IUMI evriwan laekem pipol for lovem iumi. Waswe, iu laekem pipol for lovem iu tu?— * Bible story abaotem Dorcas. Hem wanfala woman wea staka pipol lovem hem tumas.

Dorcas stap long Joppa, wanfala taon wea klosap long Mediterranean Sea. Joppa hem samting olsem 56 kilometer nomoa from Jerusalem. Dorcas hem wanfala long olketa firstfala disaepol bilong Jesus.

Long tingting bilong iu, why nao evriwan lovem tumas Dorcas?— Iu savve, Bible sei hem duim staka gud samting for pipol and hem givim olketa naes present long olketa. Luk olsem, hem sewim olketa naes kaleko for olketa widow woman. Widow woman hem woman wea hasband bilong hem dae finis. Nara samting tu, Dorcas hem story abaotem trufala God, Jehovah long staka pipol. Datwan hem sem samting wea Jesus duim.

Waswe, iu savve long nogud samting wea happen long Dorcas?— Hem sik big  gogo hem dae. Olketa fren bilong hem sorre fogud. So olketa sendem tufala man long ples wea aposol Peter stap, wea hem samting olsem 16 kilometer. Tufala man hia talem Peter for kam kwiktaem. Taem Peter arrive long haos, hem go long rum antap wea olketa putim Dorcas. Olketa woman krae and showim long Peter olketa kaleko wea Dorcas sewim for olketa.

Then Peter talem evriwan for go aot long rum. Peter and olketa aposol duim finis samfala mirakol, bat no eniwan long olketa mekem man wea dae finis for laef bak. Long tingting bilong iu, wanem nao bae Peter duim?—

Peter nildaon klosap long Dorcas and hem prea long Jehovah. Then hem talem Dorcas for getap. And Dorcas start for getap nao! Peter holem hand bilong hem and helpem hem for standap. Then hem kolem kam olketa widow woman and olketa narawan for kam lukim Dorcas. Masbi evriwan hapi tumas, iaman?—

Hem gud for iumi tingim wanem iumi savve lanem from story abaotem Dorcas wea laef bak. Iumi lanem hao sapos iu helpem olketa narawan, olketa narawan bae lovem iu tu. Bat barava important samting nao God bae lovem iu and no forgetim iu. Hem bae nating forgetim olketa gud samting wea iu duim for olketa narawan. And hem bae mekem iu laef olowe and hapi long niu world wea olketa gudfala pipol nomoa stap.