Disfala article storyim samfala kwestin wea maet iu tu laek for savve long ansa bilong olketa, and hem showim iu wea insaed Bible nao iu savve faendem ansa. Olketa Jehovah’s Witness bae hapi for storyim olketa ansa hia witim iu.

1. Wanem nao iumi shud duim for rememberim dae bilong Jesus?

Jesus talem olketa follower bilong hem for iusim bred and wine for rememberim dae bilong hem. Bred hem piksarem body bilong Jesus, and wine piksarem blood bilong hem.​—Readim Luke 22:19, 20.

Bred wea Jesus iusim no garem eni yeast insaed. Plande taem long Bible, yeast hem piksarem sin. So datfala bred barava piksarem body bilong Jesus wea perfect. Jesus givim body bilong hem olsem sakrifaes wea datwan finisim wei for sakrifaesim olketa animal wea followim Law bilong Moses. (Hebrews 10:5, 9, 10) Wine hem piksarem blood bilong Jesus wea hem givim olsem sakrifaes for olketa sin bilong iumi.​—Readim 1 Peter 1:19; 2:24; 3:18.

2. Wanem taem nao iumi shud celebratem dae bilong Jesus?

Jesus hem dae long Pasova, Nisan 14. Day bilong olketa Jew hem start long taem wea sun go daon. Long naet bifor Jesus dae hem kaikaim datfala Pasova kaikai witim olketa aposol bilong hem. Then hem startim wanfala niu celebration for celebratem dae bilong hem.​—Readim Luke 22:14, 15.

Long distaem, pipol bilong God celebratem samting wea God duim for mekem world kamap free from sin and dae. (Exodus 12:5-7, 13, 17) Long bifor, olketa celebratem Pasova wanfala taem evri year, dastawe iumi celebratem dae bilong Jesus wanfala taem evri year tu. Iumi duim diswan bihaen sun hem go daon long Nisan 14 for followim Bible kalenda.​—Readim John 1:29.

  3. Hu nao olketa wea savve kaikaim datfala bred and drinkim datfala wine?

Taem Jesus pasim go wine hia long olketa follower bilong hem, hem sei: “Diswan hem piksarem datfala niu agreement.” (1 Corinthians 11:25) Datfala niu agreement changem datfala Law bilong Moses, wea God promisim long olketa Israelite sapos olketa obeyim hem olketa bae kamap pipol bilong hem. (Exodus 19:5, 6) Bat olketa Israelite no obeyim God. So Jehovah mekem wanfala niu agreement.​—Readim Jeremiah 31:31.

From disfala niu agreement, Jehovah iusim wanfala smol sekson for helpem staka pipol kasem olketa blessing. Namba bilong olketa long datfala smol sekson wea insaed niu agreement hia hem 144,000 nomoa. Jehovah bae iusim olketa hia for helpem plande million pipol evriwea long world kasem laef olowe long paradaes long earth. Samfala wea insaed datfala niu agreement olketa stap long earth distaem and worshipim Jehovah. Olketa hia nomoa savve kaikaim datfala bred and drinkim datfala wine bikos Jesus hem sei, datfala wine hem ‘piksarem niu agreement.’​—Readim Luke 12:32; Revelation 14:1, 3.

4. Hao nao Memorial celebration helpem iumi?

Disfala Memorial bilong dae bilong Jesus wea kamap evri year hem barava helpem iumi for tinghae long bigfala love bilong Jehovah. Hem sendem kam Son bilong hem for dae for iumi, mekem iumi kasem forgiveness for sin. So taem iumi go for celebratem Memorial, iumi shud ting raonem why Jesus hem dae and hao datwan helpem iumi. Iumi mas ting raonem wanem iumi savve duim for showimaot iumi tinghae long samting wea Jehovah and Jesus duim for iumi.​—Readim John 3:16; 2 Corinthians 5:14, 15.

For kasem moa information, lukim page 206-208 long disfala buk wea Olketa Jehovah’s Witness pablisim. Wanem Nao Really Samting wea Bible Teachim?