Tru Samting Abaotem God Savve Changem Laef Bilong Iu

MAET iu herem or iu bilivim samting abaotem God, wea olketa article bifor diswan showimaot hem no tru. Nomata olsem, sapos iu bilivim datwan for longtaem finis, maet iu hol bak for changem biliv bilong iu.

Maet iu hol bak bikos samfala religion no encouragem man for comparem teaching bilong olketa witim wanem Bible talem. Olketa narawan sei olketa teaching bilong Church hem hard tumas for minim and hem for olketa bigman nomoa for minim. Olketa disaepol bilong Jesus no go long eni big skul bat hem no hard for olketa minim wanem hem teachim.—Acts 4:13.

Maet iu hol bak tu for chekim gud olketa biliv bilong iu witim Bible bikos maet iu tingse datwan showimaot iu no garem faith. Bat waswe, hem stret for sei God bae no hapi sapos iu lukluk insaed Bible for minim wanem hem laekem iu for duim? Nomoa, Word bilong God encouragem iu for lukluk gud long Bible. Hem sei iumi mas “luksavve long samting wea God laekem iumi for duim, wea hem gudfala and stret and wea hem hapi long hem.”—Romans 12:2.

Wei for lanem tru samting abaotem God hem no for iu savve nomoa, bat hem savve changem laef bilong iu mekem hem gud winim bifor. (John 8:32) Distaem, Deanne wea iumi storyim long first article hem trustim Word bilong God. Hem sei: “Taem mi studyim Bible nao mi luksavve hem nating hard for man minim. Distaem nao mi savve Jehovah God hem Dadi bilong mi wea lovem mi and hem no olsem wanfala paoa nomoa wea no interest long pipol. Laef bilong mi garem mining distaem.”

Maet iu studyim Bible bifor and iu tingse iu no kasem eni gud samting. Sapos olsem, iu no givap for kasem stretfala savve. Hem no isi for minim Bible sapos samwan teachim iu finis olketa laea samting abaotem God. Hem olsem iu trae for go long wanfala vilij wea stap farawe bat man wea leadim iu hem no savve long stretfala road. Nomata maet iu kasem midol road finis, bae iu givap nao. Bat sapos iu followim nara man wea savve long stretfala road, bae iu kasem vilij wea iu laek for go long hem.

Waswe, iu laek lanem tru samting abaotem God? Sapos iu laek for studyim Bible, iu savve story witim Olketa Jehovah’s Witness long ples wea iu stap or raet go long address wea fitim long page 4 bilong disfala magasin.

[Blurb long page 9]

“Luksavve long samting wea God laekem iumi for duim, wea hem gudfala and stret and wea hem hapi long hem.”—ROMANS 12:2