Samfala Ask Olsem . . .

Waswe, Hem Stret for Olketa Baby Baptaes?

▪ Victoria hem sei: “Mi barava wari bikos mi tingse John, smol brata bilong mi bae go long Limbo.” Why nao hem ting olsem? Hem sei: “Wanfala Catholic priest hem talem John bae stap olowe long Limbo bikos hem no baptaes then hem dae.” Kaen teaching olsem savve mekem man fraet, bat waswe, hem teaching wea kam from Bible? Waswe, Bible teachim olketa pikinini wea no baptaes and then dae, no garem eni hope nao?

Bible sei olketa Christian shud baptaes. Jesus givim disfala komand long olketa disaepol: “Iufala go and teachim pipol long evri kantri for kamap disaepol bilong mi. Baptaesim olketa hia long nem bilong Dadi and bilong Son and bilong holy spirit. Teachim olketa for followim evri samting wea mi laekem iufala for duim. Bae mi stap witim iufala go kasem taem wea world hem finis.” (Matthew 28:19, 20) Scripture hia sei olketa wea kamap disaepol bilong Jesus nao olketa mas baptaes. Datwan minim olketa hia lane abaotem Jesus and disaed for followim hem. Diswan hem samting wea olketa baby hard for duim.

Nomata olsem, staka sei disfala komand bilong Jesus hem for olketa smol pikinini tu. Pastor bilong Lutheran church Richard Bucher sei: “Evriwan mas baptaes, nomata olketa baby tu.” Hem sei moa: “Sapos iumi stopem olketa for baptaes bae olketa no kasem forgiveness and maet bae olketa stap for olowe long hell.” Bae iumi storyim thrifala wei wea disfala teaching hem difren from wanem Jesus teachim.

First wan, Jesus nating talem for olketa baby mas baptaes. Jesus teachim olketa disaepol bilong hem wanem God laekem olketa for duim. Samfala taem hem mas talem moa olketa main teaching bilong hem long olketa. Why nao hem duim datwan? Mekem olketa minim gud olketa teaching hia. (Matthew 24:42; 25:13; Mark 9:34-37; 10:35-45) No enitaem hem teachim for olketa baby mas baptaes. Waswe, Jesus forget for teachim diswan? Nomoa! Sapos olketa baby mas baptaes, bae Jesus talem long olketa disaepol.

Mek-tu, Jesus nating teachim man bae safa bihaen hem dae. Hem bilivim disfala toktok insaed long olketa Holy Raeting: “Olketa wea laef savve olketa bae dae; bat olketa wea dae finis no savve long eni samting.” (Ecclesiastes 9:5) Jesus savve olketa wea dae no stap long purgatory, Limbo, hellfire or long eni nara ples. Bat Jesus teachim olketa disaepol hao taem man hem dae hem no savve long eni samting, hem olsem hem sleep nomoa.—John 11:1-14.

Mek-thri, Jesus teachim olketa disaepol hao “evriwan wea stap insaed long grev” bae laef bak. (John 5:28, 29) Staka million pipol wea nating baptaes tu bae laef bak. Taem olketa resurrect, bae olketa garem chance for lanem wanem God laekem olketa for duim and chance for laef olowe long Paradaes long disfala earth. *—Psalm 37:29.

Tru nao, Bible nating talem for olketa baby mas baptaes.

[Footnote]