Waswe, Hem Stret for Teachim Pikinini Abaotem God?

“Staka religion no teachim pipol for lovem narawan, bat olketa mekem pipol for heitim narawan.”—JONATHAN SWIFT, MAN FOR RAET FROM ENGLAND.

NOMATA Jonathan Swift talem datfala toktok long mek-18 century, staka pipol distaem tu agree long datwan. Long samfala kantri pipol tingse dadi and mami shud no teachim olketa pikinini abaotem God. Olketa tingse hem nogud for olketa dadi and mami lanem pikinini abaotem God.

Long tingting bilong iu, which wan long fofala point hia nao hem here stret?

● Dadi and mami shud no teachim olketa pikinini abaotem God.

● Dadi and mami shud teachim olketa pikinini abaotem God taem olketa big.

● Dadi and mami shud teachim olketa pikinini abaotem God taem olketa smol. Then taem olketa big, dadi and mami shud encouragem olketa for ting raonem wanem olketa lanem.

● Pikinini mas garem sem religion olsem dadi and mami.

Waswe, Hem Gud for Pikinini Lane Abaotem God?

No eni dadi and mami laekem pikinini for kasem nogud samting. For staka year finis, olketa savveman studyim sapos hem gud for mami and dadi teachim pikinini abaotem God, or nomoa. Wanem nao olketa faendemaot?

Olketa faendemaot hem gud for olketa pikinini lane abaotem God. Long 2008 wanfala report long magasin Social Science Research * hem sei: “Wei for lane abaotem God savve helpem pikinini fren gud witim mami and dadi.” Datfala report sei tu: “Luk olsem hem important for olketa pikinini lane abaotem God and for luksavve olketa needim God, and datwan bae helpem famili fren gud tugeta.” Jesus storyim sem kaen samting taem hem sei: “Olketa wea luksavve olketa needim God bae hapi.”—Matthew 5:3.

Waswe long wei wea pipol tingse olketa pikinini shud big firstaem bifor dadi and mami teachim olketa abaotem God and religion? Olketa wea garem datkaen tingting no tingim disfala tru samting: Mind bilong pikinini hem olsem wanfala baket wea emti and man savve putim eni samting insaed. Dadi and mami shud fulimap datfala “baket” long olketa principle saed long fasin wea tufala savve hem stret, and no letem nara pipol fulimap mind and heart bilong pikinini long evri difren kaen nogud idea long world.

Teachim Pikinini for Lovem Narawan

History showimaot olketa difren kaen biliv long religion savve mekem pipol heitim olketa narawan. Hao nao olketa dadi and mami savve teachim olketa pikinini for lovem olketa narawan and no heitim olketa?

For savve hao for teachim pikinini for lovem narawan, iumi bae storyim thrifala samting hia: (1) Wanem olketa pikinini shud lanem. (2) Hu nao shud teachim olketa? (3) Wanem wei for teach nao hem best?

[Footnote]