Hu Nao Savve Explainim Mining Bilong Profesi?

FROM bifor kam, olketa savveman trae for faendem ansa long olketa hard kwestin, explainim mining bilong olketa profesi and talemaot tu samting wea bae happen long future.

Staka taem olketa savveman hia faendem hem hard for duim datwan. Olsem example, Bible storyim olketa savveman bilong Babylon bifor, faendem hem hard for explainim mining bilong raeting wea stap long wall long haos bilong King Belshazzar. Wanfala hand nao raetem datfala profesi long wall taem wanfala big party gohed. Daniel nomoa, wea hem profet bilong Jehovah God, savve explainim mining bilong datfala profesi. (Daniel 5:12) Hem sei rul bilong Babylon bae finis, and datfala profesi hem kamap tru long datfala sem naet!—Daniel 5:1, 4-8, 25-30.

Profesi Hem Wanem?

Profesi hem toktok wea samwan talem or raetem abaotem samting wea bae happen long future. Profesi wea tru hem toktok wea kam from God, wea showimaot samting wea God laekem and plan for duim. Bible garem olketa profesi abaotem wanem taem nao Messiah bae kam and hu nao hem. And Bible garem olketa profesi tu abaotem ‘wanem nao saen wea showimaot world hem gogo for finis,’ and olketa message bilong judgment wea kam from God.—Matthew 24:3; Daniel 9:25.

Olketa savveman distaem saed long science, selen, health, politik, environment, and olketa nara samting talemaot wanem olketa tingse bae happen long future. Nomata olketa niuspepa and TV storyim samfala idea bilong olketa savveman hia, and pipol interest tumas long olketa, samting wea olketa savveman hia talem abaotem future hem tingting bilong olketa seleva nomoa. Nara samting tu, taem man talemaot eni idea wea hem garem, staka taem olketa narawan no agree witim datwan. So, wei wea man talem samting wea hem tingse bae happen long future, hem savve fail nomoa.

Profesi wea Tru Hem Kam From Hu?

Greek word wea olketa transleitim “explainim mining” hem minim “for faendem ansa, and for givimaot information” abaotem samting wea long bifor hem no klia or hem haed. So profesi wea tru hem kam from hu, and hu nao savve explainim mining bilong olketa profesi? Aposol Peter hem sei: “No eni profesi long olketa Holy Raeting hem kam from tingting bilong olketa man.”—2 Peter 1:20.

Pipol long world laek for savve long future so olketa studyim olketa samting wea happen long world and olketa luksavve evri samting hem olobaot. Nomata olsem, olketa no savve wanem bae happen long future.

Olketa profet long bifor olsem Daniel, olketa no studyim evri samting wea happen long taem bilong olketa and trae for talemaot profesi abaotem samting wea bae happen long future. Sapos olketa profet hia duim samting mekem profesi wea olketa talem hem fulfill, datwan minim profesi wea olketa talem hem kam from tingting bilong man wea no perfect. Aposol Peter sei: “No eni profesi wea man talem hem followim tingting bilong hemseleva, bat holy spirit nao leadim olketa man for talemaot toktok wea kam from God.”—2 Peter 1:21.

 “God Nomoa Savve Explainim Mining” Bilong Profesi

Samting olsem 3,700 year go finis, tufala man stap insaed prison long Egypt. Each wan long tufala garem wanfala interesting dream. Tufala storyim dream bilong tufala long Joseph wea stap long prison witim tufala, bikos tufala no savve go lukim olketa man wea savve explainim mining bilong olketa dream. Tufala sei: “Mitufala dream, bat no eni man long hia savve explainim mining bilong dream bilong mitufala.” Joseph wea worshipim God hem talem tufala for storyim olketa dream hia long hem. Hem sei: “God nomoa savve explainim mining bilong olketa [profesi].” (Genesis 40:8) Jehovah God nomoa savve long mining bilong profesi bikos olketa profesi kam from hem. Dastawe hem fitim for Joseph sei God nomoa savve duim datwan.

God explainim mining bilong olketa profesi long samfala difren wei. Wanfala wei nao, taem hem talem profesi long Bible hem talem tu hao datwan bae fulfill. Olketa kaen profesi olsem hem isi nomoa for iumi minim.—Genesis 18:14; 21:2.

Mek-tu wei for iumi savve long mining bilong olketa profesi long Bible hem for studyim olketa verse wea stap raonem datwan. Profet Daniel hem lukim wanfala vision wea hem profesi abaotem “wanfala man goat” wea garem “bigfala horn midol long tufala eye bilong hem,” and hem killim dae ‘wanfala man sheepsheep wea garem tufala horn.’ Olketa verse wea stap raonem disfala profesi showimaot datfala man sheepsheep hem piksarem “king bilong Media and Persia,” and datfala goat hem piksarem “king bilong Greece.” (Daniel 8:3-8, 20-22) Winim 200 year bihaen Daniel lukim disfala vision, Alexander the Great, wea hem nao datfala “bigfala horn” hem start for faet and winim olketa kantri long Persia. Man for raetem history, Josephus, sei taem Alexander hem faet long olketa ples klosap long Jerusalem, olketa showim hem datfala profesi and hem luksavve hao datwan storyim hem.

Mek-thri wei wea God explainim mining bilong olketa profesi hem nao wei wea hem iusim holy spirit. Holy spirit nao leadim Joseph for explainim mining bilong olketa dream bilong tufala man wea stap witim hem long prison. (Genesis 41:38) Taem pipol bilong God distaem no sure long mining bilong wanfala profesi olketa prea long God for holy spirit leadim olketa, and olketa studyim gud wanem Bible talem. Then God helpem olketa for faendem olketa scripture wea showimaot moa klia, mining bilong olketa profesi. No eni man hem seknomoa tingim mining bilong profesi. Datwan hem kam from God bikos spirit and Word bilong hem nao showimaot klia mining bilong profesi. No eni man savve explainim mining bilong olketa profesi insaed long Bible.—Acts 15:12-21.

Mek-foa wei wea God explainim mining bilong olketa profesi hem taem hem kontrolem and disaedem wanem taem nao olketa pipol bilong hem bae minim wanfala profesi. God savve mekem iumi luksavve long mining bilong wanfala profesi bifor hem fulfill, taem hem gohed for fulfill, or bihaen hem fulfill finis. Bikos God nomoa savve long mining bilong profesi bilong hem bae hem nao explainim datwan long barava taem wea hem markem.

Long datfala story abaotem Joseph and tufala man wea stap long prison witim hem, hem explainim mining bilong dream bilong tufala, thrifala day bifor olketa samting hia happen. (Genesis 40:13, 19) Long taem wea Joseph hem explainim mining bilong dream bilong Pharaoh, firstfala part bilong datfala dream wea sei kaikai bae hem staka for sevenfala year, hem klosap for start nao. Spirit bilong God leadim Joseph for talemaot mining bilong dream bilong Pharaoh mekem olketa  savve hipimap kaikai long taem wea kaikai hem staka.—Genesis 41:29, 39, 40.

Pipol bilong God savve long mining bilong samfala profesi bihaen olketa fulfill finis. Olketa profesi abaotem Jesus wea olketa raetem staka handred year bifor hem born, olketa disaepol no luksavve long mining bilong olketa go kasem taem hem dae and laef bak moa. (Psalm 22:18; 34:20; John 19:24, 36) Tingim diswan tu. Long Daniel 12:4 hem talem samfala profesi wea bae “stap haed go kasem taem world hem gogo for finis.” Long datfala taem nao “trufala savve bae kamap staka.” Iumi stap long taem wea world hem gogo for finis and wea olketa profesi hia gohed for fulfill. *

Hao Olketa Bible Profesi Affectim Iu

Joseph and Daniel storyim long olketa king wea rul long taem bilong tufala, olketa message wea affectim olketa kantri and kingdom. Olketa Christian long first century storyim message bilong Jehovah God long pipol long datfala taem, and pipol wea lisin and followim kasem gud samting from datwan.

Distaem evriwea long world Olketa Jehovah’s Witness talemaot wanfala message, wea hem wanfala profesi tu. Hem nao datfala gud nius abaotem Kingdom bilong God, and story bilong Jesus abaotem taem wea “world hem gogo for finis,” wea diswan hem gohed for fulfill distaem. (Matthew 24:3, 14) Waswe, iu savve wanem nao datfala profesi hem talem and hao nao diswan affectim iu? Olketa Jehovah’s Witness bae barava hapi for helpem iu for minim and kasem gudfala samting from disfala nambawan Bible profesi.

[Footnote]

[Piksa long page 21]

Taem Joseph and Daniel talem mining bilong profesi tufala mekhae long God