WHY nao Frederick and Leanne kasem disfala problem? Tufala laek for duim stret samting. Tufala evriwan lovem God. And tufala luksavve hem important for studyim Bible tugeta. Bat disfala Bible study wea shud helpem tufala hem mekem tufala feel nogud. Tufala study bat tufala no waka tugeta for garem spiritual tingting.

Wanem nao hem minim for garem spiritual tingting? Why nao hasband and waef mas waka tugeta for garem diswan? Wanem nao maet samfala problem wea mekem diswan no isi, and wanem nao tufala savve duim?

Taem Bible iusim toktok “spiritual tingting,” hem minim wankaen tingting wea man hem garem abaotem living bilong hem. (Jude 18, 19) Olsem example, Paul, wea raet long Bible, storyim hao spiritual man hem garem tingting wea difren from physical man. Paul sei physical man hem tingim nomoa samting wea hemseleva laekem. Hem duim samting wea hemseleva tingse hem stret and hem no laek for followim olketa standard bilong God.—1 Corinthians 2:14; Galatians 5:19, 20.

Bat, man wea garem spiritual tingting hem tinghae long olketa standard bilong God. Hem ting long Jehovah olsem fren bilong hem and traem best for followim wei bilong hem. (Ephesians  5:1) Bikos long diswan hem showimaot love long narawan, hem kaen and hem hambol. (Exodus 34:6) Hem obeyim God tu nomata long taem wea hem no isi for duim datwan. (Psalm 15:1, 4) Darren wea stap long Canada and wea marit for 35 year finis sei: “Long tingting bilong mi, man wea garem spiritual tingting hem evritaem tingim hao toktok and samting wea hem duim affectim wei wea hem fren witim God.” Waef bilong hem Jane sei tu: “Woman wea garem spiritual tingting hem traem best evriday for garem olketa wei bilong holy spirit bilong God.”—Galatians 5:22, 23.

No olketa wea marit nomoa mas garem spiritual tingting. Bible sei evriwan nao garem responsibility for savve long God and followim wei bilong hem.—Acts 17:26, 27.

So why nao hem important for hasband and waef waka tugeta for garem spiritual tingting? Tingim disfala example: Tufala man ownim wanfala pis land and laek for plantim cocoa long hem. Wanfala man laek for plantim long wanfala area bilong datfala pis land and narawan laek for plantim long nara area. Wanfala sei for iusim fertilizer bat narawan no agree and sei olketa cocoa tree hia no needim eni fertilizer. Wanfala laek for waka evriday long datfala planteison bat narawan laek for relax nomoa. Maet planteison hia garem samfala cocoa tree wea healthy and garem frut. Bat sapos tufala man hia garem sem tingting long hao for waka long datfala planteison and then tufala waka tugeta long datwan, maet planteison hia garem staka cocoa tree wea healthy and garem frut.

Hasband and waef olsem tufala hia wea ownim datfala planteison. Sapos wanfala nomoa hem waka hard for garem spiritual tingting, datwan savve helpem marit bilong tufala. (1 Peter 3:1, 2) Bat taem tufala evriwan waka tugeta for followim olketa standard bilong God, and traem best for sapotim each other, diswan bae barava helpem marit bilong tufala! King Solomon wea wise hem sei: “Tufala man nao winim wanfala man.” Why nao olsem? “Bikos tufala bae kasem gud samting from hard waka bilong tufala. Sapos wanfala hem foldaon, narawan savve helpem hem for standap.”—Ecclesiastes 4:9, 10.

Maet iu barava laek for waka tugeta witim hasband or waef bilong iu for iutufala garem spiritual tingting. Bat for laekem samting nomoa bae no mekem iutufala kasem gud samting. Bae iumi storyim tufala problem wea maet mekem diswan no isi for iutufala, and wanem iu savve duim.

FIRSTFALA PROBLEM: Mitufala busy tumas.

Sue wea hem just marit nomoa sei: “Hasband bilong mi pikim mi bihaen waka long 7 klok long evening. Taem mitufala kasem bak long haos olketa waka stap tu for duim. Bihaen datwan mifala taed and laek for rest nomoa bat mifala savve mifala mas studyim Bible.”

Wanem for duim: Mas willing for changem samting and waka tugeta. Sue hem sei: “Mitufala hasband bilong mi disaed for wekap early for readim and storyim Bible tugeta bifor mifala go long waka. Hasband bilong mi helpem mi tu for duim samfala waka long haos mekem mifala free for duim moa samting tugeta.” Wanem gud samting nao tufala kasem from tufala duim diswan? Ed, hasband bilong Sue hem sei: “Taem mitufala Sue evritaem storyim tugeta olketa spiritual samting, datwan helpem mifala for stretem olketa problem wea mifala kasem and hem help for daonem olketa feeling for wari wea mifala garem.”

Hem barava important tu for story and prea tugeta evriday. Hao nao datwan savve help? Ryan wea marit for 16 year finis hem sei: “No longtaem go nomoa, mitufala barava garem hard taem insaed marit bilong mifala. Bat mifala prea tugeta evri naet and talemaot feeling and wari bilong mifala long God. Long tingting bilong mi, wei wea mifala prea tugeta hem helpem mifala for stretem olketa problem and stap gud bak moa.”

MEK-TU PROBLEM: Mitufala interest long olketa difren samting.

Tony hem sei: “Mi no savve interest for sidaon and readread.” Waef bilong hem Natalie sei: “Mi savve laekem tumas for read and story abaotem wanem mi readim. Maet datwan nao mekem Tony hol bak taem mitufala storyim olketa Bible topic.”

Wanem for duim: Sapotim hasband or waef, no judgem or laek winim hem. Encouragem hasband or waef bilong iu long eni samting wea hem savve gud hao for duim. Tony hem sei: “From waef bilong mi interest tumas for storyim olketa Bible topic, datwan mekem mi hol bak for story witim hem. Bat evritaem Natalie encouragem mi. So distaem mitufala evritaem storyim Bible tugeta, and mi no wari nao bikos mi enjoyim kaen story olsem. Datwan helpem mifala for stap gud and hapi long marit bilong mifala.”

Staka hasband and waef luksavve taem olketa markem taem evri week for readim and studyim Bible tugeta, datwan helpem marit bilong olketa. Bat wanfala samting iu mas careful long hem taem iufala study, hem nao for sei hasband or waef bilong iu nao shud followim datfala kaonsel. Iu nao mas tingim hao iuseleva savve followim wanem iutufala studyim. (Galatians 6:4) Storyim eni samting wea iutufala no agree long hem long narafala taem, no taem iufala studyim Bible. Why nao olsem?

Tingim diswan: Jesus sei wei for lane and duim wanem God laekem iumi for duim, hem olsem wei for kaikai. Waswe, bae iu klinim wanfala soa wea nana kamaot long hem, long taem wea famili sidaon for kaikai? Barava nomoa nao. Bae no eniwan laek for kaikai nao. (Matthew 4:4; John 4:34) Sapos iufala story abaotem samting wea iufala no agree long hem long taem iufala studyim Bible, hem olsem iu klinim wanfala soa long taem for kaikai. Datwan savve mekem hasband or waef bilong iu no interest for storyim spiritual samting. Hem tru, iufala mas storyim olketa problem wea kamap, bat hem gud for storyim olketa samting olsem long narafala taem wea fitim.—Proverbs 10:19; 15:23.

Sapos hasband and waef waka tugeta for garem spiritual tingting, bae tufala stap gud and hapi long marit bilong tufala. Bible sei: “Eni samting wea [man] plantim, datwan nao bae hem harvestim.”—Galatians 6:7.

Frederick and Leanne, wea iumi storyim long start bilong disfala article luksavve disfala Bible principle hem tru. Tufala marit finis for 45 year and tufala kasem gudfala samting from tufala waka tugeta for garem spiritual tingting. Frederick sei: “From mitufala no savve story gud tugeta, mi blamem waef bilong mi for datwan. Bat gogo mi luksavve mi tu mas duim samting.” Leanne sei: “Samting wea barava helpem mitufala for deal witim olketa hard taem hem bikos mifala evriwan lovem Jehovah God. Long olketa year wea mifala marit, mifala evritaem studyim Bible and prea tugeta. Taem mi lukim Frederick hem waka hard for showimaot olketa Christian wei, datwan mekem mi barava lovem hem.”