Followim Faith Bilong Olketa

God Bilong Hem Comfortim Hem

ELIJAH ran long rain and hem gogo for dark nao. Hem barava farawe yet for hem kasem Jezreel, and hem no young man tu. Nomata olsem, hem strong nomoa for ran bikos “Jehovah givim hem paoa.” Long datfala taem, masbi hem feel olsem hem strong winim eni narataem. Hem just tekovarem nomoa olketa horse wea pullim chariot bilong King Ahab!—1 Kings 18:46.

Gogo, King Ahab barava bihaen kam nao. Elijah hem gogo firstaem and ples wea hem go for hem farawe yet. Taem Elijah gohed for ran, hem gohed for rain, and rain go long eye bilong hem. Elijah hem tingim moa olketa samting wea just happen long datfala day. Olketa samting wea happen long datfala day showimaot God bilong Elijah, Jehovah, hem trufala God. Elijah hem farawe nao from Maunt Carmel and hem no savve lukim tu bikos hem rain big. Long datfala hae maunten, Jehovah showimaot long mirakol wei hem nao trufala God and Baal hem laea god nomoa. From datwan, Elijah talem olketa Israelite for killim dae staka handred profet bilong Baal. Then bihaen, Elijah prea long Jehovah for mekem hem rain, bikos hem no rain for thri and haf year long datfala ples. Then hem rain nao! *—1 Kings 18:18-45.

Elijah mas ran for 30 kilometer for kasem Jezreel. Taem hem ran long datfala road wea fulap long wata maet hem tingse evri samting bae olraet nao. Hem tingse Ahab bae changem wei bilong hem! Evri samting wea Ahab lukim shud mekem hem for stop for worshipim Baal, stretem tingting bilong waef bilong hem, Queen Jezebel, and stop for spoelem pipol bilong Jehovah.

Taem evri samting gohed gud, hem wei bilong iumi man for tingse evri samting bae olraet nao. Maet iumi tingse evri problem bilong iumi bae finis tu. Hem fitim nomoa for Elijah ting olsem bikos “hem man wea olsem iumi nomoa.” (James 5:17) Bat, olketa problem bilong Elijah no finis yet. Tru samting nao, no longtaem bihaen nomoa Elijah bae fraet fogud, wikdaon, and laek for dae. Wanem nao happen? And wanem nao Jehovah duim for strongim faith bilong profet bilong hem and for helpem hem for no fraet? Iumi bae storyim.

Samting wea Elijah No Tingim Happen

Taem Ahab kasem haos bilong hem long Jezreel, waswe, hem showimaot hem repent? Bible sei: “Ahab storyim long Jezebel evri samting wea Elijah duim and abaotem hao Elijah killim dae olketa profet long sword.” (1 Kings 19:1) Ahab storyim nomoa Elijah, and hem no storyim wanem Jehovah duim. From Ahab no followim tingting bilong God, hem ting long olketa mirakol samting wea happen olsem samting ‘wea Elijah nomoa duim.’ Datwan showimaot olketa samting wea happen nating mekem Ahab for respectim Jehovah God. And wanem nao rabis woman Jezebel duim?

Hem kros fogud! Hem sendem man for talem disfala nius long Elijah: “Sapos tumoro long semtaem mi no killim iu dae olsem iu  killim dae olketa profet, letem olketa god killim mi dae tu!” (1 Kings 19:2) Jezebel laekem tumas for killim dae Elijah. Hem olsem Jezebel mekem promis for hem dae sapos tumoro hem no killim dae Elijah for changem bak wanem Elijah duim long olketa profet bilong Baal. Tingim, Elijah sleep gud long wanfala haos long Jezreel and hem gohed for rain long datfala naet. Then seknomoa wanfala man hem wekapem hem and talem datfala nogud nius bilong queen. Hao nao datfala nius affectim hem?

Hem Wikdaon and Fraet

Sapos Elijah tingse klosap nao no eniwan bae worshipim Baal long datfala ples, datfala nogud nius barava mekem hem wiki. Olketa samting wea happen nating changem tingting bilong Jezebel. Hem killim dae finis staka nara faithful profet bilong Jehovah and luk olsem hem bae killim dae Elijah tu. Bible sei: “[Elijah] fraet fogud.” Waswe, Elijah tingim nogud wei wea Jezebel laek for killim hem dae? Sapos hem gohed for tingim kaen samting olsem, iumi savve minim why nao hem fraet. So Elijah “ranawe mekem Jezebel no killim hem dae.”—1 Kings 18:4; 19:3.

Samfala narawan wea faithful for worshipim Jehovah bifor tu fraet olsem Elijah. Aposol Peter tu hem fraet samfala taem. Tingim taem Jesus mekem Peter for wakabaot long sea witim hem, Peter start for “lukim strongfala wind.” Datwan mekem hem fraet and hem start for sink daon. (Matthew 14:30) Iumi savve lanem important samting from example bilong Peter and Elijah. Sapos iumi laek gohed strong and no fraet, iumi mas no gohed tingim olketa samting wea mekem iumi fraet. Iumi mas gohed for trustim Jehovah wea givim iumi hope and strongim iumi.

“Diswan Hem Tumas Nao!”

From Elijah fraet, hem ranawe go long Beer-sheba, wanfala taon long Judah, wea hem samting olsem 150 kilometer for kasem long there. Hem lusim wakaman bilong hem long Beer-sheba and then hem go seleva long wilderness. Bible sei Elijah hem “wakabaot for wanfala day,” so maet hem lusim datfala taon taem sun kamap. Luk olsem hem no tekem eni kaikai. Hem wikdaon, hem fraet tumas, and hem stragol for wakabaot long datfala ples wea no garem road and sun hem barava hot tu. Long evening, taem sun isisi go daon, Elijah barava wiki nao. Hem taed tumas so hem sidaon andanit long wanfala broom tree.—1 Kings 19:4.

Elijah barava no savve wanem for duim so hem prea strong long God. Hem talem God  hem laek dae nao. Hem sei: “Mi semsem nomoa olsem olketa laen dadi bilong mi.” Hem savve olketa laen dadi bilong hem dae finis and kamap graon and bon nomoa long grev, and olketa no savve duim gud samting for eniwan. (Ecclesiastes 9:10) Elijah feel iusles olsem olketa tu iusles. Dastawe hem singaot olsem: “Diswan hem tumas nao!” Hem tingse hem shud dae nao.

Waswe, iumi shud sapraes bikos man wea worshipim God hem wikdaon olsem? Nomoa. Bible storyim staka faithful man and woman wea sorre tumas gogo olketa laek for dae tu. Samfala nao Rebekah, Jacob, Moses, and Job.—Genesis 25:22; 37:35; Numbers 11:13-15; Job 14:13.

Distaem iumi stap long taem wea “hem barava difren and bae evri samting hem hard tumas.” Dastawe iumi shud no sapraes sapos samfala taem pipol feel wikdaon, nomata olketa wea worshipim God tu. (2 Timothy 3:1) Sapos enitaem iu kasem barava hard taem olsem, followim example bilong Elijah long wei for talem evri feeling bilong iu long God. Iumi savve Jehovah “hem God wea givim iumi comfort wea iumi needim.” (2 Corinthians 1:3) Waswe, hem comfortim Elijah?

Jehovah Lukaftarem Profet Bilong Hem

Long tingting bilong iu, hao nao feeling bilong Jehovah taem hem lukim profet wea hem lovem hem leidaon andanit wanfala tree long wilderness and hem sei hem laek for dae? Bible helpem iumi for savve long feeling bilong Jehovah. Taem Elijah hem sleep, Jehovah sendem wanfala angel for go story witim hem. Datfala angel tasim Elijah and isisi wekapem hem. Hem sei long Elijah: “Iu wekap for iu kaikai.” Elijah wekap and kaikaim fresh bred wea hot yet and drinkim wata wea angel redyim for hem. Waswe, hem thankiu long angel? Bible talem nomoa hem kaikai, drink finis, and then hem sleep bak moa. Luk olsem hem no laek story bikos hem wari tumas. Bible sei datfala angel wekapem hem mek-tu taem, maet long early morning. Hem sei moa long Elijah, “Iu wekap for iu kaikai bikos iu no strong for go long disfala gogo.”—1 Kings 19:5-7.

God helpem datfala angel for savve wea nao Elijah laek for go long hem. Hem savve tu samwan mas helpem Elijah mekem hem strong for go kasem datfala ples. Iumi hapi for worshipim God wea savve gud long wanem iumi laek for duim and wanem iumi no fit for duim! (Psalm 103:13, 14) Waswe, datfala kaikai strongim Elijah?

Bible hem sei: “Hem getap, kaikai and drinkim wata, and datfala kaikai strongim hem for gohed for foti day and foti naet for go kasem Horeb, wea hem maunten bilong trufala God.” (1 Kings 19:8) Elijah no kaikai for 40 day and 40 naet. Six handred year bifor Moses duim sem samting, and samting olsem 1,000 year bihaen, Jesus tu duim datwan. (Exodus 34:28; Luke 4:1, 2) Elijah garem yet olketa problem, bat datfala kaikai strongim hem long mirakol wei for kasem ples wea hem go long hem. Datfala olo man wakabaot long wilderness wea no garem road for 40 day nomata hem no isi!

Distaem tu Jehovah lukaftarem olketa wea worshipim hem. Hem no provaedem kaikai for olketa long mirakol wei, bat hem lukaftarem olketa long wanfala important wei. Hem provaedem spiritual kaikai for olketa wea worshipim hem. (Matthew 4:4) Bible and  olketa Bible pablikeson savve helpem iumi for fren witim God. Spiritual kaikai maet no savve finisim olketa problem bilong iumi, bat hem savve strongim iumi for winim olketa hard taem. Hem savve helpem iumi tu for kasem “laef olowe.”—John 17:3.

Elijah wakabaot samting olsem 320 kilometer for kasem Maunt Horeb. Longtaem bifor long datfala ples, Jehovah God iusim wanfala angel for story long Moses from tree wea gohed for bone, and long narataem bihaen, Jehovah mekem Law covenant witim Israel. Long there tu Elijah faendem ples for stap long wanfala cave.

Wanem Jehovah Duim for Comfortim and Strongim Elijah

Long Maunt Horeb, Jehovah iusim wanfala angel for askem Elijah disfala kwestin: “Elijah iu kam long hia for eni samting?” Luk olsem datfala angel askem Elijah long kaenfala wei bikos Elijah feel free for talemaot evri samting wea hem wari abaotem. Hem sei: “Mi worshipim Jehovah nomoa, God wea komanda bilong olketa angel long heven. Olketa Israelite no followim nao covenant bilong iu, olketa smasem finis olketa altar bilong iu, olketa killim dae finis olketa profet bilong iu long sword, and mi nomoa stap. And olketa lukaotem mi tu for killim mi dae.” (1 Kings 19:9, 10) Wanem Elijah talem showimaot thrifala samting wea mekem hem feel wikdaon.

First samting, Elijah feel olsem hem iusles nomoa for worshipim God. Nomata Elijah “worshipim Jehovah nomoa” and for staka year finis hem mekhae long nem bilong God, hem lukim staka pipol bighed, no faithful, and staka gohed yet for worshipim olketa laea god. Mek-tu samting, taem Elijah sei “mi nomoa stap,” hem tingse hemseleva nomoa worshipim Jehovah long Israel long datfala taem. Mek-thri samting, Elijah hem fraet. Jezebel killim dae finis staka nara profet, and Elijah tingse Jezebel bae killim hem dae tu. Elijah no letem wei for praod or feel shame for no talemaot evri feeling bilong hem long God, nomata maet hem no isi for hem duim olsem. Wei wea Elijah prea olsem showimaot gudfala example for evriwan wea faithful for worshipim God.—Psalm 62:8.

Wanem nao Jehovah duim for helpem Elijah for no fraet and no wari tumas? Datfala angel talem Elijah for go standap front long cave. Elijah duim datwan, nomata hem no savve wanem nao bae happen. Seknomoa hem big wind nao! Masbi wind hia barava mek noise tumas bikos hem strong tumas and hem smasem olketa maunten. Tingim Elijah taem hem trae for kavarem feis bilong hem and holem strong kaleko bilong hem. Then hem mas stragol for standap strong bikos earthquake mekem graon  seksek fogud! Then seknomoa bigfala fire go pas and Elijah kwiktaem go bak insaed long cave mekem fire no bonem hem.—1 Kings 19:11, 12.

Bible sei Jehovah no insaed long datfala wind, earthquake, and fire. Elijah savve Jehovah hem no wanfala laea god olsem Baal. Olketa wea worshipim Baal tingse Baal hem god bilong rain. Jehovah nao hem wakem evri samting hia and hem garem bigfala paoa winim olketa samting wea hem wakem. Nomata universe hem big bat hem no big fitim Jehovah! (1 Kings 8:27) Long wanem wei nao thrifala samting wea happen helpem Elijah? Tingim hao Elijah hem fraet. Jehovah God wea garem bigfala paoa lukaftarem Elijah, so hem shud no fraetem Ahab and Jezebel!—Psalm 118:6.

Bihaen fire go pas, evri samting barava kwaet and Elijah herem wanfala “kaenfala voice.” Datfala voice askem Elijah for talemaot feeling bilong hem moa and Elijah duim datwan for mek-tu taem. * Maet hem feel gud bikos hem savve duim olsem. Masbi Elijah hapi tumas for herem wanem datfala “kaenfala voice” talem moa long hem. Jehovah helpem Elijah for luksavve Jehovah tinghae long hem. Hao nao Jehovah duim datwan? Hem talem Elijah staka samting abaotem plan bilong hem for finisim olketa wea worshipim Baal long Israel. Tru tumas, Elijah no hard waka nating, plan bilong God hem gohed for fulfill and no eni samting savve stopem. Nara samting tu, Jehovah laek iusim Elijah yet for fulfillim plan bilong hem, and hem talem Elijah for duim samfala nara samting moa.—1 Kings 19:12-17.

Wanem nao Jehovah duim from Elijah tingse hemseleva nomoa worshipim hem? Jehovah duim tufala samting. First samting, hem talem Elijah for chusim Elisha for kamap profet wea bae gogo hem changem Elijah. Elisha wea hem young yet bae kamap fren bilong Elijah and bae helpem hem for staka year. Datfala nius barava encouragem Elijah! Mek-tu samting, Jehovah talem hem disfala barava naes nius: “Mi letem seven thousand pipol for stap laef long Israel. Olketa no baodaon long Baal and no worshipim hem.” (1 Kings 19:18) Hem no Elijah nomoa wea worshipim God. Hem mas hapi tumas for savve staka thousand pipol tu gohed faithful for worshipim God. Elijah mas showimaot gudfala example for olketa long wei for gohed worshipim Jehovah nomoa, bikos staka pipol long datfala taem no faithful long God. Masbi wanem datfala angel bilong Jehovah talem, wea hem datfala “kaenfala voice,” barava comfortim Elijah. Elijah hem feel olsem God nao story kam long hem.

Maet iumi tu olsem Elijah wea barava tinghae long bigfala paoa bilong olketa samting wea God wakem, and hem stret for iumi ting olsem. Olketa samting wea God wakem showimaot paoa bilong hem. (Romans 1:20) Distaem tu Jehovah laek for iusim bigfala paoa bilong hem for helpem olketa wea faithful for worshipim hem. (2 Chronicles 16:9) Iumi lane abaotem God long olketa samting wea hem wakem, bat main wei iumi savve lane abaotem God nao hem long Bible. (Isaiah 30:21) So, hem olsem Bible nao “kaenfala voice” wea Jehovah iusim for leadim iumi distaem, for stretem iumi, encouragem iumi, and helpem iumi for savve God lovem iumi.

Waswe, samting wea Jehovah duim for comfortim Elijah long Maunt Horeb strongim hem? Barava nao! No longtaem bihaen, hem gohed moa for duim waka bilong Jehovah, and hem strong moa for againstim olketa wea duim false worship. Iumi savve followim faith bilong Elijah sapos iumi tu trustim wanem God talem long Bible for “givim iumi comfort.”—Romans 15:4.

[Olketa Footnote]

[Piksa long page 11]

Jehovah lukaftarem gud Elijah long olketa gud taem and hard taem

[Piksa long page 12]

Taem Elijah wari tumas, hem talem evri feeling bilong hem long Jehovah

[Piksa long page 13]

Jehovah iusim bigfala paoa bilong hem for comfortim and encouragem Elijah