‘Taem for Love and Taem for Heit’

“GOD hem love.” Long samfala kantri pipol savve hangem toktok hia long wall long haos bilong olketa. Tru nao, datwan barava naesfala toktok wea storyim nambawan example bilong God for showimaot love.

Nomata olsem, staka pipol no savve toktok hia kam from Bible. Aposol John nao raetem disfala toktok, wea sei: “Man wea no showimaot love hem no savve long God bikos God hem love.” (1 John 4:8) John tu hem story abaotem love wea God showimaot for pipol long world. Hem sei: “God barava lovem tumas pipol long world dastawe hem givim kam spesol Son bilong hem, mekem evriwan wea showimaot faith long hem no dae bat kasem laef olowe.”—John 3:16.

Scripture hia maet mekem samfala tingse God evritaem willing for forgivim iumi. Samting wea pipol duim showimaot olketa tingse God bae no panisim olketa nomata olketa duim nogud samting. Bat waswe, datwan hem tru? Waswe, God lovem evriwan nomata olketa duim gud samting or nogud samting? Waswe, hem wei bilong God tu for heitim samwan or samting?

God Savve Love and Heit

King Solomon wea wise tumas hem talem disfala toktok: “Taem hem stap for evri samting, and evri samting wea iumi duim long laef hem garem taem wea barava fitim . . . taem hem stap for love and taem hem stap for heit.” (Ecclesiastes 3:1, 8) Disfala principle showimaot nomata God garem bigfala love and hem kaen, hem stret taem hem heitim samting or samwan tu.

Taem Bible talem datfala word “heit,” wanem nao hem minim? Wanfala buk sei: “Long Bible datfala word ‘heit’ garem samfala difren mining. Hem savve minim man garem strongfala feeling for againstim narawan and man savve keepim kros for longfala taem. Man wea garem kaen feeling for heit olsem maet start for tingim datwan olowe and laek for spoelem man wea hem heitim.” Taem iumi herem datfala word “heit,” hem nao samting wea iumi tingim and hem samting wea iumi lukim long full world tu. Bat datfala buk sei nara mining bilong “heit” hem olsem: “Hem savve minim wei wea man barava les long samwan or samting bat hem no tingting for spoelem hem.”

Disfala mining nao bae iumi story abaotem. Waswe, God savve heitim samwan or samting long wei olsem? Lukim samting wea Proverbs 6:16-19 talem: “Sixfala samting stap wea Jehovah heitim, tru nao, sevenfala samting nao hem barava heitim: eye wea praod, tongue wea talem laea samting, hand wea killim dae man wea no guilty, heart wea plan for spoelem narawan, leg wea ran go kwiktaem for duim nogud samting, witness wea talem laea samting, and eniwan wea talem samting for mekem raoa kamap midolwan long olketa brata.”

Scripture hia talem iumi olketa samting wea man savve duim wea God heitim. Bat datwan no minim hem heitim man wea duim olketa samting hia. Hem savve samfala reason stap wea maet mekem man duim olketa samting  hia. Maet hem bikos long sin wea man born witim, olketa samting wea happen long ples wea man stap, samting wea man lanem from parents bilong hem, and from man no savve. (Genesis 8:21; Romans 5:12) Man wea raetem Proverbs hem storyim wanfala gud example long diswan. Hem sei: “Jehovah hem stretem man wea hem lovem, olsem wanfala dadi hem stretem son wea hem lovem.” (Proverbs 3:12) Dadi or mami maet heitim nogud samting wea pikinini duim, bat hem still lovem hem and bae stretem and helpem hem for no duim datfala nogud samting moa. From Jehovah lovem man, hem tu duim sem samting taem hem luksavve man hia savve change.

God Garem Stretfala Reason for Heit

Waswe sapos man hem savve long wanem God laekem and hem les for duim datwan? God hem barava no hapi long man olsem. Sapos hem min for gohed duim samting wea Jehovah heitim, datwan bae mekem Jehovah heitim hem. Olsem example, Bible sei: ‘Jehovah lukluk gud long man wea raeteous and man wea wicked, and Hem heitim man wea raf and wea laekem tumas datkaen wei.’ (Psalm 11:5) God no forgivim man olsem wea no repent. Iumi savve long diswan bikos long samting wea aposol Paul talem long leta wea hem raetem for olketa Hebrew. Hem sei: “Sapos iumi gohed for duim sin nomata iumi lanem finis olketa tru teaching, and iumi nating sorre long datwan, no eni sakrifaes moa hem stap for olketa sin hia. Sapos iumi gohed olsem, bae iumi weitim nao judgment wea savve barava mekem man fraet and bigfala kros wea olsem fire wea bae finisim olketa wea againstim God.” (Hebrews 10:26, 27) Why nao God wea lovem pipol hem garem tingting olsem?

Taem man hem min for duim samting wea nogud and gohed for duim datwan, gogo datwan savve kamap wei bilong hem and hem no savve change nao. Bible sei hem hard for kaen man olsem for change, semsem olsem hao hem hard for man changem kala skin bilong hem. (Jeremiah 13:23) Man wea hard for change hem duim samting wea Bible kolem ‘sin wea bae stap for olowe’ and God bae no forgivim datkaen sin.—Mark 3:29.

Diswan nao samting wea Adam and Eve and Judas Iscariot duim. Adam and Eve perfect and komand wea God talem hem klia long tufala, so taem tufala no obey hem showimaot tufala min for duim datwan, dastawe God no savve forgivim tufala. Iumi savve long diswan bikos bihaen tufala sin, God no askem tufala for repent. (Genesis 3:16-24) Judas givim Son bilong God, Jesus, go long olketa enemy nomata hem wanfala aposol bilong hem. Dastawe Jesus sei ‘Judas bae hem finis.’ (John 17:12) Bible sei Devil tu hem man wea hard for changem nogud  wei bilong hem dastawe hem bae finis. (1 John 3:8; Revelation 12:12) God heitim Adam and Eve, Judas, and Satan.

Bat samfala wea duim sin, olketa savve change tu. Jehovah barava patient and no laek for panisim olketa wea no savve olketa duim sin. (Ezekiel 33:11) Hem laekem olketa for repent and hem bae forgivim olketa. Bible sei: “Man wea wicked mas lusim nogud wei bilong hem, and man wea no raeteous mas lusim nogud tingting bilong hem. Hem mas go bak long Jehovah wea bae showimaot mercy long hem, and hem mas go bak long God bilong iumi wea bae barava forgivim hem.”—Isaiah 55:7.

Stretfala Tingting Abaotem Love and Heit

Olketa tru Christian wea followim example bilong God mas garem stretfala tingting abaotem ‘taem for love’ and ‘taem for heit.’ Sapos man wea duim sin hem wanfala fren or relative, datwan savve mekem hem no isi for garem stretfala tingting abaotem wei for showimaot love and mercy long hem or wei for heitim datfala sin wea hem duim. Toktok bilong disaepol Jude savve helpem iumi for minim diswan. Hem sei: “Gohed for showimaot mercy long olketa narawan bat keakea taem iufala duim datwan, and heitim datfala kaleko wea body mekem hem dirty.” (Jude 22, 23) Dastawe iumi mas heitim nogud samting wea man duim and no datfala man.

Olketa Christian mas lovem tu enemy bilong olketa. Jesus hem talem disfala komand: “Gohed lovem olketa enemy bilong iufala and for prea for olketa wea spoelem iufala.” (Matthew 5:44) Dastawe Olketa Jehovah’s Witness gohed for preachim gud nius abaotem Kingdom bilong God, nomata samfala no laek herem. (Matthew 24:14) Olketa Jehovah’s Witness garem tingting bilong God taem olketa ting long evriwan olsem man wea Jehovah savve lovem and showimaot mercy long hem. Taem pipol no tinghae or tok spoelem or againstim waka wea Olketa Jehovah’s Witness duim for helpem olketa, olketa Witness duim samting wea aposol Paul talem: “Gohed askem God for blessim olketa wea spoelem iufala. No tok spoelem pipol, bat askem God for blessim olketa . . . Sapos eniwan duim nogud samting long iufala, iufala no changem bak.” (Romans 12:14, 17) Olketa savve Jehovah nao bae disaedem hu nao bae hem lovem and hu nao hem les long hem. Hem nao bae judgem man and disaedem sapos hem fit for laef or dae.—Hebrews 10:30.

Tru tumas, “God hem love.” Dastawe iumi mas showimaot iumi tinghae long hem and waka hard for savve wanem hem laekem and then iumi duim datwan. Olketa Jehovah’s Witness long area bilong iu bae hapi tumas for helpem iu for savve wanem God laekem iu for duim, and hao iu savve duim datwan long laef bilong iu. Sapos iu duim wanem God laekem bae hem no heitim iu bat bae hem lovem iu.

[Blurb long page 13]

“Sixfala samting stap wea Jehovah heitim, tru nao, sevenfala samting nao hem barava heitim: eye wea praod, tongue wea talem laea samting, hand wea killim dae man wea no guilty, heart wea plan for spoelem narawan, leg wea ran go kwiktaem for duim nogud samting, witness wea talem laea samting, and eniwan wea talem samting for mekem raoa kamap midolwan long olketa brata.”—PROVERBS 6:16-19

[Blurb long page 14]

“Sapos iumi gohed for duim sin nomata iumi lanem finis olketa tru teaching, and iumi nating sorre long datwan, no eni sakrifaes moa hem stap for olketa sin hia. Sapos iumi gohed olsem, bae iumi weitim nao judgment wea savve barava mekem man fraet and bigfala kros wea olsem fire wea bae finisim olketa wea againstim God.”—HEBREWS 10:26, 27

[Blurb long page 15]

‘Man wea wicked mas lusim nogud wei bilong hem, and man wea no raeteous mas lusim nogud tingting bilong hem. Hem mas go bak long Jehovah wea bae showimaot mercy long hem. God bilong iumi bae barava forgivim hem.’—ISAIAH 55:7

[Piksa long page 14]

Parents wea lovem pikinini bae stretem hem for helpem hem

[Piksa long page 15]

God showimaot love and mercy long staka man