Samfala Ask Olsem . . .

Waswe, evri Christian wea faithful go long heven?

▪ Staka pipol savve long disfala naes toktok bilong Jesus: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.” (John 3:16) Waswe, Jesus minim evriwan wea faithful for worshipim Dadi bilong hem, Jehovah God, bae hapi for go long heven for laef olowe?

Tingim disfala toktok wea Jesus talem: “No eni man hem go ap long heven bat Son bilong man nao hem kam daon from heven.” (John 3:13) Datwan showimaot olketa wea faithful for worshipim God bifor olsem Noah, Abraham, Moses, and David no go long heven. (Acts 2:34) Sapos olsem, olketa go long wea? Olketa stap long grev wea hem olsem olketa sleep long dae, olketa no savve long eni samting, and weit for resurrection.—Ecclesiastes 9:5, 6; Acts 24:15.

Jesus nao first wan wea sei samfala bae go long heven bihaen olketa dae. Hem talem olketa aposol hem bae redyim ples for olketa long heven. (John 14:2, 3) Wanem hem talem hem niu samting for pipol bilong God. Long nara taem, aposol Paul storyim hao bihaen Jesus dae and go long heven, Jesus ‘mekem niufala road for olketa disaepol wea lead go long laef,’ and no eni man followim datfala road bifor.—Hebrews 10:19, 20.

Waswe, datwan minim start long datfala taem evriwan wea faithful go long heven? Nomoa, bikos olketa wea go long heven bae duim spesol waka and God chusim samfala man nomoa for duim datwan. Long lastfala naet bifor Jesus dae, hem sei olketa aposol bae “sidaon long olketa throne for [judge]” long Kingdom bilong hem long heven. So olketa bae garem waka for rul witim Jesus long heven.—Luke 22:28-30.

Samfala nara man tu bae duim datfala waka. Long wanfala vision, aposol John lukim Jesus long heven witim wanfala grup wea resurrect, and hem sei olketa hia ‘olketa king and olketa priest for rulim disfala earth.’ (Revelation 3:21; 5:10) Haomas pipol nao hem lukim? Olsem long evri gavman, samfala nomoa rul. Hem semsem tu witim datfala Kingdom long heven. Jesus, datfala Pikinini Sheepsheep bilong God rul witim 144,000 wea God “peim olketa from earth.”—Revelation 14:1, 4, 5.

Hem tru, 144,000 hem smol namba nomoa sapos iumi markem witim evriwan wea faithful long bifor and distaem. Bat hem mas olsem nao bikos 144,000 hia go long heven for duim wanfala spesol waka wea holy. Sapos iu laekem samwan for buildim haos bilong iu, waswe, bae iu askem evriwan wea savve build for duim datwan? Nomoa. Bae iu askem samfala nomoa. Long sem wei tu, God no chusim evriwan wea faithful for duim spesol waka for rul witim Christ long heven.

Datfala gavman long heven bae fulfillim firstfala plan bilong God for olketa man. Jesus and 144,000 wea rul witim hem bae lukaftarem waka for mekem earth kamap paradaes, wea staka pipol wea faithful bae hapi for laef olowe long hem. (Isaiah 45:18; Revelation 21:3, 4) Insaed datfala grup hem olketa wea God rememberim wea bae resurrect.—John 5:28, 29.

Evriwan wea faithful for worshipim Jehovah long bifor and distaem savve kasem nambawan present for laef olowe. (Romans 6:23) Samfala bae laef long heven for duim wanfala spesol waka, and staka narawan bae laef olowe long paradaes earth.