3 God Savve Pei Bak Waswe Hem Tru?
3 God Savve Pei Bak—Waswe Hem Tru?
Maet iu herem: “God rememberim evri sin wea pipol duim and panisim olketa for olowe long hellfire.”
“God iusim olketa natural disaster for panisim pipol wea duim sin.”
Samting Bible teachim: Bible sei long 2 Peter 3:9, Jehovah “no laekem eniwan for dae bat hem laekem evriwan for garem chance for repent.” Hem no lukluk long olketa mistek bilong iumi bat hem lukluk long olketa gud samting abaotem iumi. Eye bilong God “lukluk gud long evri samting long world, mekem hem savve givim paoa long olketa wea lovem hem long full heart.”—2 Chronicles 16:9.
Bible no teachim God panisim man long hellfire. Kaen idea olsem barava nogud tumas long tingting bilong God. Panis wea hem givim long olketa nogud man nao hem finisim laef bilong olketa. (Jeremiah 7:31; Romans 6:7) Olketa natural disaster wea killim dae gud and nogud pipol no kam from God, bat olketa samting wea seknomoa happen savve kasem eniwan.—Ecclesiastes 9:11.
Savve long truth helpem iu: Taem iumi savve God “willing for forgive” and no kwiktaem for judgem man, datwan mekem iumi laek fren witim hem. (Psalm 86:5) So iumi no worshipim God from iumi feel guilty or iumi fraet nogud hem panisim iumi, bat from iumi lovem Jehovah iumi savve garem faith long hem and iumi laek for duim best bilong iumi for mekem hem hapi.—Matthew 22:36-38; 1 John 5:3.
Nomata God laekem evriwan for change and duim gud samting, hem savve staka pipol bae no duim datwan. Sapos hem no panisim olketa wea duim nogud samting and wea no laek for change, diswan savve mekem wei wea pipol safa and wei for no followim justice hem gohed for olowe. Hem olsem wanfala ruler wea putim olketa law bat hem no mek sure pipol followim olketa law hia. (Ecclesiastes 8:11) From iumi savve God bae no letem olketa nogud samting gohed for olowe, datwan mekem iumi garem strongfala hope for future. God promis for finisim evriwan wea gohed for duim nogud samting, mekem “olketa wea hambol” savve laef olowe long earth, wea datwan nao plan bilong hem long firstaem.—Psalm 37:10, 11, 29. *
[Footnote]
^ par. 7 For savve moa samting abaotem wanem God bae duim for mekem earth kamap paradaes, lukim chapter 3 and 8 long buk, Wanem Nao Really Samting wea Bible Teachim?
[Blurb long page 6]
Waswe, God laekem iumi for worshipim hem bikos iumi fraet nogud hem panisim iumi?
[Piksa Credit Line long page 6]
Engravings by Doré
