garem hope hao Kingdom hem no samting insaed heart bilong iu, bat hem wanfala gavman wea bae mekem trufala peace and gudfala living kamap for evriwan.

[Footnote]

[Blurb long page 11]

Waswe, Kingdom bilong God stap insaed heart bilong olketa wea bighed and barava againstim Jesus?