Lanem Pikinini Bilong Iu

“Hem Gohed Faithful Long Jehovah”

WASWE, enitaem man talem iu for faithful long samwan?— * Iumi bae storyim wanfala man wea faithful. Man hia hem Hezekiah. Bible sei hem “gohed faithful long Jehovah,” datfala tru God. Wanem nao iumi savve lanem from example bilong hem?

Taem Hezekiah hem pikinini, hem kasem staka hard taem. Dadi bilong hem, Ahaz, wea hem king bilong Judah, hem finis for worshipim Jehovah. Taem Hezekiah hem smol boy yet, Ahaz leadim pipol for worshipim olketa laea god. Ahaz killim dae wanfala son bilong hem and sakrifaesim long wanfala god wea hem worshipim.

Nomata Ahaz gohed duim olketa rabis samting, Hezekiah hem faithful for obeyim Jehovah. Hao nao tingting bilong iu, hem isi for Hezekiah duim olsem?— Hem bae no isi, iaman? Bat Hezekiah no givap! Iumi laek for savve wanem nao helpem Hezekiah for gohed faithful long Jehovah and wanem nao savve helpem iumi for duim sem samting.

Hezekiah hem lane abaotem olketa man wea gohed faithful long Jehovah. Wanfala nao hem David. David hem dae wan handred year bifor Hezekiah hem born. Bat Hezekiah savve read abaotem hem long olketa Holy Raeting. David hem sei: “Nomata sapos dadi and mami bilong mi lusim mi, Jehovah bae lukaftarem mi.”

So wanem nao helpem David for obeyim Jehovah?— Faith bilong hem nao ia! David  hem savve sapos hem obey, Jehovah bae helpem hem. Wei for tingting raonem samting wea David duim helpem Hezekiah for gohed faithful for obeyim Jehovah. Jehovah bae helpem iu tu sapos iu gohed for faithful long hem.

Bat waswe sapos dadi or mami bilong iu no worshipim Jehovah?— God hem sei olketa pikinini mas obeyim mami and dadi. So iu mas obeyim mami and dadi bilong iu. Bat sapos mami and dadi talem iu for duim samting God hem tambuim, iu savve talem tufala why nao datwan hem tambu. Nomata sapos mami, dadi or eniwan moa talem iu for laea, steal or duim eni nara samting wea God sei hem rong, iu mas no duim datwan. For obeyim God nao hem stret samting for duim!

Samfala gud example stap for iumi followim. King David and Jotham, wea hem grani bilong Hezekiah, showimaot gud example for Hezekiah followim. Hezekiah savve lane from hem, olsem iumi savve duim taem iumi readim Bible. Hao, iu savve tingim eni nara gud example moa for iumi followim?—

Iumi savve readim long Bible olketa mistek bilong Hezekiah, David, Jotham, and olketa narawan wea no perfect. Nomata olketa hia duim mistek, olketa lovem Jehovah, olketa talemaot mistek bilong olketa and olketa trae for duim stret samting. Tingim, Jesus Christ nomoa man wea perfect. Bae hem gud for lane abaotem hem and trae for followim example bilong hem.

Readim long Bible bilong iu

2 Kings 18:6; 2 Chronicles 28:1-3

Psalm 27:10; Ephesians 6:1; Colossians 3:20

2 Chronicles 27:1, 2; 1 Peter 2:21

[Footnote]