Fren Gud Witim God

Duim Wanem God Sei Iumi Mas Duim

WASWE, enitaem iu tingting abaotem disfala kwestin: ‘Why nao iumi laef?’ Jehovah wakem iumi for laek savve long ansa bilong datfala kwestin. Iumi hapi bikos God helpem iumi for savve long ansa. Ansa hem stap long Bible. Bae iumi storyim toktok bilong King Solomon long Ecclesiastes 12:13.

God givim Solomon bigfala wisdom, staka rich samting, and paoa for rul, and hem studyim living bilong olketa man and why olketa man laek for kasem staka rich samting and garem bignem. (Ecclesiastes 2:4-9; 4:4) So Solomon fit for storyim wanem man mas duim for hapi, and why iumi laef. Hem sei best samting wea man savve duim nao diswan: “Fraet long trufala God and obeyim olketa law bilong hem. Diswan nao hem samting wea olketa man mas duim.” Hem nao samting wea bae mekem man satisfae and hapi.

“Fraet long trufala God.” Maet man konfius taem hem herem disfala toktok “fraet long God.” Bat diswan hem gudfala wei for fraet long God. Wei for fraet long God hem olsem pikinini wea laekem tumas for mekem dadi wea lovem hem hapi, no olsem wakaman wea fraet for mekem raf boss bilong hem kros. Wanfala buk sei wei for fraet long God hem “bigfala respect wea pipol bilong Hem showimaot long Hem, bikos olketa lovem Hem and tinghae long Hem and paoa wea Hem garem.” From iumi barava respectim hem olsem, datwan mekem iumi willing for duim wanem hem laekem bikos iumi lovem hem and iumi savve hem lovem iumi. Man no talem nomoa hem fraet long God, hem mas showimaot long wanem hem duim. Hao nao bae hem duim datwan?

“Obeyim olketa law bilong hem.” Wei for fraet long God mekem iumi laek for obeyim God. Wei for obeyim Jehovah nao hem stret samting for iumi duim. From hem wakem iumi, hem nao savve stretfala wei for iumi followim long laef, olsem man wea wakem wanfala samting hem savve gud long stretfala wei for iusim datwan. Jehovah laekem iumi for kasem gud samting tu. Hem laekem iumi for hapi, and wanem hem askem iumi for duim hem for helpem iumi. (Isaiah 48:17) Aposol John sei: “Samting wea showimaot iumi lovem God, hem taem iumi obeyim olketa law bilong hem, and olketa law bilong hem no hard tumas for obeyim.” (1 John 5:3) Wei wea iumi obeyim God showimaot iumi lovem hem, and olketa law bilong hem showimaot hem lovem iumi.

“Diswan nao hem samting wea olketa man mas duim.” Toktok hia showim long iumi wanfala important reason for fraet long God and obeyim hem. Iumi mas duim diswan bikos Jehovah nao wakem iumi. (Psalm 36:9) So iumi mas obeyim hem. Taem iumi duim wanem hem askem, iumi duim nao samting wea iumi mas duim.

So, why nao iumi laef? Iumi laef for duim wanem God laekem. Sapos iumi duim datwan, bae iumi hapi and satisfae. Waswe, iu laek for savve long samfala samting moa abaotem wanem Jehovah laekem iu for duim, and hao iu savve duim datwan? Olketa Jehovah’s Witness bae hapi tumas for helpem iu.