Lanem Wanem Bible Talem

Hao Nao Olketa Law Bilong God Helpem Iumi?

Disfala article story abaotem olketa kwestin wea pipol garem and hem showim olketa ansa from Bible. Olketa Jehovah’s Witness bae hapi tumas for storyim olketa samting hia witim iu.

1. Why nao iumi shud obeyim God?

From God nao wakem iumi, iumi shud obeyim hem. Jesus tu evritaem obeyim God. (John 6:38; Revelation 4:11) Taem iumi obeyim olketa law bilong God, datwan showimaot iumi lovem hem.—Readim 1 John 5:3.

Evri law bilong Jehovah helpem iumi. Olketa law bilong God helpem iumi for stap gud distaem and showim iumi wanem for duim mekem iumi savve kasem laef olowe long future.—Readim Psalm 19:7, 11; Isaiah 48:17, 18.

2. Hao nao olketa law bilong God savve helpem iumi saed long health?

Taem iumi followim law bilong God for no ova tumas long alcohol, datwan protectim iumi from olketa nogud sik and accident. Man wea ova tumas long alcohol bae start for depend long alcohol and duim olketa krangge samting. (Proverbs 23:20, 29, 30) Jehovah no stopem alcohol bat sapos iumi drinkim iumi mas no ova tumas.—Readim Psalm 104:15; 1 Corinthians 6:10.

Jehovah warnim iumi tu for no jealous, kontrolem kros, and no garem nogud tingting wea savve spoelem health bilong iumi. Wei for followim advaes hia savve helpem iumi saed long health.—Readim Proverbs 14:30; 22:24, 25.

3. Hao nao law bilong God protectim iumi?

Law bilong God stopem tufala wea no marit for duim sex. (Hebrews 13:4) Disfala law helpem hasband and waef for garem marit wea strong, and olketa pikinini bae feel sef tu. Taem pipol no followim disfala law, staka taem nogud samting nao kamaot from datwan olsem sik, divorce, man killim narawan, man barava feel nogud, and famili garem dadi or mami nomoa.—Readim Proverbs 5:1-9.

Sapos iumi stap klia long eni samting wea savve switim iumi for duim sex witim samwan wea iumi no maritim, bae iumi protectim wei wea iumi fren witim God and no spoelem olketa narawan tu.—Readim 1 Thessalonians 4:3-6.

 4. Hao nao wei for tinghae long laef helpem iumi?

Pipol wea tinghae long laef wea God givim kasem gud samting saed long health taem olketa stop for smoke and no tekem moa olketa drug. (2 Corinthians 7:1) Baby long bele bilong mami hem barava important long God. (Exodus 21:22, 23) So iumi mas no killim dae baby wea no born yet. Olketa wea tinghae long laef bae duim samting tu for protectim olketa seleva and nara pipol for no kasem accident long ples wea olketa waka, long haos, and long trak bilong olketa. (Deuteronomy 22:8) And tu, olketa no pleim sports wea mekem laef bilong olketa stap long danger, bikos laef hem wanfala present from God.—Readim Psalm 36:9.

5. Hao nao law wea sei blood hem holy helpem iumi?

God sei blood nao piksarem laef or soul bilong man and animal, so blood hem samting wea holy. (Genesis 9:3, 4) Law bilong God wea sei blood piksarem laef hem mekem iumi kasem gud samting. Long wanem wei? Hem mekem iumi fit for kasem forgiveness from God.—Readim Leviticus 17:11-13; Hebrews 9:22.

Blood bilong Jesus hem spesol, bikos hem perfect. Bihaen Jesus givim laef bilong hem olsem sakrifaes for olketa man, hem givim long God price bilong blood bilong hem wea piksarem laef bilong hem. (Hebrews 9:12) Price bilong blood bilong hem mekem iumi savve kasem laef olowe.—Readim Matthew 26:28; John 3:16.

For savve moa, lukim chapter 12 and 13 long disfala buk wea Olketa Jehovah’s Witness pablisim, Wanem Nao Really Samting wea Bible Teachim?