Hao Nao Iu Ting Long Jesus?

Long tingting bilong iu, waswe, Jesus hem wanfala baby, man wea redi for dae, or wanfala King?

Bible sei Jesus hem wanfala King wea garem bigfala paoa. Hao nao datwan affectim iu?

Staka pipol bilivim dae bilong Jesus sevem olketa. Bat hao nao dae bilong wanfala man klosap 2,000 year go finis hem sevem man distaem?

Mifala hapi for invaetem iu for kam herem ansa from Bible for olketa kwestin hia. Bae olketa storyim disfala information taem Olketa Jehovah’s Witness hipap for celebratem dae bilong Jesus. Diswan bae kamap long Thursday, April 5, bihaen sun hem go daon.

Plis chek witim Olketa Jehovah’s Witness long ples wea iu stap for savve long taem and ples wea datfala celebration bae kamap.

Long weekend, Olketa Jehovah’s Witness bae hipap for herem wanfala interesting Bible tok wea garem title “Waswe, Iu Luksavve End Hem Klosap?” Disfala tok bae kamap evriwea long world and bae helpem pipol wea tinghae long truth and wea laek for lanem moa samting abaotem Jesus Christ. Mifala invaetem iu for kam herem disfala tok.