Hu Nao Shud Teachim Pikinini Abaotem God?

“Student hem no winim teacher bilong hem. Bat student wea teacher barava lanem hem gud, bae hem olsem teacher bilong hem nao.”—LUKE 6:40.

SAMFALA dadi and mami tingse olketa no fit for teachim olketa pikinini abaotem God. Maet olketa ting olsem bikos olketa no skul gud or olketa no savve gud abaotem God and religion. From datwan, maet olketa askem wanfala relative or wanfala bigman long religion for duim datfala important waka.

So hu nao shud teachim olketa pikinini abaotem God and abaotem wanem hem stret and no stret? Bae iumi storyim wanem Bible talem abaotem hu nao shud teach, and wanem olketa savveman faendemaot.

Wanem Nao Waka Bilong Dadi?

Wanem Bible talem: “Olketa dadi, no mekem olketa pikinini bilong iufala for kros, bat lukaftarem olketa gud long wei for trainim olketa followim samting wea Lord talem.”—Ephesians 6:4, “Holman Christian Standard Bible.”

Wanem olketa savveman faendemaot: Hem gud for olketa dadi garem strongfala biliv abaotem God. Disfala article Fathers’ Religious Involvement and Early Childhood Behavior, wea olketa pablisim long 2009 hem sei: “Maet wei for olketa man garem religion savve helpem olketa for kamap gudfala dadi. Olketa narawan long religion savve sapotim olketa and  samting wea olketa lanem helpem olketa for garem olketa gudfala wei.”

Bible hem sei waka bilong dadi for lukaftarem and trainim olketa pikinini hem important tumas. (Proverbs 4:1; Colossians 3:21; Hebrews 12:9) Bat waswe, datfala kaonsel hem fitim distaem tu? Long 2009, University of Florida pablisim wanfala article wea storyim gud samting wea olketa pikinini kasem from dadi bilong olketa duim gud waka bilong hem long famili. Olketa faendemaot staka long olketa pikinini hia garem wei for minim feeling bilong narawan and garem stretfala tingting abaotem olketa seleva. Olketa boy no savve noti tumas, and staka taem olketa gele garem gudfala tingting. Tru tumas, advaes long Bible fitim distaem tu.

Waswe, Waka Bilong Mami Hem Important?

Wanem Bible talem: “No lusim law bilong mami bilong iu.”—Proverbs 1:8.

Wanem olketa savveman faendemaot: Long 2006 disfala Handbook of Child Psychology hem sei olketa mami iusim staka taem winim olketa dadi for lukaftarem and story witim olketa pikinini. Datwan hem semsem tu long staka kantri. From olketa mami iusim staka taem witim olketa pikinini, wanem mami talem, duim, and wei bilong hem savve affectim pikinini long bigfala wei.

Taem mami and dadi waka tugeta for teachim pikinini bilong tufala tru samting abaotem God, olketa pikinini kasem tufala spesol samting. First samting, olketa pikinini savve fren witim Dadi bilong olketa long heven. Datwan savve mekem olketa kasem gud samting for full laef bilong olketa. Mek-tu samting, olketa lane from gudfala example bilong mami and dadi long hao hasband and waef shud waka tugeta for kasem olketa important goal. (Colossians 3:18-20) Olketa narawan savve helpem dadi and mami, bat tufala nao garem responsibility for teachim pikinini bilong tufala abaotem God and abaotem hao God laekem famili for waka tugeta.

Bat wanem nao best wei for dadi and mami teachim olketa pikinini?