Samfala Ask Olsem . . .

Waswe, God Favorim Samfala Pipol Nomoa?

▪ Nomoa, Bible hem sei: “God hem no favorim eniwan. Long evri kantri long world, sapos man worshipim God and duim samting wea stret, God bae hapi long hem.”—Acts 10:34, 35.

Tingting bilong God hem barava difren from tingting bilong olketa man. Staka pipol tingse samfala pipol gud winim nara pipol bikos long kala skin bilong olketa, lukluk bilong olketa, and kantri wea olketa kam from. Olketa garem semkaen tingting olsem Charles Darwin. Hem sei: “Long tingting bilong mi, long future, . . . pipol long olketa kantri wea garem gudfala living and bigfala savve bae killim dae evri pipol long kantri wea no garem bigfala savve and olketa raf tumas.” Samfala pipol wea tingse olketa gud winim olketa narawan barava spoelem staka pipol.

Waswe, olketa scientist faendemaot samfala pipol gud winim nara pipol? Nomoa. Bryan Sykes, man for studyim DNA wea teach long Oxford University, hem sei: “Hem no stret for sei DNA nao mekem samfala pipol gud winim nara pipol. . . . Staka pipol askem mi sapos pipol long Greece garem wankaen DNA or pipol long Italy garem narakaen DNA. Mifala no faendem datwan. DNA bilong evri pipol klosap semsem nomoa.”

Wanem datfala scientist talem hem stret witim wanem Bible talem. Iumi lanem long Bible hao God wakem wanfala man and woman nomoa, and iumi evriwan kam from laen bilong tufala. (Genesis 3:20; Acts 17:26) So long tingting bilong God, iumi evriwan semsem nomoa.

Jehovah no ting long kala skin or lukluk bilong man olsem hem important. Bat samting wea important long hem nao, iumi wanem kaen man. Hem sei: “Pipol ting long olketa narawan followim lukluk bilong olketa, bat mi ting long pipol followim wanem mi lukim long heart bilong olketa.” (1 Samuel 16:7, Contemporary English Version) Long wanem wei nao datfala toktok savve barava encouragem iumi?

Maet iumi no hapi witim lukluk bilong iumi, bat iumi hard for changem datwan. Nomata olsem, iumi savve changem tingting bilong iumi. (Colossians 3:9-11) Maet samfala taem iumi tingse iumi gud winim nara pipol, or nara pipol nao gud winim iumi. Kaen tingting olsem no followim tingting bilong God, so iumi shud traem best for changem tingting bilong iumi.—Psalm 139:23, 24.

Jehovah bae helpem iumi for garem sem tingting olsem hem abaotem iumiseleva and olketa narawan. Bible sei: “Jehovah lukluk gud long evri samting long world, mekem hem savve givim paoa long olketa wea lovem hem long full heart.” (2 Chronicles 16:9) Jehovah bae duim olsem long evri difren kaen pipol.