Taem wea Iu Mas No Sleep
Lanem Pikinini Bilong Iu
Taem wea Iu Mas No Sleep
MAET iu luksavve hem important for iu no sleep taem iu long skul. Staka pikinini savve laek for sleep taem class hem gohed, but sapos iu laek for lane, iu mas no sleep. Narafala taem wea hem important for iu no sleep hem taem iu go long olketa meeting for lane abaotem Bible.
Wanem nao iu savve duim for no sleep long olketa taem hia?— * Wanfala idea nao iu mas sleep kwiktaem long evening. Nara samting wea savve helpem iu hem sapos iu sleep lelebet long aftanun. Distaem bae iumi storyim wanem iumi savve lanem from samting wea happen long wanfala boy. Aposol Paul givim wanfala tok go kasem leit naet and disfala boy wea lisin hem laek sleep, and gogo hem sleep nao. Iumi readim disfala story long Bible long Acts chapter 20 verse 7 go kasem 12, for savve wanem happen.
Paul hem visitim kongregeson long Troas, wanfala taon wea stap long saedsea. Bible sei hem ready for lusim datfala taon long next day long wanfala ship, so hem story witim olketa brata long wanfala haos long there. Hem story “gogo hem midolnaet nao.” Bible sei moa: ‘Wanfala young man wea nem bilong hem Eutychus, hem sidaon long window taem Paul gohed for story.’ Wanem nao happen?—
Eutychus ‘hem foldaon nao from mek-thri story’ bilong datfala haos. Paul and olketa narawan hariap go daon for lukim hem. Bat Eutychus hem dae nao! Olketa mas sorre tumas, iaman?— Bible hem sei Paul holem Eutychus and gogo hem sei long olketa: ‘Iufala no wari, hem laef moa ia!’ God nao mekem Eutychus for laef bak!
Waswe, iumi savve lanem eni samting abaotem God from wanem hem happen long Eutychus?— Wanfala samting iumi lanem nao, Dadi bilong iumi long heven, Jehovah, savve mekem olketa young wan wea dae for laef moa. Jehovah savve gud long iu and hem lovem iu, winim dadi and mami bilong iu. Iumi savve Jehovah hem ting olsem bikos Jesus hem olsem dadi bilong hem. Taem Jesus stap long earth hem holem olketa smol pikinini and blessim olketa, and tu, hem resurrectim olketa young wan, wea wanfala nao hem gele wea 12 year.
Taem iu savve Dadi bilong iu long heven hem lovem iu, datwan mekem iu feel hao?— Datwan mekem iumi lovem Jehovah and laek for obeyim Hem. Waswe, iu savve hao nao iumi savve showimaot iumi lovem Jehovah?— Iumi savve talem hem iumi lovem hem. Jesus sei: “Mi lovem Dadi.” Jesus no talem nomoa bat samting wea hem duim tu showimaot hem lovem dadi bilong hem.
Jesus hem obeyim God. Hem sei: “Mi evritaem duim samting wea hem laekem.” Iumi laek for followim example bilong Jesus and obeyim God. Taem iumi no sleep long class or long olketa meeting, iumi obeyim Jehovah wea datwan bae mekem Hem and Jesus hapi long iumi.
Readim long Bible bilong iu
[Footnote]
^ par. 4 Sapos iu read witim wanfala pikinini, disfala mark (—) hem minim for iu stop lelebet and askem pikinini for talem tingting bilong hem.
