Lanem Wanem Bible Talem

Hao Nao Bae Iu Luksavve Long Tru Religion?

Disfala article storyim olketa kwestin wea pipol tingim and olketa ansa wea iu savve readim long Bible bilong iu. Olketa Jehovah’s Witness hapi tumas for storyim olketa ansa hia witim iu.

1. Waswe, wanfala religion nomoa hem tru?

Jesus teachim wanfala religion nomoa long olketa disaepol. Datwan nao trufala religion. Hem olsem wanfala road wea leadim pipol for kasem laef olowe. Jesus sei olsem abaotem datfala road: “Samfala pipol nomoa faendem . . . datfala road.” (Matthew 7:14) God acceptim nomoa pipol wea worshipim hem followim wanem Bible talem. Evriwan wea worshipim God long stretfala wei wan mind for bilivim sem samting.—Readim John 4:23, 24; 14:6; Ephesians 4:4, 5.

2. Why nao pipol long staka religion sei olketa Christian?

Olketa laea teacher changem teaching bilong Jesus and iusim datwan for duim wanem olketa seleva laekem. Jesus sei olketa hia bae mekem pipol tingse olketa hambol and kaen olsem “sheepsheep,” batawea wei bilong olketa hem olsem wild dog. (Matthew 7:13-15, 21, 23) Olketa laea Christian kamap staka bihaen olketa aposol dae.—Readim Acts 20:29, 30.

3. Wanem nao samfala samting wea olketa tru Christian duim?

Olketa tru Christian bilivim Bible hem kam from God. Olketa traem best for followim olketa Bible principle and no followim tingting bilong olketa man. (Matthew 15:7-9) Olketa tru Christian no talem wanfala samting and duim difren samting.—Readim John 17:17; 2 Timothy 3:16, 17.

Olketa tru Christian mekhae long nem bilong God, Jehovah. Jesus teachim pipol for savve long nem bilong God. Hem helpem pipol for savve long God and teachim olketa for prea for nem bilong God holy. (Matthew 6:9) Which religion nao teachim pipol abaotem nem bilong God?—Readim John 17:26; Romans 10:13, 14.

 4. Hao nao bae iu luksavve long olketa tru Christian?

Olketa tru Christian preach abaotem Kingdom bilong God. God sendem Jesus kam long earth for preach abaotem Kingdom. Kingdom bilong God nomoa bae stretem evri problem bilong olketa man. Jesus evritaem story abaotem datfala Kingdom. (Luke 4:43; 8:1; 23:42, 43) Hem talem olketa disaepol for preach abaotem Kingdom bilong God. Sapos samwan story long iu abaotem Kingdom bilong God, long tingting bilong iu, hem bilong wanem religion?—Readim Matthew 10:7; 24:14.

Olketa disaepol bilong Jesus no olsem pipol long world. Olketa no joinim politik or olketa raoa bilong pipol long kantri. (John 17:16) Olketa no followim nogud wei bilong pipol long world.—Readim James 1:27; 4:4.

5. Wanem nao main wei bilong olketa tru Christian?

Olketa tru Christian lovem each other. Wanem olketa lanem from Bible helpem olketa for respectim evri difren kaen pipol. Staka taem olketa laea religion strong for sapotim war, bat olketa tru Christian no duim datwan. (Micah 4:1-4) Pipol wea followim tru religion iusim taem and wanem olketa garem for helpem and encouragem olketa narawan.—Readim John 13:34, 35; 1 John 4:20, 21.

Which religion nao teachim nomoa wanem Bible talem, mekhae long nem bilong God, and talem Kingdom bilong God nomoa savve stretem evri problem bilong olketa man? Which religion nao lovem each other and no sapotim war? Staka bae sei hem Olketa Jehovah’s Witness.—1 John 3:10-12.

For savve moa, lukim chapter 15 long disfala buk Wanem Nao Really Samting wea Bible Teachim? wea Olketa Jehovah’s Witness pablisim.

[Piksa long page 16]

“Olketa sei olketa savve long God, bat samting wea olketa duim showimaot olketa nating savve long hem.”—Titus 1:16